އޭޝިއަން ސާފިން ފެޑެރޭޝަން (އޭއެސްއެފް)ގެ ނައިބު ރައީސްގެ މަގާމަށް މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސް މުހައްމަދު ސޮބާހު (ޗޭ) އިންތިހާބުކޮށްފި އެވެ.
ޗޭ އަންނަނީ ރާއްޖޭގެ ސާފިން އެސޯސިއޭޝަންގެ ރައީސްގެ މަގާމު 2019 ވަނަ އަހަރުން ފެށިގެން ފުރުއްވަމުންނެވެ. އަދި، އޭނާ އަކީ، މީގެ ކުރިން، އޭސިއަން ސާފިން ފެޑެރޭޝަންގެ ހިންގާ ކޮމިޓީގައި، އެކްޒެކްޓިވް ބޯޑް މެމްބަރެއްގެ ގޮތުގައި ޒިންމާ އަދާކުރައްވާފައިވާ ފަރާތެކެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ހިންގާ ކޮމިޓީގެ މެމްބަރުކަން 2021 ވަނަ އަހަރުން ފެށިގެން ކުރައްވަމުން އަންނަ ޗޭ އަކީ، ފާއިތުވި އަހަރުތަކުގައި ރާއްޖޭގެ ސާފިން ކުރިއެރުވުމުގެ އިސް މޭސްތެރިޔާ އެވެ. އޭގެ އިތުރުން، އިޖުތިމާއީ ގިނަ ހަރަކާތްތަކުގައި ވެސް ބައިވެރިވެ، ޒުވާނުން ބާރުވެރިކުރުމަށްޓަކައި، ގިނަ ގުނަ މަސައްކަތްތަކެއް ކުރެ އެވެ.
ޗޭގެ ލީޑަޝިޕްގައި ދިވެހި ސާފް ލީގުގެ ނަމުގައި ރާއްޖޭގެ އެކި ހިސާބުތަކުގައި މުބާރާތްތައް ބާއްވައިގެން ލީގެއް ކުރިއަށްގެންދިއުމަށް ފޯރީގައި ފެށި މަސައްކަތް މިހާރު އަންނަނީ ފެންވަރު މަތިވަމުންނެވެ. އަދި، އޭޝިއަން ސާފިން ޗެމްޕިއަންޝިޕް، ޖެހިޖެހިގެން ދެ އަހަރު ރާއްޖޭގައި ހޯސްޓްކުރިއިރު، މޯލްޑިވްސް ސާފިން އެސޯސިއޭޝަނަށް އެ ފުރުސަތު ހޯދައިދިނުމަށްޓަކައި، ޗޭ އިސް ދައުރެއް އަދާކުރެއްވި އެވެ.
މުބާރާތްތައް ބޭއްވުމުގެ އިިތުރުން އެތުލީޓުންގެ ކުރިއެރުވުމާއި، ޓެކްނިކަލް ދާއިރާގެ މީހުން ކުރިއެރުވުމަށް ވެސް ގިނަ މަސައްކަތްތަކެއް މިދިޔަ އަށް އަހަރުގެ ތެރޭ ޗޭ ލީޑާޝިޕްގެ ދަށުން މޯލްޑިވްސް ސާފިން އެސޯސިއޭޝަނުން އަންނަނީ ކުރަމުންނެވެ.
އެ ގޮތުން ފެންވަރު ރަނގަޅު ބިދޭސީ ކޯޗަކާއި ގައުމީ ޓީމްގެ ތަމްރީންތައް ކުރިއަށްގެންދިޔައިރު، ރާއްޖޭގެ ޖަޖުންގެ ފެންވަރު މަތިކުރުމަށްވެސް ގިނަ މަސައްކަތްތަކެއް ކުރިއަށްގެންދެވުނެވެ. އަދި، މި އަހަރު އޭޝިއަން ގޭމްސްގައި އޮންނަ ސާފިން އިވެންޓަށް ރާއްޖެ ކޮލިފައި ކޮށްދިނުމަށްޓަކައި، ބައިނަލްއަގުވާމީ ލެވަލްގައި ރާއްޖޭގެ އެތުލީޓުންގެ ފުރުސަތު އިތުުރުކޮށްދިނުަމަށް ވެސް އެމްއެސްއޭގެ މިހާރުގެ ލީޑަޝިޕުން ގިނަގުނަ ފުރުސަތުތަކެއް ފަހިކޮށްދީފައިވެ އެވެ.
