ރާއްޖޭގައި މިހާތަނަށް ހިންގި ބޯހިޔާވަހިކަމުގެ އެންމެ ބޮޑު މަޝްރޫއުގެ ދަށުން އަޅާފައިވާ ހިޔާ ފްލެޓްތަކަށް، އަންނަ މަހުގެ މެދުތެރޭގައި ވަދެވޭނެ ކަމަށް، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ބުނެފި އެވެ.
ކުރީގެ ސަރުކާރުގައި ފެށި ހިޔާ މަޝްރޫއުގެ 16 ޓަވަރުގައި 6,720 ފްލެޓް އަޅާފައިވާއިރު އެ ފްލެޓްތަކަށް ވަދެވޭނެ ކަމަށް އެންމެ ފުރަތަމަ ބުނީ މިދިޔަ އަހަރު ކުރީކޮޅުގަ އެވެ. ނަމަވެސް ތަފާތު އެކި ސަބަބުތަކާ ހުރެ ފްލެޓްތައް ހަވާލު ނުކޮށް ވަނީ ލަސްވެފަ އެވެ.
އެޗްޑީސީގެ މެނޭޖިން ޑިރެކްޓަރު އަހްމަދު ސުހެއިލް "އަދަދު"އަށް ވިދާޅުވީ އެންމެ ފަހުން ނިންމާފައިވާ ގޮތަށް އަންނަ މަހުގެ ތެރޭގައި ހިޔާ ފްލެޓްތަކަށް މީހުންނަށް ވަދެވޭނެ ކަމަށެވެ.
ފްލެޓްތަކުގެ ފިނިޝިން މަސައްކަތް މިހާރު ކުރިއަށް ދާއިރު ޕްލޭން ކޮށްފައިވާ ގޮތަށް މަސައްކަތްތައް ކުރިއަށް ދާ ކަމަށް ވެސް ސުހައިލް ވިދާޅުވި އެވެ.
ލިބޭނެ ފްލެޓް ކަނޑައެޅުމަށް ގިނަ ފްލެޓްތަކެއްގެ ގުރުއަތުލުން ވަނީ ބާއްވައިފަ އެވެ. ނަމަވެސް ގުރުއަތުލުން އެއްކޮށް ނުނިމެނީސް ކޮވިޑްގެ ސަބަބުން ވަނީ އެކަން މެދުކަނޑާލައިފަ އެވެ.
ސުހެއިލް ވިދާޅުވީ ފައިނަލް ލިސްޓް ޕްލޭނިން މިނިސްޓްރީން ފޮނުވާފައިވާ ކަމަށާއި ކޮވިޑުގެ ކަންކަން ހަމަޖެހުނުހާ އަވަހަކަށް އަލުން ގުރުއަތުލުން ނަގަން ފަށާނެ އެވެ.
ޔެސް ޓީވީ މެދުވެރިކޮށް ގުރުއަތު ނަގާއިރު އެ މީހަކަށް ފްލެޓް ލިބޭ ފްލޯ އާއި ޓަވަރު އެނގޭ ގޮތަށް ޓީވީ ސްކްރީނުން ދައްކަ އެވެ. އަދި އެސްއެމްއެސް މެދުވެރިކޮށް ފްލެޓްގެ ވެރި ފަރާތަށް އެ މައުލޫމާތު ދެ އެވެ.
ހައުސިން މިނިސްޓަރު މުހައްމަދު އަސްލަމް ވިދާޅުވެފައިވާ ގޮތުގައި ހިޔާގެ ކުލި 7،500ރ. އަށް ވުރެން ބޮޑެއް ނުވާނެ އެވެ. ޑައުންޕޭމަންޓް ދެއްކުން އޮޕްޝަނެއްގެ ގޮތުގައި ހުޅުވާލާނެ ކަމަށާއި އޭރަށް މަހު ކުލި ދައްކަން ޖެހޭ މިންވަރު ކުޑަވާނެ ކަމަށް ވެސް ވިދާޅުވި އެވެ.
އެޗްޑީސީން ލަފާކުރަނީ ހިޔާ ފްލެޓްތަކަށް ގާތްގަނޑަކަށް 35,000 މީހުން ވަންނާނެ ކަމަށެވެ. އެއީ ކޮންމެ ޓަވަރެއްގައި 2,000 މީހުން ދިރިއުޅޭނެ ކަމަށް ބަލައިގެންނެވެ. ހިޔާއަށް ދިރިއުޅުން ބަދަލުކޮށް ދެ ވަނަ ފިޔަވަހީގައި އާބާދުވާ މީހުންނާ އެކު ހުޅުމާލޭގެ ޖުމްލަ އާބާދީ މި އަހަރު 100,000 އަށް ވުރެން މަތިވާނެ އެވެ.
