މާލޭ ސިޓީ ކައުންސިލްގެ ބައްދަލުވުންތައް އާންމުކޮށް ހުޅުވާލުމަށާއި ލައިވް ކުރުމަށް ހުށަހެޅި ހުށަހެޅުން ފާސްނުކުރަން އެ ކައުންސިލުން ނިންމައިފި އެވެ.
ކައުންސިލްގެ ބައްދަލުވުންތައް ކުރިއަށްދާ ވަގުތު ޖާގަ އޮތް މިންވަރަކުން އާންމުންނަށް ހުޅުވާލުމަށާއި ސޯޝަލް މީޑިއާ މެދުވެރިކޮަށް ބައްދަލުވުންތައް ލައިވްކުރުމަށް ހުށަހެޅީ އެ ކައުންސިލްގައި ތިއްބަވާ އެމްޑީޕީގެ މެންބަރުންގެ ފަރާތުންނެވެ.
މީގެކުރީގެ މާލޭ ސިޓީ ކައުންސިލުން ވެސް ބައްދަލުވުންތައް ލައިވްކޮށްގެން ކުރިއަށް ގެންދިޔަ އެވެ. އޭރު ކައުންސިލުގައި އޮތީ އެމްޑީޕީގެ މެޖޯރިޓީ އެވެ.
އާ ކައުންސިލްގެ މެޖޯރިޓީ ޕީޕީއެމްއަށް އޮތްއިރު، ހުވާ ކުރެއްވުމަށްފަހު ފުރަތަމަ ބޭއްވި ނޫސްވެރިންގެ ބައްދަލުވުމުގައި އާ މޭޔަރު ޑރ. މުހައްމަދު މުއިއްޒު ވެސް ވަނީ ކައުންސިލްގެ ބައްދަލުވުންތައް ވީހާވެސް ބޮޑަށް އާންމުންނާ ކައިރިން ބާއްވާނެ ކަމަށް ވިދާޅުވެފަ އެވެ.
އެގޮތުން ބައްދަލުވުންތައް ލައިވްކޮށް ކުރިއަށް ގެންދަވާނެ ކަމުގެ އިޝާރާތެއް ދެއްވި އެވެ.
ނަމަވެސް، އެމްޑީޕީގެ މެންބަރުން އެންމެފަހުން ބޭއްވި ކައުންސިލްގެ ބައްދަލުވުމަށް އެކަން ކުރުމަށް ހުށަހެޅުމުން، ޕީޕީއެމްއަށް ނިސްބަތްވާ މެންބަރުންގެ ވޯޓާއެކު ހުށަހެޅުން ވަނީ ބޭރުކޮށްލާފަ އެވެ.
އެ ހުށަހެޅުމުގެ އިތުރުން ޖަލްސާތަކުގެ އޯޑިއޯ ރެކޯޑިންގް ނަގާ، ބެލެހެއްޓުމަށް ހުށަހެޅި ހުށަހެޅުން ވެސް ފާހެއް ނުވި އެވެ. އަދި، ކައުންސިލް މެންބަރުންގެ މާލީ ބަޔާން ހާމަކުރުމަށާއި މަސްލަހަތު ފުށުއަރާ ހާލަތްތައް ބަޔާންކުރުމަށް ވެސް ފާހެއް ނުވި އެވެ.
އޭގެއިތުރުން، އަމިއްލަ ފަރާތްތަކުން ކައުންސިލްގެ ޖަލްސާއަށް ސީދާ ހުށަހަޅާ މައްސަލަ ހުށަހަޅާނެ ނިޒާމެއް ގާއިމުކުރާންޖެހޭނެ ކަމަށް ގަވާއިދުގައި ލިޔުމަށް ހުށަހެޅި ހުށަހެޅުން ވެސް ފާހެއް ނުވި އެވެ.
ކައުންސިލްގެ އެ ބައްދަލުވުމުގައި އެންމެ މުހިންމު ކަމެއްގެ ގޮތުގައި ފާސްކޮށްފައިވަނީ މާލޭގެ ރައްޔިތުން ދަތުރުދާނެ ރަށެއްގެ ގޮތުގައި ހުޅުމާލޭ ދެވަނަ ފިޔަވަހީގެ ތެރޭގައި އޮތް ފަރުކޮޅުފުށި ޕޮކްނިކް އައިލެންޑެއްގެ ގޮތުގައި ހަމަޖެއްސުމެވެ.
ނަމަވެސް، ކައުންސިލްގެ އެ ނިންމުމަކީ ސަރުކާރާއި އެޗްޑީސީއާ އެއްވެސް ވަރަކަށް މަޝްވަރާ ކުރުމެއް ނެތި ނިންމާފައިވާ ނިންމުމެއް ކަމަށް ވިދާޅުވެ، ރައީސް އިބްރާހިމް މުހައްމަދު ސޯލިހު ވަނީ ކަންބޮޑުވުން ފާޅު ކުރައްވާފަ އެވެ.
