އެންމެ ފަހުގެ ޗެމްޕިއަން، ޓީރެކްސް ބާސްކެޓްބޯލް ކްލަބް ބަލިކޮށް، ކިންގްސް ބާސްކެޓްބޯލް ކްލަބުން ރޭ ނިމުނު މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ)ގެ ކަޕް ޗެމްޕިއަންކަން ހޯދައިފި އެވެ.
ޒުވާނުންގެ މަރުކަޒު އެެތެރެ ކޯޓުގައި ރޭ ކުޅުނު ކަޕްގެ ފައިނަލް މެޗުގައި ފޯރިގަދަ ކުޅުމަކަށް ފަހު، ކިންގްސް އިން ޓީރެކްސްގެ މައްޗަށް ކުރިހޯދާފައިވަނީ، 60-57 ޕޮއިންޓުންނެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނީ ޓީރެކްސްގެ އިސްމާއިލް ވިލްދާން ޔޫސުފް އެވެ.
ޖުމްލަ 23 ޓީމު ވާދަކުރި ފިރިހެން ޑިވިޝަންގެ އެންމެ މޮޅު ކުޅުންތެރިއަކީ، ޒައިދާން އާތިފް ޝުކޫރު އެވެ.
މި ޑިވިޝަނުގެ މޮޅު ފަސް ކުޅުންތެރިންނަކީ، މުހައްމަދު ނާފް އިރުޝާން، ވިލްދާން، އަހުމަދު ލައިލް ޝިފާން،. މުހައްމަދު އަޝްމަލް އަހުމަދު އަދި މުހައްމަދު އައިކް ވަޖީހު އެވެ.
ޝީލްޑް ބައިގެ ތަށި ގެންދިޔައީ، ނެޓްސް ބާސްކެޓްބޯލް ކްލަބުންނެވެ. އެއީ، އެލްކިއު ސްޕޯޓްސް ކްލަބްގެ މައްޗަށް 85-49 އިން ކުރިހޯދައިގެންނެވެ.
ހަ ޓީމު ވާދަކުރި އަންހެން ޑިވިޝަނުގެ ޗެމްޕިއަންކަން ހޯދީ ކުއީންސް ބާސްކެޓްބޯލް ކްލަބުންނެވެ.
ފައިނަލުގައި ކުއީންސް އިން ވަނީ މިސްޓިކްސް ބާސްކެޓްބޯލް ކްލަބް އަތުން 88-58 އިން މޮޅުވެފަ އެވެ. ފައިނަލް މެޗުގެ މޮޅު ކުޅުންތެރިއަކީ ކުއީންސްގެ އައިޝަތު އިނާޝާ އެވެ.
އަންހެން ޑިވިޝަންގެ މޮޅު ކުޅުންތެރިންނަކީ، ރައީފާ އިބްރާހިމް، މަރިޔަމް ކައިލީން ޝިރުހާން، މަރިޔަމް މަލަކް މުހައްމަދު ސިފާން، އިނާޝާ އަދި އައިޝަތު ރާއީ ހަމްޒާ އެވެ. އަންހެން ޑިވިޝަނުގެ އެންމެ މޮޅު ކުޅުންތެރިއަކީ، ފާތިމަތު ޝައިލާން އަފްޒަލް އެވެ.
