ލިވަޕޫލް (އޭޕްރީލް 17) - އިނގިރޭސި ޕްރިމިއާ ލީގުގައި މިރޭ އެވަޓަން ދަނޑުގައި 2-2 އިން އެއްވަރުވެ, ގަދަ ހަތަރެއްގެ ރޭހުގައި ޓޮޓެންހަމް ހޮޓްސްޕާސް އަށް އިތުރު އުނދަގޫތަކެއް ކުރިމަތިވެއްޖެ އެވެ.
މި މެޗުން ލިބުނު ޕޮއިންޓާ އެކު ޓޮޓެންހަމް އޮތީ ލީގުގެ ހަތް ވަނައިގައި 32 މެޗުން 50 ޕޮއިންޓާ އެކު އެވެ. އެވަޓަން ލީގުގެ އަށް ވަނައިގައި އޮތީ 31 މެޗުން 49 ޕޮއިންޓް ހޯދައިގެންނެވެ. ހަތަރު ވަނައިގައި އޮތް ވެސްޓް ހޭމް އަށް ލިބިފައިވަނީ 31 މެޗުން 55 ޕޮއިންޓެވެ.
އެވަޓަންގެ ގުޑިސަން ޕާކުގައި މިރޭ ކުޅުނު މެޗުގެ 27 ވަނަ މިނިޓްގައި އެވަޓަންގެ ޑިފެންޑަރުންނަށް ހެދުނު ގޯހެއްގެ ފައިދާނަގައި ހެރީ ކޭން ވަނީ ލަނޑެއް ޖަހައި ޓޮޓެންހަމަށް ލީޑުނަގައިދީފަ އެވެ. ޓޮޓެންހަމަށް ލީޑު ހިފަހައްޓައިލެވުނީ ހަތަރު މިނިޓް ވަންދެނެވެ. މެޗުގެ 31 ވަނަ މިނިޓްގައި ޕެނަލްޓީ އަކުން އައިސްލެންޑްގެ މިޑްފީލްޑަރު ގިލްފީ ސިގަޑްސަން ވަނީ އެވަޓަން އަށް އެއްވަރުކޮށްދީފަ އެވެ. މިއީ ސާޖް ރެގީލޯން އޭރިއާތެރެއިން ހަމޭސް ރޮޑްރިގޭޒަށް ކުރި ފައުލަކަށް ރެފްރީ ދިން ޕެނަލްޓީއެކެވެ.
މެޗުގެ 62 ވަނަ މިނިޓްގައި ސީމަސް ކޯލްމަން ދިން ބޯޅައަކުން އެވަޓަން އިން ލީޑުނެގި ގޯލު ޖެހީ ވެސް ކުރިން ޓޮޓެންހަމަށް ކުޅުނު ސިގަޑްސަން އެވެ. މި ފަހަރު އެވަޓަން އަށް ވެސް މާ ގިނައިރު ވަންދެން ލީޑު ހިފަހައްޓައިނުލެވުނެވެ. މެޗުގެ 68 ވަަނަ މިނިޓްގައި އެވަޓަންގެ ދެ ޑިފެންޑަރުން ކަމަށްވާ މައިކަލް ކީން އާއި މޭސަން ހޯލްގޭޓް ހެދި ގޯހެއްގެ ފައިދާނަގައި ކޭން ވަނީ ޓޮޓެންހަމަށް ދެ ވަނަ ލަނޑެއް ޖަހައިދީ ނަތީޖާ ހަމަހަމަކޮށްފަ އެވެ. މި ދެ ގޯލާ އެކު ކޭން ލީގުގެ ލަނޑު ލިސްޓުގެ ކުރީގައި އޮތީ 21 ގޯލާ އެކު އެވެ.
އެވަަޓަން މޮޅުކޮށްދޭން ޖޯޝުއާ ކިންގް ޖެހި ބޯޅަ ޓޮޓެންހަމްގެ ކީޕަރު ހޫގޯ ލޮރިސް ވަނީ މަތަކޮށްފަ އެވެ. ފަހުން ލަނޑު ޖަހަން އެވަޓަންގެ ރިޗާލިސަން އަށް ލިބުނު ރިބައުންސް ބޯޅައިގެ ވެސް ބޭނުމެއް ނުހިފުނެވެ.
މެޗުން ދެ ޕޮއިންޓް ގެއްލުމުގެ އިތުރުން ދެން ޓޮޓެންހަމަށް ކުރިމަތިވި މާޔޫސްކަމަކީ އިތުރު ވަގުތުގައި އެ ޓީމުގެ ތަރި ކޭން އަށް އަނިޔާވުމެވެ. އަންނަ ހަފްތާގައި ލީގު ކަޕް ފައިނަލުގައި މެންޗެސްޓާ ސިޓީއާ ދެކޮޅަށް ކުޅޭ މެޗުގެ ކުރިން ކޭން އަށް އަނިޔާވެއްޖެނަމަ އެއީ އެ ޓީމަށް ލިބޭނެ ބޮޑު ދެރަ އެކެވެ.
ޓޮޓެންހަމްގެ ކޯޗު ހޯސޭ މޮރީނިއޯ ބުނީ ކޭން އަށް ލިބުނު އަނިޔާއާ ބެހޭ ތަފްސީލީ ވާހަކަތަކެއް ދައްކަން އަދި ތަންކޮޅެއް އަވަސްކަމަށެވެ. އަދި އޭނާ އުއްމީދުކުރަނީ ލަސްނުވެ ކޭން އަށް ކުޅުމަށް އެނބުރި އާދެވޭނެ ކަމަށެވެ.
އެވަޓަންގެ ކޯޗު ކާލޯ އަންޗެލޮޓީ ބުނީ ލީގުގެ ހަތަރު ވަނައިގައި ނިންމަން ބަލާއިރު އޭނާގެ ޓީމަށް މި މެޗުން ތިން ޕޮއިންޓް ހޯދުން ވަރަށް މުހިއްމު ކަމަށާއި ގަދަ ހަތަރެއްގެ ރޭހުގެ ވާދަވެރިކަން އޮތްގޮތުން މި މެޗުން މޮޅެއް ނުލިބުމުން އެ ޓީމަށް ވެސް ވަރަށް އުނދަގޫ ހާލަތެއް ކުރިމަތިވެފައިވާ ކަމަށެވެ.
