ދަރުމަވަންތަ ހޮސްޕިޓަލް އިމާރާތް ކުރި ކުންފުނިން ޖީއެސްޓީގެ ގޮތުގައި ދައްކަންޖެހޭ ކަމަށް މޯލްޑިވްސް އިންލެންޑް ރިވެނިއު އޮތޯރިޓީ (މީރާ) އިން ވަކާލާތު ކުރާ ފައިސާގެ މައްސަލަ ސިވިލް ކޯޓުން މަޑު ޖައްސައިލުމަށް ހައި ކޯޓުން އަމުރުކޮށްފި އެވެ.
ދަރުމަވަންތަ ހޮސްޕިޓަލް އިމާރާތް ކުރީ ޗައިނާގެ ޗަންގް ހުއާ ކޮންސްޓްރަކްޝަން ޕްރައިވެޓް ލިމިޓެޑުންނެވެ. އެ ކުންފުނިން ޖީއެސްޓީގެ ގޮތުގައި ދައްކަންޖެހޭ ފައިސާ އާއި އެ ފައިސާ ދައްކާފައި ނުވާތީ އަރާފައިވާ ޖޫރިމަނާ ފައިސާ ހޯދުމަށް ކަމަށް ބުނެ މީރާއިން ސިވިލް ކޯޓަށް މައްސަލަ ހުށަހެޅީ 2022 ވަނަ އަހަރު އެވެ.
އެ މައްސަލަ ސިވިލް ކޯޓަށް ހުށަހަޅާފައި ވަނިކޮށް ޗަންގް ހުއާ ކުންފުނިން ވަނީ ދަރުމަވަންތަ މަޝްރޫއުގެ އަގު ކަމަށްވާ 140،000،000 އެމެރިކާ ޑޮލަރަކީ ޖީއެސްޓީ ހިމެނިފައި ނުވާ ގޮތަށް އެއްބަސްވެފައިވާ އަދަދެއް ކަމަށް ކަނޑައަޅައިދިނުމަށާއި އެހައިތަނަށް އެ ކުންފުނިން މީރާއަށް ޖީއެސްޓީގެ ގޮތުގައި ދެއްކި 227،560ރ. އަކީ ދައުލަތުން އެ ކުންފުންޏަށް ދައްކަންޖެހޭ ފައިސާ ކަމަށް ކަނޑައަޅައިދިނުމަށެވެ.
ޗަންގް ހުއާ ކުންފުނިން އެދިފައި އޮތީ އެ ފައިސާ އެއްފަހަރާ އެ ކުންފުންޏަށް ދެއްކުމަށް ދައުލަތުގެ މައްޗަށް އަމުރު ކޮށްދިނުމަށެވެ.
މީރާއިން ހުށަހެޅި މައްސަލަ ކުރިއަށް ނުގޮސް އޮއްވައި ސިވިލް ކޯޓުން ވަނީ ޗަންގް ހުއާ ކުންފުނިން އެދުނު ގޮތަށް މާޗު 20، 2024, ގައި ހުކުމް ކޮށްފަ އެވެ. އެ ދުވަހު އެ ކޯޓުން ކުރި ހުކުމުގައި ބުނެފައި ވަނީ ޗަންގް ހުއާ ކުންފުނިން ޖީއެސްޓީގެ ގޮތުގައި މީރާއަށް ދައްކާފައިވާ 227،560ރ. އެއް މަސްދުވަސް ތެރޭގައި އެ ކުންފުންޏަށް ދައުލަތުން ދެއްކުމަށެވެ.
ސިވިލް ކޯޓުން އެގޮތަށް ހުކުމް ކުރުމާއެކު ޗަންގް ހުއާ ކުންފުނިން ވަނީ މީރާއިން ހުށަހަޅާފައިވާ މައްސަލައިގައި އިޖުރާއީ އިއުތިރާޒެއް ހުށަހަޅައިފަ އެވެ.
އެ ކުންފުނިން ހުށަހެޅި އިޖުރާއީ އިއުތިރާޒަކީ މީރާއިން ހޯދަން އެދޭ ފައިސާއަކީ ސިވިލް ކޯޓުން މާޗު 20، 2024, ގައި ކުރި ހުކުމުގައި ދައުލަތުން ޒިންމާ ވާންޖެހޭ ފައިސާ ކަމަށް ކަނޑައަޅާފައި ވާތީ އެ ފައިސާ ހޯދުމަށް އެދި މީރާއިން ޗަންގް ހުއާ ކުންފުނީގެ މައްޗަށް ދައުވާ ކޮށްގެން ކުރިއަށް ގެންދެވޭނެ ޖާގައެއް ނެތް ކަމަށް ބުނެ އެވެ.
ނަމަވެސް ސިވިލް ކޯޓުން ވަނީ އެ އިޖުރާއީ އިއުތިރާޒު ގަބޫލު ނުކޮށް، އެ މައްސަލަ ކުރިއަށް ގެންދެވޭނެ ކަމަށް ނިންމައިފަ އެވެ. އެގޮތަށް ސިވިލް ކޯޓުން ނިންމުމުގައި ރިއާއަތް ކޮށްފައި ވަނީ ޗަންގް ހުއާ ކުންފުންޏާއި ދިވެހި ދައުލަތާ ދެމެދުވެފައި އޮތް އެއްބަސްވުމުގެ 25 ވަނަ ނުކުތާ އަށެވެ.
އެ ނުކުތާގައި އޮންނަނީ ޗަންގް ހުއާ ކުންފުނިން މީރާއަށް ޖީއެސްޓީ ފައިސާ ދެއްކުމަށްފަހު އެ ފައިސާ ދައުލަތުން އަނބުރާ ހޯދުމަށެވެ.
ސިވިލް ކޯޓުން ނިންމީ އެ ނުކުތާގައި އެހެން އޮތް ނަމަވެސް ޓެކުހުގެ ފައިސާ ހޯދުމަށް ގާނޫނީ ގޮތުން މަސައްކަތް ކުރުމުގެ ބާރު މީރާއަށް އޮންނާތީ އެ މައްސަލަ ކުރިއަށް ގެންދެވޭނެ ކަމަށެވެ.
ޗަންގް ހުއާ ކުންފުނިން ހައި ކޯޓުގައި އިސްތިއުނާފު ކުރީ އެ މައްސަލަ އެވެ.
ހައި ކޯޓުން މިދިޔަ ބުރާސްފަތި ދުވަހު ކުރި އަމުރުގައި ބުނީ އެ ކޯޓުން ބަލަމުންދާ އިސްތިއުނާފީ މައްސަލައިގައި ވަކިގޮތެއް ކަނޑައަޅަންދެން ސިވިލް ކޯޓުގައި ކުރިއަށް ގެންދާ މައްސަލަ އިހަށް މަޑުޖައްސައިލުމަށެވެ.
