ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކަށް ކަރަންޓު ދިނުމުގެ އެންމެ ފަހުގެ މަސައްކަތްތައް ފެށިފައިވާކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން މިއަދު ބުނެފި އެވެ.
ހިޔާ ފްލެޓުތަކަށް ކަރަންޓު ފޯރުކޮށްދިނުމުގެ ވިއުގަ ގާއިމުކުރުމުގެ މަސައްކަތް އެޗްޑީސީން ހަވާލުކޮށްފައިވަނީ ބްރައުންސް-ސީއެމްއީސީ ކުންފުންޏާ އެވެ.
އެކަމަށްޓަކައި އެކުންފުނިން ހަރުކޮށްފައިވާ ޓްރާންސްފޯމަރުތައް ޓެސްޓުކޮށް ކަރަންޓު ދީފައިވާއިރު، އެ މަޝްރޫއު ނިންމައި މިއަދު ހަވާލުކޮށްފައިވާ ކަމަށް އެޗްޑީސީން ބުންޏެވެ.
އެޗްޑީސީގެ އޮފިޝަލަކު "އަދަދު"އަށް ވިދާޅުވި ގޮތުގައި ދެން އޮންނާނީ ވަކިވަކި ޔުނިޓިތަކަށް ކަރަންޓު ގުޅައިލުމުގެ މަސައްކަތް ކަމަށެވެ.
އެގޮތުން، ކަރަންޓު ފޯރުކޮށްދިނުމުގެ އެންމެ ފަހުގެ މަސައްކަތް އަންނަ މަހުގެ 17 ވަނަ ދުވަހަށް ނިމޭނެކަމަށް އެޗްޑީސީން އިތުރަށް ބުންޏެވެ.
ހިޔާ ފްލެޓް ލިބުނު މީހުންނާ ތަޅުދަނޑި ހަވާލުކުރަން ފަށާފައިވީ ނަމަވެސް، އެ ތަންތަނުގެ ފިނިޝިން މަސަައްކަތް ނިންމަން ލިބޭ ތިން މަސް ދުވަސް އަދި ގުނާކަށް ނުފަށާނެ އެވެ.
އެޗްޑީސީން މި މުއްދަތު ގުނަނީ ފްލެޓުތަކަށް ބޭނުންވާ ފެނާއި ކަރަންޓުގެ ހިދުމަތް ފޯރުކޮށް ދިނުމަށް ފަހު އެވެ.
ހިޔާ ފުލެޓުތަކަށް ފައިސާ ދައްކާ ހަލާސްކުރުމަށް ހަމަޖެހިފައިވަނީ 25 އަހަރުގެ މުއްދަތަށް ބަހާލައިގެން، އިންސްޓޯލްމަންޓު އުސޫލުން މަހަކު 7،500ރ ދައްކާ ގޮތަށެވެ. އަދި ފުލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު 1,000ރ. ނަގާ ގޮތަށް ވެސް ވަނީ ހަމަޖެހިފަ އެވެ.
އެހެންކަމުން، މިހާރު ސަރުކާރުން ކަނޑައަޅާފައިވާ ގޮތުން، ހިޔާ ފްލެޓަކަށް މަހަކު 8،500ރ. ދައްކަން ޖެހެ އެވެ. އެ އަގު ބޮޑުވެގެން ޝަކުވާ ދަނީ ކުރަމުންނެވެ.
