ރިސޯޓް ލީގު 2025 ގެ ނޯތު މާލެ ޒޯންގެ ފައިނަލުން، ވަރު ބައި އެޓްމޮސްފިއާ އާއި ޖުމެއިރާ އޮޅަހާލި އައިލެންޑް މޯލްޑިވްސް ޖާގަ ހޯދައިފި އެވެ.
އިއްޔެ ކުޅުނު ސެމީ ފައިނަލުގައި، ވަން އެންޑް އޮންލީ ރީތި ރަށް އަތުން ޖުމެއިރާ އޮޅަހާލި މޮޅުވީ 3-1 އިންނެވެ. މި މެޗުގެ ފަސް ވަނަ މިނިޓްގައި، ޖުމެއިރާގެ ޒިދާން ހަސަން ޒަރީރު ވަނީ ގޯލު ޖަހައިފަ އެވެ. މި މެޗުގައި އޭނާ އިތުރު ގޯލެއް ވެސް ޖެހިއިރު، އެ ޓީމުން ދެން ލަނޑު ޖެހީ، ގާލި ޕްރަތަމާ އެވެ. މި މެޗުގެ މޮޅު ކުޅުންތެރިއަކީ ވެސް ޖުމެއިރާގެ ޒިދާން އެވެ.
ވަން އެންޑް އޮންލީގެ ހަމައެކަނި ލަނޑު ޖެހީ އަހުމަދު ޝަމީމް އެވެ.
ސެމީ ފައިނަލުގެ ފަހު ޖާގަ ހޯދައިގެން، ގަދަ ހަތަރު ޓީމުގެ ކުރިމަތިލުމުން ފުރުސަތު ހޯދި ބަނޑޮސް މޯލްޑިވްސް އަތުން ވަރު މޮޅުވީ، މެޗުގެ ފުރިހަމަ ވަގުތު ހަމަވިއިރު، 1-1 އިން އެއްވަރުވެ، ޕެނަލްޓީ ޖަހައިގެންނެވެ. މެޗުގައި ވަރުން ލީޑުނެގީ، އަލީ މިސްބާހު ޖެހި ގޯލުުންނެވެ. އަދި. ބަނޑޮސް އަށް އެއްވަރުކޮށްދިނީ، އަހުމަދު ޝަމާލް އެވެ.
ޕެނަލްޓީގައި، ބަނޑޮހުން ހަތަރު ޕެނަލްޓީ ކާމިޔާބުކުރިއިރު، ވަރުން ވަނީ ފަސް ޕެނަލްޓީ ގޯލަށް ފޮނުވާލައި، ފައިނަލަށް ދަތުރުކޮށްފަ އެވެ. މެޗުގެ މޮޅު ކުޅުންތެރިއަކީ ވަރުގެ މުހައްމަދު ފަޒީލް އެވެ.
ވަރު އާއި ޖުމެއިރާ ކުޅޭ ފައިނަލް މެޗު އޮންނާނީ މި މަހުގެ 27 ވަނަ ދުވަހު އެވެ.
