ހުޅުމާލެ މެޑިކަލް ފެސިލިޓީގައި ބަލި މީހުންނަށް އެކަށީގެންވާ ފަރުވާ އާއި ކެއުން ފޯރުކޮށްދިނުމުގައި ގޮންޖެހުންތަކެއް ކުރިމަތިވަމުންދާ ކަަމަށާއި އެ މީހުންގެ ކަންކަން ބަލަހައްޓަމުން އަންނަ ސިއްހީ ހިދުމަތްތެރިންނަށް ދިމާާވާ ނަފްސާނީ އުނދަގޫތަކުގައި ވެސް މިހާތަނަށް އެކަށީގެންވާ ހައްލެއް ހޯދިފައި ނުވާ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން މިއަދު ކަންބޮޑުވުންފާޅުކޮށްފި އެވެ.
ކޮވިޑުގައި ބޮޑުވަރުވާ މީހުން ފަރުވާއަށް އެޑްމިޓްކުރަނީ ހުޅުމާލެ މެޑިކަލް ފެސިލިޓީގަ އެވެ. ކޮވިޑުގެ އެންމެ ގޯސް ހާލަތުގައި ރާއްޖެ އޮތްއިރު ކޮންމެ ދުވަހަކު ބައްޔަށް ޕޮޒިޓިވްވާ ގިނަ ބަޔަކު ފަރުވާ އަށް ގެންދަނީ ވެސް އެތަނަށެވެ. އެހެންވެ ޖާގަ ފުލްވެ، ބަލި މީހުންނާ އެކަށީގެންވާ ވަރަށް ސިއްހީ ހިދުމަތްތެރިން ނެތުމުން ގިނަ މައްސަލަތަކެއް ވަނީ ފެންމަތިވެފަ އެވެ.
އެތަނުގައި ދިމާވާ ކަންކަމުގެ ޝަކުވާތައް އާއިލާތަކުން ކޮންމެ ދުވަހަކު ކުރެ އެވެ. އެ ޝަކުވާތަކާ ގުޅިގެން އެޗްއާރުސީއެމްގެ ޓީމަކުން ވަނީ ފެސިލިޓީގެ ހާލަތު ބަލައިފަ އެވެ.
އެޗްއާރުސީއެމުން ނެރުނު ބަޔާނުގައި ވެސް އެންމެ ބޮޑު ކަންބޮޑުވުމެއްގެ ގޮތުގައި ފާހަގަކޮށްފައި ވަނީ ހުޅުމާލެ ފެސިލިޓީގައި ނަރުހުންނާއި ސިއްހީ ހިދުމަތްތެރިން މަދުވުމެވެ. އެހެންވެ، އެކަށީގެންވާ ފަރުވާ ބަލި މީހުންނަށް ދިނުމުގައި ދަތިތަކަކާ ކުރިމަތިވަމުންދާ ކަމަށް ބަޔާނުގައި ބުންޏެވެ.
ކޮންމެ ދުވަހަކު ވެސް އެތައް ބަޔަކު އެ ފެސިލިޓީގައި އެޑްމިޓްކުރަން ނަރުހުންނަށް ޖެހޭ އިރު އެ މީހުންނާ ގުޅޭ މައުލޫމާތު އާއިލާތަކުން ބޭނުންވާ އެންމެ އަވަހަށް ފޯރުކޮށްދިނުމުގައި ލަސްތަކެއް ކުރިމަތިވަމުންދާކަން އެޗްއާރުސީއެމްގެ ބަޔާނުގައި ފާހަގަކޮށްފައިވެ އެވެ.
އެޑްމިޓްކުރާ ބަލި މީހުންނަށް އާއިލާތަކުން ފޮނުވާ ކާއެއްޗިއްސާއި ސަމާނާ ހަވާލުވާން ވަކި ގަޑިތަކެއް ފެސިލިޓީގައި ވަނީ ކަނޑައަޅައިފަ އެވެ. އެ ތަކެއްޗާ ހަވާލުވެ ވޯޑަށް ގެންދިޔަ ނަމަވެސް ބަލި މީހާއާ ހަމައަށް ފޯރުކޮށްދެވޭލެއް ލަސްކަމަށް އެޗްއާރުސީއެމުން ބުންޏެވެ.
