ފުވައްމުލަކު ސިޓީ ހޮސްޕިޓަލްގެ އަންހެނުންގެ ބަލިތަކަށް ހާއްސަ ޑޮކްޓަރުގެ ފަރާތުން އިހުމާލުގެ މައްސަލަތައް ފެންނާތީ އޭނާ މަސައްކަތުން އެކަހެރި ކޮށްދިނުމަށް އެ ސިޓީގެ ކައުންސިލުން ހެލްތު މިނިސްޓްރީގައި މިއަދު އެދެފި އެވެ.
މީގެ ދެ މަސް ކުރިން އެ ހޮސްޕިޓަލްގައި ސިޒޭރިއަން ހެދި އަންހެނެއްގެ ބަނޑުން މިފަހުން ވަނީ ފޮތިގަނޑެއްވެސް ނަގައިފަ އެވެ. ފޮތިގަނޑު ނެގީ ބަނޑުގައި ރިއްސާތީ އައިޖީއެމްއެޗްއަށް ދެއްކުމުން ކުރި އޮޕަރޭޝަނަކަށް ފަހުގަ އެވެ.
ފުވައްމުލަކު ކައުންސިލުން ނެރުނު ބަޔާނެއްގައި ބުނީ އެ ހޮސްޕިޓަލުގައި މަސައްކަތްކުރާ އަންހެނުންގެ ހާއްސަ ޑޮކްޓަރުގެ ފަރާތުން މާބަނޑުމީހުންނާއި ދަރިންގެ ފުރާނަޔަށް ގެއްލުންވާފަދަ ބައެއް ހާދިސާތައް ހިގަމުންދާކަމުގެ ޝަކުވާ ކައުންސިލަށް ލިބުމާ ގުޅިގެން އެ ހޮސްޕިޓަލްގެ މެނޭޖުމެންޓާ ބައްދަލު ކޮށްފައިވާ ކަމަށެވެ.
އެ ޑޮކްޓަރާ ގުޅޭ ގޮތުން ދެކެވެމުންދާ ވާހަކަތަކަކީ ކަންބޮޑުވާންޖެހޭ ވަރުގެ ވާހަކަތަކެއް ކަމާއި، އަދި ފާއިތުވި ދެމަސްދުވަހުގެ ތެރޭ ކުރި ސިޒޭރިއަން އޮޕްރޭޝަންތަކުގެ ތެރެއިން ތިން ކޭސްއެއްގައި މައްސަލަތައް ދިމާވެ ބަލިމީހާ މާލެ ފޮނުވަން ޖެހުނު ކަމަށް ބަޔާނުގައިވެ އެވެ.
މިހާރު ހުރި ޑޮކްޓަރު ސަސްޕެންޑް ކުރުމުގެ އިތުރުން އޭނާގެ ބަދަލުގައި އަންހެނުންގެ ބަލިތަކަށް ހާއްސަ އެހެން ޑޮކްޓަރެއް ހަމަޖައްސައި ދިނުމަށް ވެސް ހެލްތު މިނިސްޓްރީގައި އެ ކަައުންސިލުން ވަނީ އެދިފަ އެވެ.
"މިކަންވަނީ ރައީސުލްޖުމްހޫރިއްޔާގެ ސަމާލުކަމަށްވެސް ގެނެވިފައެވެ. އަދި މިކަން ހައްލުކޮށްދެއްވާނެކަމުގެ ޔަގީންކަން ހެލްތް މިނިސްޓަރާއި ދިވެހިރާއްޖޭގެ ނައިބް ރައީސް އަދި ހޮސްޕިޓަލްގެ މެނޭޖްމެންޓްގެ ފަރާތުން ލިބިފައިވާކަން މިފުރުސަތުގައި ދަންނަވަމެވެ." ބަޔާނުގައިވެ އެވެ.
ބަޔާނުގައި ބުނެފައިވަނީ އެފަދަ މައްސަލަތައް ހައްލުކޮށް ސިއްހީ އެންމެ ރަނގަޅު ފަރުވާ އެ ސިޓީ ލިބޭނެ ގޮތް ހެދުމަށް މަސައްކަތް ކުރަމުން އަންނަ ކަމަށެވެ.
