މެންޗެސްޓާ (އޭޕްރީލް 16) - ޔުއެފާ ޔޫރޮޕާ ލީގުގެ ކުއާޓާ ފައިނަލުގެ ދެ ވަނަ ލެގުގައި މިރޭ ކުޅުނު މެޗުތަކުން މޮޅުވެ، އާސެނަލް އާއި މެންޗެސްޓާ ޔުނައިޓެޑް މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.
ފުރަތަމަ ލެގުގައި އަމިއްލަ ދަނޑުގައި ޗެކް ރިޕަބްލިކްގެ ސްލަވިއާ ޕްރާގާ ދެކޮޅަށް މިދިޔަ ހަފްތާގައި އާސެނަލް ވަނީ އަމިއްލަ ދަނޑުގައި 1-1 އިން އެއްވަރުވެފަ އެވެ. މިރޭ އާސެނަލުން ވަނީ ސްލަވިއާ ދަނޑުގައި 4-0 އިން މޮޅުވެ، އެގްރިގޭޓުން 5-1 އިން ކުރިހޯދައިފަ އެވެ. ޔުނައިޓެޑުން މިރޭ އަމިއްލަ ދަނޑުގައި ކުޅުނު ދެ ވަނަ ލެގުން ވެސް ވަނީ ގްރަނާޑާގެ މައްޗަށް 2-0 އިން ކުރިހޯދައިފަ އެވެ. އެގްރިގޭޓަށް ބަލާއިރު ޔުނައިޓެޑަށް ކުރި ލިބުނީ 4-0 އިންނެވެ.
ސެމީ ފައިނަލުގައި ޔުނައިޓެޑް ނުކުންނާނީ އިޓަލީގެ ރޯމާއާ ދެކޮޅަށެވެ. ރޯމާ ސެމީން ފުރުސަތު ހޯދީ މިރޭ އަޔަކްސްއާ 1-1 އިން އެއްވަރުވި ނަމަވެސް އެގްރިގޭޓަށް ބަލާއިރު 3-2 އިން ކުރިހޯދައިގެންނެވެ.
އާސެނަލުން ސެމީގައި ބައްދަލުކުރާނީ ވިޔަރެއާލްއާ އެވެ. އާސެނަލް ގޮވައިގެން 2019 ވަނަ އަހަރުގެ ޔޫރޮޕާ ލީގުގެ ފައިނަލުން ބަލިވި އުނާއި އެމެރީ ކޯޗުކޮށްދޭ ވިޔަރެއާލް ސެމީން ފުރުސަތު ހޯދީ މިރޭ ކްރޮއޭޝިއާގެ ޑިނަމޯ ޒަގްރެބް އަތުން 2-1 އިން މޮޅުވެ، އެގްރިގޭޓަށް ބަލާއިރު 3-1 އިން ކުރިހޯދައިގެންނެވެ. އެމެރީ އަކީ ޔޫރޮޕާ ލީގުގެ ތާރީހުގައި އެންމެ ކާމިޔާބު އެއް ކޯޗެވެ.
ސެމީގެ މެޗުތައް ކުޅޭނީ މި މަހު 29 ވަނަ ދުވަހާއި އަންނަ މަހު ހަ ވަނަ ދުވަހު އެވެ.
ޔުނައިޓެޑުން މިރޭގެ މެޗު ފަށައިގެން ހަ ވަނަ މިނިޓްގައި އެޑިންސަން ކަވާނީގެ ގޯލުން ވަނީ ލީޑުނަގައިފަ އެވެ. މިއީ ޕައުލް ޕޮގްބާ ދިން ބޯޅައަކުން ކަވާނީ ޖެހި ގޯލެކެވެ. ޔުނައިޓެޑްގެ ދެ ވަނަ ގޯލަކީ މެޗުގެ އިތުރު ވަގުުތުގައި އެ ޓީމުގެ އަލެކްސް ޓެލޭސް ނެގި ހުރަހަކުން ގްރަނާޑާގެ ހެސޫސް ވައޭހޯ އަތުން ބައިކޮޅަށް ވަން ގޯލެކެވެ. ޔުނައިޓެޑް މިދިޔަ އަހަރުގެ ޔޫރޮޕާ ލީގުން ކެޓީ ސެމީ ފައިނަލްގައި ސެވިއްޔާ އަތުންނެވެ.
ރަށުންބޭރުގައި އާސެނަލުން ވަނީ މިރޭ ތަފާތު ކުޅުމެއް ދައްކައިފަ އެވެ. ފުރަތަަމަ ހާފުގައި އާސެނަލުން ތިން ގޯލުގެ ލީޑެއް ނެގި އެވެ. ނިކޮލަސް ޕެޕޭ އާއި އަލެކްސަންޑަ ލަކަޒޭޓް އަދި ބުކާޔޯ ސަކާގެ ގޯލުތަކާ އެކު ފުރަތަމަ ހާފު ނިންމާލިއިރު، އާސެނަލްގެ ފަހު ގޯލު ދެ ވަނަ ހާފުގައި ޖެހީ ލަކަޒޭޓް އެވެ.
އާސެނަލްގެ ކޯޗު މިކޭލް އާޓެޓާ ބުނީ މި މޮޅަކީ ހަގީގަތުގައި ސެމީ ފަައިނަލުގެ ޖާގައެއް ލިބުމަށް ވުރެ މި ސީޒަން އާސެނަލުން ވަރުގަދަކޮށް ނިންމާލަން ލިބިގެންދިޔަ ހިތްވަރެއް ކަމަށެވެ. ޔޫރަޕްގެ ނޮކައުޓް މެޗެއްގައި މިވަރުގެ ކުޅުމެއް އާސެނަލްގެ ފަރާތުން ފެނުމަކީ ކުޅުންތެރިންގެ ކޮންފިޑެންސަށް ވަރަށް ރަނގަޅު ކަމެއް ކަމަށް އާޓެޓާ ބުންޏެވެ.
ޔޫރޮޕާ ލީގު ކާމިޔާބުކުރަން އާސެނަލުން ބޭނުންވާ އެއް ސަބަބަކީ އަންނަ ސީޒަނުގެ ޗެމްޕިއަންސް ލީގުން ފުރުސަތު ހޯދުމެވެ.
