ވުލްވަހެމްޓަން (އޭޕްރީލް 6) - އިނގިރޭސި ޕްރިމިއާ ލީގުގައި ރޭ ވުލްވްސް އަތުން 3-2 އިން މޮޅުވެ ވެސްޓް ހޭމް ޔުނައިޓެޑް ލީގުގެ ހަތަރު ވަނަ އަށް ޖެހިލައިފި އެވެ.
ހޮނިހިރު ދުވަހު ކުޅުނު މެޗުން ރެލިގޭޝަނުގައި އޮތް ވެސްޓް ބްރޮމް އަތުން އޭރު ހަތަރު ވަނައިގައި އޮތް ޗެލްސީ ބަލިވުމުން ރޭގެ މެޗުން މޮޅުވެގެން ހަތަރަކަށް އެރުމުގެ ފުރުސަތު ވެސްޓް ހޭމް އަށް އޮތީ ލިބިފަ އެވެ. ވެސްޓް ހޭމް ހަތަރު ވަނަ އަށް އެރީ 30 މެޗުން 52 ޕޮއިންޓް ހޯދައިގެންނެވެ. ޗެލްސީ ފަސް ވަނައިގައި އޮތީ 30 މެޗުން 51 ޕޮއިންޓާ އެކު އެވެ.
ރޭގެ މެޗުގެ ފުރަތަމަ 14 މިނިޓް ތެރޭގައި ވެސްޓް ހޭމް އިން ވަނީ ދެ ގޯލުގެ ލީޑެއް ނަގައިފަ އެވެ. މެޗުގެ ހަ ވަނަ މިނިޓްގައި ވްލަޑިމީރް ސޫފާލް ދިން ބޯޅައަކުން ވެސްޓް ހޭމް އަށް ލީޑުނަގައިދިނީ ޖެސީ ލިންގާޑް އެވެ. އަދި 14 ވަނަ މިނިޓްގައި އާތޫރް މަސުއާކޫ ދިން ބޯޅައަކުން ޕަބްލޯ ފޯނާލްސް ވަނީ ވެސްޓް ހޭމަށް ދެ ވަނަ ލަނޑެއް ޖަހައިދީފަ އެވެ. އަދި 38 ވަނަ މިނިޓްގައި ލިންގާޑް ތަނަވަސްކޮށްދިން ފުރުސަތެއްގައި ޖެރަޑް ބޮވެން ވަނީ ވެސްޓް ހޭމްގެ ތިން ވަނަ ގޯލު ކާމިޔާބުކޮށްފަ އެވެ.
އަމިއްލަ ދަނޑުގައި ކުޅުނު ވުލްވްސް އިން ވަނީ ފަސް ބެލުމެއްނެތި ކުރި މަސައްކަތުން ދެ ގޯލު ޖެހި އެވެ. މެޗުގެ 44 ވަނަ މިނިޓްގައި ވުލްވްސްގެ ފުރަތަމަ ގޯލު ޖެހީ އެޑަމާ ޓްރައޮރޭ ދިން ބޯޅައަކުން ލެއަންޑްރޯ ޑެންޑޮންކާ އެވެ. މެޗުގެ 68 ވަނަ މިނިޓްގައި ޕެޑްރޯ ނެޓޯ ތަނަވަސްކޮށްދިން ފުރުސަތަކުން ވުލްވްސްގެ ދެ ވަނަ ގޯލު ޖެހީ ޒުވާން ފޯވާޑް ފަބިއޯ ސިލްވާ އެވެ.
ވެސްޓް ހޭމްގެ ކޯޗު ޑޭވިޑް މޮއިސް ބުނީ ބޮޑެތި ޓީމުތައް ފަހަތަށް ޖައްސާލާފައި އޭނާގެ ޓީމުން އަންނަ ސީޒަނުގެ ޗެމްޕިއަންސް ލީގަށް ކޮލިފައިވާން މަސައްކަތްކުރާނެ ކަމަށާއި މި ރޭހުގައި އޮތް ޓީމުތަކުގެ ތެރެއިން އެެއްވެސް ޕްރެޝަރެއް ނެތި ކުރިއަށްދެވެން އޮތް އެއް ޓީމަކީ ވެސްޓް ހޭމް ކަމަށެވެ.
