ރިސޯޓް ލީގު 2025 ގެ ނޯތު މާލެ ޒޯންގެ ސެމީ ފައިނަލުގެ ޖާގައެއް ވަން އެންޑް އޮންލީ ރީތި ރަށާއި ޖުމެއިރާ އޮޅަހާލި އައިލެންޑް މޯލްޑިވްސް އަދި ވަރު ބައި އެޓްމޮސްފިއާ އިން ހޯދައިފި އެވެ.
އެ ގޮތުން، ގަދަ ހަ ޓީމު ވާދަކުރާ ބުުރުގެ ފުރަތަމަ މެޗުގައި، ވަން އެންޑް އޮންލީން ކުޅުނީ ދި ރިޓްޒް ކާލްޓަން މޯލްޑިވްސް ފަރި އައިލެންޑް އެވެ. މި މެޗުގައި، ރީތި ރަށުގެ ލަނޑުތައް ޖެހީ، ގާއިދު ގާސިމް އާއި މުހައްމަދު ނާއިފް، ކޮންމެ ކުޅުންތެރިއަކު ދެ ގޯލާއި ރިޝްވާން އިބްރާހިމް ރަޝީދު، އަހުމަދު ޝަމީމް އަދި އައިމަން މުހައްމަދު ޒާހިރު، ކޮންމެ ކުޅުންތެރިއަކު ގޯލެކެވެ. އަދި، ރިޓްޒް ކާލްޓަން ކުޅުންތެރިން އަތުން ބައިކޮޅަށް ވެސް ތިން ގޯލު ވަނީ ވަދެފަ އެވެ.
ގަދަ ހަ ޓީމުގެ ބުރުގެ ދެ ވަނަ މެޗުގައި، ޕަޓިނާ މޯލްޑިވްސް ފަރި އައިލެންޑާއި ވަރުން ކުޅުނު މެޗު 2-2 އިން އެއްވަރުވިއިރު، ޕެނަލްޓީގައި، ވަރުން މޮޅުވީ، 4-3 އިންނެވެ. މި މެޗުގައި ޕަޓިނާގެ ގޯލު ޖެހީ އިބްރާހިމް ވަޖީހު އާއި ވަރުގެ ކުޅުންތެރިއަކު އަތުން ބައިކޮޅަށް ވަން ގޯލެކެވެ. ވަރުން ލަނޑު ޖެހީ، އަލީ މިސްބާހު ދެ ގޯލެވެ. ޕެނަލްޓީގައި ވަރުން ހަތަރު ޕެނަލްޓީ ވައްދާލިިއިރު، ޕަޓިނާ އަށް ކާމިޔާބުކުރެވުނީ ތިން ޕެނަލްޓީ އެވެ.
ސެމީ ފައިނަލުގެ ތިން ވަނަ ޖާގަ އޮޅަހާލިން ހޯދީ ބަނޑޮސް މޯލްޑިވްސް ބަލިކުރުމަށް ފަހު އެވެ. އަހުމަދު ޝަމާލްގެ ގޯލުން ބަނޑޮހުން ލީޑުނެގި މި މެޗުގައި، އޮޅަހާލިން އެއްވަރުކުރީ، ޒިދާން ހަސަން ޒަރީރު ޖެހި ގޯލުންނެވެ. އެ ގޮތުން، 1-1 އިން މެޗު އެއްވަރުވިއިރު، ޕެނަލްޓީގައި، އޮޅަހާލިން ވަނީ ހަތް ޕެނަލްޓީ ވައްދާލައިފަ އެވެ. އަދި، ބަނޑޮސް އަށް ކާމިޔާބުކުރެވުނީ ހަ ޕެނަލްޓީ އެވެ.
ސެމީ ފައިނަލުގެ ފަހު ޖާގަ ލިބޭނީ، ގަދަ ހަ ޓީމުގެ ބުރުން ބަލިވި ޓީމުތަކުގެ ތެރެއިން އެންމެ ރަނގަޅު ނަތީޖާ ނެރުނު ދެ ޓީމު ކަމަަށްވާ، ބަނޑޮސް އާއި ޕަޓިނާ އިން މާދަމާ ކުޅެގެން މޮޅުވާ ޓީމަކަށެވެ. ސެމީ ފައިނަލް މެޗުތައް މި މަހު 24 ވަނަ ދުވަހު ކުޅޭއިރު، ފައިނަލް މެޗު އޮތީ މި މަހު 27 ވަނަ ދުވަހު އެވެ.
ނޯތު މާލެ ޒޯން މުބާރާތުގައި ވާދަކުރި ދެ ޓީމު ކަމަށްވާ، ސަންގެލި އާއި ޖޯއި އައިލެންޑަށް ވަނީ ގަވާއިދާ ހިލާފަށް ކުޅުންތެރިން ލައްވައި ކުޅުވާފައިވާތީ، ފިޔަވަޅު އަޅައިފަ އެވެ.