ފެސިލިޓީގައި ތިބި ބަލި މީހުންގެ ހާލަތަށް ބަލައި އެ މީހެއްގެ ބައްޔާ ގުޅޭ ގޮތުން ކެއުން ފޯރުކޮށްދެ އެވެ. އެހެން ވިޔަސް އެތަނުން ފޯރުކޮށްދޭ ކެއުމަކީ، އެޗްއާރުސީއެމުން ބުނިގޮތުގައި، ބަލި މީހުންގެ ހާލަތަށް ރިއާޔަތްކުރާއިރު އެންމެ އެކަށީގެންވާ ކެއުމެއް ނޫނެވެ.
ކޮމިޝަނުން ބުނީ ކޮވިޑު ބަލީގައި އެޑްމިޓްކުރާ މީހުންނަށް، އެ ބަލީގެ އިތުރުން ވެސް އެހެން އުނދަގޫތަކަކާ ކުރިމަތިލާން ޖެހޭ ކަމަށް ބަލި މީހުންގެ ފަރާތުން ލިބުނު މައުލޫމާތުން އެނގޭ ކަމަށެވެ.
އަމިއްލައަށް ނޫޅެވޭވަރުގެ ބަލި މީހުންގެ އެހީތެރިން ވެސް ފެސިލިޓީގައި ތިބެ އެވެ. މިއީ ތަނުގެ ޖާގައަށް ވުރެން އިތުރަށް މީހުން ތިބުން ކަމަށާއި ނަތީޖާއަކީ އެޗްޕީއޭ އިން މި ބައްޔާ ގުޅޭ ގޮތުން ކަނޑައަޅާފައިވާ ގައިޑްލައިނާ އެއްގޮތަށް އެތަނުގެ ކަންކަން ނުހިނގުން ކަމުގެ ކަންބޮޑުވުން ވެސް އެޗްއާރުސީއެމުން ފާޅުކޮށްފައިވެ އެވެ.
އެޗްއާރުސީއެމުން ބުނިގޮތުގައި ފެސިލިޓީގައި މަަސައްކަތްކުރާ މުވައްޒަފުންނަށް ނަފްސާނީ ގޮތުން އެތައް ކަމަކާ ކުރިމަތިލާން ޖެހޭއިރު، އެ އެހީތެރިކަން ފޯރުކޮށެއް ނުދެވެ އެވެ.
"އެ އެހީތެރިކަން އެ މުވައްޒަފުންނަށް ފޯރުކޮށްދިނުމަކީ މި ކޮމިޝަނުން ބާރު އަޅާ ކަމެކެވެ،" ބަޔާނުގައިވެ އެވެ.
ކޮމިޝަނުން ބުނީ ފެސިލިޓީ ސާފުކުރުމުގެ މަސައްކަތަށް ފޮނުވާފައި ތިބޭ އެއްވެސް މުވައްޒަފަކަށް ބަންދެއް ނުލިބި 12 ގަޑިއިރު މަސައްކަތް ކުރުވާ ކަަމަށެވެ. މިގޮތަށް އަމަލުކުރާއިރު އެ މުވައްޒަފުންނަށް މުސާރަ ނުދިނުމުގެ މައްސަލަތަކެއް ކުރިމަތިވެފައިވާ ކަމަށް އެޗްއާރުސީއެމުން ބުންޏެވެ.
އެޗްއާރުސީއެމުން ބުނިގޮތުގައި ފެސިލިޓީއަށް ކުރި ޒިޔާރަތުގައި ފާހަގަކުރެވުނު ކަންކަމުގެ ތެރެއިން ބައެއް ކަންކަން ވަކި މައްސަލަތަކުގެ ގޮތުގައި ލޮޖްކޮށް އަންނަނީ ބަލަމުންނެވެ.
