ރޯދަ މަސް ފެށެން ހަތަރު ދުވަހަށް ވެފައި ވަނިކޮށް މާލޭ ދަތުރުވެރިންގެ މާރުކޭޓުގައި ކަނޑޫދޫ މިރުސް ކިލޯއެއްގެ އަގު 450ރ. އަށް އަރައިފި އެވެ.
ދަތުރުވެރިންގެ މާރުކޭޓުން ވާހަކަ ދެއްކި ބައެއް ވިޔަފާރިވެރިން ބުނީ ކަނޑޫދޫ މިރުހުގެ އަގު ބޮޑުވެގެން އުޅެނީ މިރުސް ލިބުން ދަތިވުމުގެ ސަބަބުން ކަމަށެވެ. ރޯދަ މަސް ފެށޭއިރު ވެސް މިރުހުގެ އަގު ތިރިވާނެ ކަމަށް ނުބެލެވޭ ކަމަށް ވިޔަފާރިވެރިން ބުންޏެވެ.
"ރޯދަ މަސް ފެށޭއިރުވެސް މިރުހުގެ އަގު ތިރިވާނެ ކަމަށް ނުބެލެވޭ. ހަމަ ނުލިބެނީ މިދުވަސްކޮޅު. 100 ގްރާމް ވިއްކަނީ 45ރ. އަށް. ކިލޯއެއް 450ރ. އަށް. މިރުހުގެ އަގު ވެއްޓޭނީ މިރުސް ގިނައިން ލިބުނީމަ. އޭރަށް ހަލާކުވުމުގެ ކުރިން އަގު ވެއްޓޭނެ،" މާރުކޭޓުގައި ގޮޅިއެއް ހިންގާ މީހަކު ބުންޏެވެ.
ބާޒާރުގައި އާންމުކޮށް ރޯދައަށް ގަންނަ ބައެއް ތަކެތީގެ އަގުތައް:
- ލުނބޯ - ކިލޯއެއް 60ރ. އަށް
- ކިއުކަމްބާ - ކިލޯއެއް 20ރ. އާއި 30ރ. އާ ދެމެދު.
- ކެބެޖް - ކިލޯއެއް 25ރ. އަށް
- ކެރެޓު - ކިލޯއެއް 45ރ. އަށް.
- ކެޕްސިކަމް - ކިލޯއެއް 75ރ. އަށް.
- ބީންސް - ކިލޯއެއް 75ރ. އަށް.
- ޓޮމާޓޯ - ކިލޯއެއް 30ރ. އަށް.
- ފަޅޯ - ކިލޯއެއް 30ރ. އާއި 40 އަށް.
- އާފަލު - 6ރ. އަށް.
- އޮރެންޖް - 8ރ. އަށް.
މިރުހުގެ އިތުރުން ބާޒާރުގައި އެންމެ އަގުބޮޑުކޮށް ދެން އުޅެނީ ކުރުނބަލެވެ. ބާޒާރުގައި ކުރުނބަލެއް ލިބެނީ 45ރ. އާއި 50ރ. އާ ދެމެދުގެ އަގަކަށެވެ. އޭގެއިތުރުން މިދިޔަ ރޯދަ މަހު އެންމެ ބޮޑަށް އަގު އުފުލުނު ކާށީގެ އަގު ހުރީ 15ރ. އާއި 30ރ. އާ ދެމެދުގަ އެވެ.
ރޯދަ މަހު އެންމެ ގިނައިން މީހުން ގަންނަ އެއްޗަކީ ކަރާ ކަމަށްވާއިރު، ބާޒާރުގައި ކަރާގެ އަގު މިވަގުތު ހުރީ 15ރ. އާއި 20ރ. އާ ދެމެދުގަ އެވެ. މިއީ އާންމުކޮށް ވެސް ރޯދަ މަސް ފެށޭއިރު ކަރާގެ އަގު ހުންނަ މިންވަރުކަން ފާހަގަކުރެވެ އެވެ.
މިދިޔަ ރޯދަ މަހަށްވުރެ މި ރޯދަ މަހު ދިވެހި ޖުމްހޫރީ މޭވާ ބާޒާރުގައި ތިޔާގިކަން ފާހަގަކުރެވެ އެވެ. ދިވެހި ޖުމްހޫރީ މޭވާ ކިލޯއެއް ބާޒާރުގައި މިވަގުތު ހުރީ 80ރ. އަށެވެ. މިދިޔަ ރޯދަ މަހު ބާޒާރުގައި ބޭރުގެ އެކި ގައުމުތަކުގެ ޖުމްހޫރީ މޭވާ ހުރިއިރު، އެއްވެރެޖުކޮށް ކިލޯއެއް ލިބުނީ 100ރ. އަށްވުރެ މަތިންނެވެ.
މީގެއިތުރުން މިދިޔަ ރޯދަ މަހަށްވުރެ މިފަހަރުގެ ރޯދަ މަސް ފެށޭއިރު ލެޓިއުސް ކިލޯއެއްގެ އަގު ހުރީ 35ރ. އާއި 50ރ. އާ ދެމެދުގަ އެވެ. މިދިޔަ ރޯދަ މަހު ލެޓިއުސް ކިލޯއެއްގެ އަގު އެވްރެޖުކޮށް ހުރީ 90ރ. ގަ އެވެ. ބައެއް ދުވަސްތަކުގައި 100ރ. އަށްވުރެ ވެސް މައްޗަށް އަރަ އެވެ.
