މާލޭ ލޭންޑް ޔޫސް ޕްލޭން އެކުލަވާލަން އަންނަ އަންގާރަ ދުވަހުގެ ރޭ އޮންލައިންކޮށް ބާއްވާ ބައްދަލުވުމުގައި މާލޭގެ ރައްޔިތުން ބައިވެރިވެ ސިޓީ ކައުންސިލަށް ހިޔާލާއި މަޝްވަރާ ހުށަހަޅަން އެމްޑީޕީން މިރޭ އެދިއްޖެ އެވެ.
މާލެ ސިޓީ ކައުންސިލްގައި ހިމެނިވަޑައިގަންނަވާ އެމްޑީޕީގެ ކައުންސިލަރުން ނެރުނު ބަޔާނެއްގައި ބުނީ ލާމަރުކަޒީ ގާނޫނަށް އެމްޑީޕީން ބޭނުންވާ އިސްލާހުތައް ގެނެސް ކައުންސިލްތަކަށް ބާރުވެރިކަން ދީފައިވާ ކަމަށެވެ. އެ ބާރުވެރިކަމާ އެކު މާލޭ ސިޓީ ކައުންސިލް ހިންގުމުގައި ރައްޔިތުންނަށް ފައިދާވާ ކޮންމެ ކަމެއްގައި މޭޔަރު ޑރ. މުހައްމަދު މުއިއްޒަށް އެމްޑީޕީގެ ކައުންސިލަރުން ފުރިހަމަ އެއްބާރުލުން ދޭނެ ކަމުގެ ޔަގީންކަން ދިނެވެ.
ކައުންސިލްތައް އުފެދުނު ފަހުން ފުރަތަމަ ފަހަރަށް މާލޭގެ މެޖޯރިޓީ އެމްޑީޕީއަށް ގެއްލި މޭޔަރުގެ މަގާމާ އެކު ކައުންސިލްގެ 11 ގޮނޑި ކާމިޔާބުކުރީ ޕީޕީއެމުންނެވެ. އެމްޑީޕީއަށް ލިބުނީ ހަ ގޮނޑި އެވެ.
"ޕީޕީއެމްގެ މޭޔަރަކު ހުންނެވިކަމަށްޓަކައި އަދި އޭނާ ހުށަހެޅުއްވި ކަމެއް ވީމާ ދެކޮޅު ހެދުމުގެ އިދިކީލި ސިފައިން އަޅުގަނޑުމެން ނެއްޓި ތިބޭނެކަމުގެ ޔަގީންކަން ވެސް އަރުވަމެވެ،" ލޭންޑް ޔޫސް ޕްލޭނާ ގުޅޭ ބަޔާނުގައިވެ އެވެ.
ކައުންސިލަރުން ވިދާޅުވީ މާލޭގެ ރައްޔިތުންގެ މަސްލަހަތުތަކުގެ މައްޗަށް ހުޝިޔާރުކަމާ އެކު ފާރަވެރިވަމުން ދާނެ ކަމަށެވެ. އަދި ކައުންސިލް ހިނގާ ނުހިނގާ ގޮތާއި ގުޅޭގޮތުން ރައްޔިތުންނަށް މައުލޫމާތު ދޭނެ ކަމަށް ވެސް ވިދާޅުވި އެވެ.
ލާމަރުކަޒީ ގާނޫނުގެ 41 ވަނަ މާއްދާގައިވާ ވާގޮތުގެ މަތިން މާލޭގެ ލޭންޑް ޔޫސް ޕްލޭން އެކުލެވުމުގެ ބޮޑު މަސައްކަތް ފަށައި ހިޔާލު ހޯދުމުގެ ބައްދަލުވުމެއް އަންގާރަ ދުވަހުގެ ރޭ 8:30ގައި ބާއްވާ ގޮތަށް ވަނީ ހަމަޖައްސައިފަ އެވެ.
އެމްޑީޕީން އެދެނީ މި ބައްދަލުވުމުގައި މާލޭގެ ރައްޔިތުންގެ ތެރެއިން ވީހާވެސް ގިނަ ބަޔަކު ބައިވެރިވުމަށެވެ. އެއީ، މާލެ ހިތްގައިމު، ރައްކާތެރި އަދި އަމާން ސިޓީއަކަށް ބަދަލުކުރުމުގެ މަސައްކަތް ހިނގަންވީ ގޮތުގެ މައްޗަށް ހިޔާލާއި މަޝްވަރާ ދޭން ކަމަށް ވެސް ބަޔާނުގައިވެ އެވެ.
"ބޯހިޔާވަހިކަމާއި ތޮއްޖެހުން ހިމެނޭގޮތުން މާލޭގެ މަގުތަކާއި އާއްމު ޖާގަތަކާއި މުނިސިޕަލް ހިދުމަތްތައް ފޯރުކޮށްދިނުމުގައި ހުރި މައްސަލަތައް ހައްލުކޮށް، ކަންބޮޑުވުންތައް ފިލުވުމުގައި މުރާލިކަމާއި ފަރުވާތެރިކަމާ އެކު އަޅުގަނޑުމެން ދެމި ތިބޭނަމެވެ،" ބަޔާނުގައިވެ އެވެ.
ލޭންޑް ޔޫސް ޕްލޭން އެކުލަވާލަން ގާނޫނުގައި ކަނޑައަޅާފައި ވަނީ ކައުންސިލްގެ މަސައްކަތް ފަށާތާ ތިން މަސް ދުވަހުގެ ތެރޭގަ އެވެ. މާލޭ ސިޓީ ކައުންސިލްގެ ލޭންޑް ޔޫސް ޕްލޭނަށް ހިޔާލު ހޯދުމުގެ ބައްދަލުވުން ކުރިއަށް ގެންދަން ރާވާފައި އޮތީ ހައުސިން އެންޑް ޕްލޭނިން މިނިސްޓްރީއާ އެކުގަ އެވެ.
