ހުޅުމާލޭ ދެވަނަ ފިޔަވަހީގައި އަޅާފައިވާ ހިޔާ ފްލެޓްތަކަށް ޑައުންޕޭމަންޓް ދައްކަން ނުޖެހޭނެ ކަމަށް އެޗްޑީސީން މިރޭ ބުނެފި އެވެ.
ހިޔާ ފުލެޓުތަކަށް ފައިސާ ދައްކާ ހަލާސްކުރުމަށް ހަމަޖެހިފައިވަނީ 25 އަހަރުގެ މުއްދަތަށް ބަހާލައިގެން، އިންސްޓޯލްމަންޓުގެ ގޮތުގައި މަހަކު 7،500ރ ދައްކާ ގޮތަށެވެ. އަދި ފުލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު 1,000ރ. ނަގާ ގޮތަށް ވެސް ވަނީ ހަމަޖެހިފަ އެވެ. ފުލެޓު އެއްބަސްވުމުގައި ސޮއިކުރާ ތާރީހުން ފެށިގެން ތިން މަސްދުވަހުގެ މުއްދަތަކީ އެއްވެސް ފައިސާއެއް ދައްކަން ނުޖެހޭ މުއްދަތެއްގެ ގޮތުގައި ސަރުކާރުން ވަނީ ކަނޑައަޅާފަ އެވެ.
ހައުސިން މިނިސްޓަރު މުހައްމަދު އަސްލަމް ކުރިން ވިދާޅުވެފައިވާ ގޮތުގައި ހިޔާގެ ކުލި 7،500ރ. އަށް ވުރެން ބޮޑެއް ނުވާނެ އެވެ. ޑައުންޕޭމަންޓް ދެއްކުން އޮޕްޝަނެއްގެ ގޮތުގައި ހުޅުވާލާނެ ކަމަށާއި އޭރަށް މަހު ކުލި ދައްކަން ޖެހޭ މިންވަރު ކުޑަވާނެ ކަމަށް ވެސް ވިދާޅުވި އެވެ.
އެޗްޑީސީން މިރޭ ނެރުނު އިއުލާނެއްގައި ބުނި ގޮތުގައި، ފުލެޓުތަކުގެ ޑައުންޕޭމަންޓުގެ ގޮތުގައި އެއްވެސް ފައިސާއެއް ނެގުމަށް މިހަރު ނިންމާފައިވާ ކަމަށެވެ.
ނަމަވެސް، ޑައުންޕޭމަންޓުގެ ގޮތުގައި ފައިސާ ދައްކަން އެއްވެސް މީހަކު ބޭނުންވާނަމަ އެ މީހަކަށް އެ އިންތިޒާމު ހަމަޖައްސައިދެވޭނެ ކަމަށް އެޗްޑީސީން ބުންޏެވެ.
އަދި، ޑައުންޕޭމަންޓުގެ ގޮތުގައި ދައްކާ ފައިސާ ފުލެޓުގެ ޖުމްލަ އަގުން އުނިކޮށް، މަހު ކުލި އަގާއި އެއްގޮތަށް ކުޑަކުރެވޭނެ ކަމަށް އެޗްޑީސީން ބުނެ އެވެ. ފުލެޓަށް ފައިސާ ދައްކަން ކަނޑައެޅިފައިވާ މުއްދަތު ކުޑަކުރަން ބޭނުންވާ މީހުންނަށް އެ ފުރުސަތު ވެސް ދޭނެ ކަމަށް އެޗްޑީސީން ބުންޏެވެ.
އެޗްޑީސީން ލަފާކުރަނީ ހިޔާ ފްލެޓްތަކަށް ގާތްގަނޑަކަށް 35,000 މީހުން ވަންނާނެ ކަމަށެވެ. އެއީ ކޮންމެ ޓަވަރެއްގައި 2,000 މީހުން ދިރިއުޅޭނެ ކަމަށް ބަލައިގެންނެވެ.
ކުރީގެ ރައީސް އަބްދުﷲ ޔާމީންގެ އެޅުއްވި ހިޔާ ފްލެޓްތަކަށް ދިރިއުޅުން ބަދަލުކޮށް ދެ ވަނަ ފިޔަވަހީގައި އާބާދުވާ މީހުންނާ އެކު ހުޅުމާލޭގެ ޖުމްލަ އާބާދީ މި އަހަރު 100,000 އަށް ވުރެން މަތިވާނެ ކަމަށް ލަފާކުރެވެ އެވެ.
