ސުޕްރީމް ކޯޓުގައި ދުސްތޫރީ މައްސަލައެއް ހިނގަމުން ދަނިކޮށް އެ މައްސަލައަށް ސިޔާސީ ނުފޫޒު ފޯރުވައި ފަނޑިޔާރުންނަށް ބިރު ދެއްކުމަކީ ނާތަހުޒީބު ހުތުރު އަމަލެއް ކަމަށް ވިދާޅުވެ ގާނޫނުގެ ވެރިކަމަށް ރުޖޫއަވުމަށް ސަރުކާރުގެ ވެރިންނަށް ކުރީގެ ރައީސް، އިބްރާހިމް މުހައްމަދު ސޯލިހު މިއަދު ގޮވާލައްވައިފި އެވެ.
އެކްސްގައި އެ މަނިކުފާނު ކުރެއްވި ޕޯސްޓެއްގައި ވިދާޅުވީ ދިވެހިރާއްޖޭގެ މިސްރާބު މިވަގުތު ޖަހާފައި ހުރީ ހުދުމުހުތާރު ވެރިކަމަކާ ދިމާލަށް ކަމަށެވެ.
"މި ކަންކަން ހުއްޓާލައި ގާނޫނުގެ ވެރިކަމަށް ރުޖޫއަވުމަށް ދައުލަތުގެ ވެރިންނަށް ގޮވާލަން. ދިވެހިރާއްޖޭގެ މިވަގުތު މިސްރާބު ޖަހާފައި މިވަނީ ހުދުމުހުތާރު ވެރިކަމަކާ ދިމާލަށް،" ސޯލިހު ވިދާޅުވި އެވެ.
ސުޕްރީމް ކޯޓުގެ ދެ ފަނޑިޔާރުން ވަކި ކުރުން ލާޒިމުވާ ގޮތަށް މަޖިލީހުން ފާސްކުރި ބިލާއި، އެ ބިލު ފާސްކުރުމާއެކު ސުޕްރީމް ކޯޓުގެ ތިން ފަނޑިޔާރުން ސަސްޕެންޑު ކުރުމަކީ ތިން ބާރު ވަކިވެފައިވާ ނިޒާމު ހަރާބުގެ މަގަށް ގެންދިޔުން ކަމަށް އެމަނިކުފާނު ވިދާޅުވި އެވެ.
ސަރުކާރުން އެކަން ކުރަމުން ދަނީ ރައީސުލްޖުމްހޫރިއްޔާގެ މުށުތެރެއަށް ހުރިހާ ބާރުތަކެއް އެއް ކުރަން ކަމަށް ސޯލިހު ވިދާޅުވި އެވެ.
"އެތައް ބައެއްގެ ބުރަ މަސައްކަތުން އަޅުގަނޑުމެން އެންމެން ހޯދި ހައްގުތަކާއި ތިން ބާރު ވަކިވެފައިވާ ނިޒާމު ހަރާބުގެ މަގަށް މި ގެންދަނީ ރައީސުލްޖުމްހޫރިއްޔާގެ މުށުތެރެއަށް ބާރުތައް އެއް ކުރަން، އެކަމުގެ ހިތި ނަތީޖާ ތަހަންމަލު ކުރަން ޖެހޭނީ އާންމު ދިވެހި ރައްޔިތުން،" ސޯލިހު ވިދާޅުވި އެވެ.
ސޯލިހުގެ އިތުރުން ވެސް އެތައް ބަޔަކު އަންނަނީ ސަރުކާރުގެ އަމަލުތަކަށް ފާޑުކިޔައި ކަންބޮޑުވުން ފާޅު ކުރަމުންނެވެ. އޭގެތެރޭގައި އެމްޑީޕީ އާއި ޑިމޮކްރެޓްސްގެ އިތުރުން އާންމުން ވެސް ހިމެނެ އެވެ.
