އުތުރުގެ ރަށެއްގައި 14 އަހަރުގެ ކުއްޖަކު ރޭޕްކުރި ކަމަށް ތުހުމަތުވާ މައްސަލައިގެ ތަހުގީގު ލަސްކަމަށް ބުނެ އެ ރަށުގެ ބަޔަކު ރޭ މުޒާހަރާކޮށްފި އެވެ.
އެ ކުއްޖާ ރޭޕްކުރި ކަމަށް ތުހުމަތު ކުރާ މީހުންގެ ތެރޭގައި އެ ރަށުގެ ސްކޫލުގެ ޓީޗަރަކާއި ފުލުހަކު ވެސް ހިމެނެ އެވެ. ޕޮލިސް ސްޓޭޝަން ދޮށަށް އެއްވެ ބަޔަކު ނުރުހުންފާޅުކުރީ އެ މީހުން ހައްޔަރުކުރަން ގޮވާލަ އެވެ.
ފުލުހުންގެ ތަހުގީގު ލަސްކަމަށް ބުނެ ކުރި ޝަކުވާތަކާ އެކު އުފެދުނު ހަމަނުޖެހުމުގައި އާއްމުންގެ ބަޔަކާއި ފުލުހުންނާ ދެމެދު ކުރިމަތިލުމެއް ވެސް ހިނގި އެވެ. ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި އޭގެ ތެރެއިން ބައެއް މީހުން ވަނީ އެ ސްޓޭޝަންގެ ދޮރުގައި ފައިން ޖަހައި ގާ ފަދަ ތަކެތި ފުލުހުންނާ ދިމާލަށް އުކައިފަ އެވެ.
ޝީލްޑް ހިފައިގެން ތިބެ އެ ހަމަ ނުޖެހުން ފުލުހުން ކޮންޓްރޯލް ކުރީ ޕެޕާ ސްޕްރޭ ބޭނުން ކޮށްގެންނެވެ.
އެ ރަށު މީހަކު ސޯޝަލް މީޑިއާގައި ލިޔެފައިވާ ގޮތުގައި އިންސާފަށް އެދި ރައްޔިތުން ގޮވުމުން ފުލުހުން އަމަލު ކުރި ގޮތަކީ އިތުރު ފޯހެއް ގެނެސް ރައްޔިތުންގެ ގަޔަށް ޕެޕާ ސްޕްރޭ ޖަހައި އަނިޔާ ކުރުމެވެ. އެ މައްސަލަ ހިނގިތާ 20 ދުވަސް ވީއިރު އަދި ވެސް ތަހުގީގު ނުނިމޭ ކަމަށް ބުނެ އޭނާ ވަނީ ކަންބޮޑުވުން ފާޅުކޮށްފަ އެވެ.
"ކުއްޖާ އަނގައިން އެ ހާދިސާ ކަިއދިންތާ 24 ގަޑިއިރު. އަދިވެސް އެކަން ކުރި މީހާ ގޭގައި. [ރަށުގެ ނަން] ރައްޔިތުން އެދެނީ އެ އަންހެން ކުއްޖާއަށް އިންސާފު ލިބުން. ޓީޗަރެއް ކުރިޔަސް ނުބައި ނުލަފާ ކަމެއް ކުށްވެރި ވާނެ،" ފޭސްބުކްގައި އޭނާ ލިޔެފައިވެ އެވެ.
ފުލުހުން ބުނި ގޮތުގައި މި މަހުގެ ތިން ވަނަ ދުވަހު ހިނގި ކަމަށް ބުނާ މައްސަލަ ރިޕޯޓްކުރީ މި މަހުގެ 11 ގައި ކަމަށެވެ. އެ މައްސަލަ ތަހުގީގުކުރަން ޖެންޑާ މިނިސްޓްރީއާ ގުޅިގެން މަސައްކަތް ކުރަމުން އަންނަ ކަމަށް ފުލުހުން ބުންޏެވެ.
ފުލުހުން ބުނީ އިހުތިޖާޖު ކުރާ މީހުން ހަމަޔަކަށް އެޅުވީ އެ މީހުންނާ ވާހަކަ ދައްކައިގެން ކަމަށެވެ. ނަމަވެސް ސޯޝަލް މީޑިއާގައި ދައުރުވާ ވީޑިއޯއިން ފެންނަނީ ރައްޔިތުންނާއި ފުލުހުންނާ ކުރިމަތިލާ ތަނެވެ.
ރޭޕަށް ތުހުމަތުކުރި މައްސަލައިގައި މިހާތަނަށް އެއްވެސް މީހަކު ހައްޔަރެއް ނުކުރެވެ އެވެ.
