މިލާން (އޭޕްރީލް 4) - އިޓާލިއަން ލީގުގައި ރޭ އެންމެ ފަހުގެ ޗެމްޕިއަން ޔުވެންޓަސް އާއި ލީގުގެ ދެ ވަނައިގައި އޮތް އޭސީ މިލާން ކުޅުނު މެޗުތަކުން އެއްވަރުވިއިރު, އިންޓަ ކުޅުނު މެޗުން މޮޅުވެ ލީގުގެ އެއް ވަނައިގައި އަށް ޕޮއިންޓަށް ލީޑުފުޅާކޮށްފި އެވެ.
ބޮލޯނިއާ އަތުން 1-0 އިން މޮޅުވެ އިންޓަ އެއް ވަނައިގައި އޮތީ 28 މެޗުން 68 ޕޮއިންޓާ އެކު އެވެ. ދެ ވަަނައިގައި އޮތް މިލާން ރޭ އަމިއްލަ ދަނޑުގައި ސަމްޑޯރިއާއާ 1-1 އިން އެއްވަރުވިއިރު, މިލާނަށް 29 މެޗުން ލިބިފައިވަނީ 60 ޕޮއިންޓެވެ. ތިން ވަނައިގައި އޮތީ އުދިނޭޒީ އަތުން 3-2 އިން މޮޅުވި އެޓަލަންޓާ އެވެ. އެ ޓީމަށް 29 މެޗުން 58 ޕޮއިންޓް ލިބިފައިވާއިރު, ޔުވެންޓަސް ހަތަރު ވަނައިގައި އޮތީ 28 މެޗުން 56 ޕޮއިންޓާ އެކު އެވެ. ރޭ ޔުވެންޓަސް ކުޅުނު މެޗުން ވަނީ ޓޮރިނޯއާ 2-2 އިން އެއްވަރުވެފަ އެވެ. ރޭގެ ނަތީޖާއާ އެކު ޔުވެންޓަސް އަށް ޖެހިޖެހިގެން 10 ފަހަރު ލީގު ކާމިޔާބުކުރަން ކުރާ މަސައްކަތަށް ވަނީ ބޮޑު ގޮންޖެހުމެއް ކުރިމަތިވެފަ އެވެ.
ސަމްޕޯރިއާ އިން ވަނީ ރޭ މިލާން ދަނޑުގައި މެޗުގެ 57 ވަނަ މިނިޓްގައި ތަޖުރިބާކާރު ފޯވާޑް ފަބިއޯ ކުއަގްލިއަރެއްލާގެ ލަނޑުން ލީޑުނަގައިފަ އެވެ. މެޗު ނިމެން ތިން މިނިޓަށް ވެފައި ވަނިކޮށް މިލާނަށް އެއްވަރުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޔެންސް ޕީޓާ ހޯގް އެވެ.
ޓޮރީނޯ ދަނޑުގައި ރޭ ކުޅުނު މެޗުގެ 13 ވަނަ މިނިޓްގައި ޔުވެންޓަސް އަށް ލީޑުނަގައިދިނީ ފެޑެރީކޯ ޗިއޭސާ އެވެ. ޓޮރީނޯ އިން ނަތީޖާ އަނބުރާލީ 27 ވަނަ މިނިޓާއި 46 ވަނަ މިނިޓްގައި އެންޓޯނިއޯ ސަނަބްރިއާ ޖެހި ގޯލުތަކުންނެވެ. ކްރިސްޓިއާނޯ ރޮނާލްޑޯ ޔުވެންޓަސް އަށް އެއްވަރުކޮށްދިނީ މެޗުގެ 77 ވަނަ މިނިޓްގަ އެވެ. އެ ގޯލު ފުރަތަމަ އޮފްސައިޑް ކަމަށް ނިންމި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ ގޯލު ބަަލައިގަންނާށެވެ.
އިންޓަ އިން ބޮލޯނިއާ ކޮޅަށް ގޯލު ޖަހަން ގިނަ ފުރުސަތުތަކެއް ތަނަވަސްކުރި ނަމަވެސް ޖެހުނީ އެންމެ ގޯލެކެވެ. މެޗުގެ ފުރަތަމަ ހާފުގައި އެ ލަނޑު ކާމިޔާބުކުރީ 31 ވަނަ މިނިޓްގައި ރޮމެލޫ ލުކާކޫ އެވެ.
ރޭގެ މޮޅާ އެކު އިންޓަ އިން އެއް ވަނައިގައި އަށް ޕޮއިންޓުގެ ލީޑެއް ނެގި ނަމަވެސް މެޗު ހަމަކުރާއިރު އެ ލީޑު 11 ޕޮއިންޓަށް ފުޅާކުރުމުގެ ފުރުސަތު އެ ޓީމަށް އެބައޮތެވެ. އިންޓަގެ ކޯޗު އެންޓޯނިއޯ ކޮންޓޭ ބުނީ ބާކީ ގިނަ މެޗުތަކެއް ހުރުމުން އަދި އެއްވެސް ކަމެއް ޔަގީންކުރަން ބޭނުމެއް ނޫން ކަމަށެވެ.
