އެތައް ސަތޭކަ މީހުންނެއް ބައިވެރިވި އިދިކޮޅު އެމްޑީޕީން ރޭ މާލޭގައި ބޭއްވި މުޒާހަރާގައި ރައީސް ޑރ. މުހައްމަދު މުއިއްޒު އާއި ހޯމްލޭންޑު ސެކިއުރިޓީ މިނިސްޓަރު އަލީ އިހުސާންގެ އިސްތިއުފާ އަށް ގޮވައިފި އެވެ.
އާޓިފިޝަލް ބީޗް ސަރަހައްދުން 8:30 ގައި މުޒާހަރާ ފެށީ ވެސް މުއިއްޒުގެ އިސްތިއުފާ އަށް ގޮވަން ފެށުމާއެކު އެވެ.
"އަނިޔާވެރިނުވެ ފަހަތަށް ޖެހިވަޑައިގަންނަވާ. ދިވެހިރާއްޖޭގެ ރައްޔިތުންނަށް ފުދިއްޖެ. ރައީސް މުއިއްޒު އިސްތިއުފާ ދެއްވާ،" މުޒާހަރާ ފެށުމާއެކު އެމްޑީޕީގެ ރައީސް އަބްދުﷲ ޝާހިދު ވިދާޅުވި އެވެ.
އެއަށް ފަހު ވާހަކަ ދެއްކި ބައިވެރިން އަދި މުޒާހަރާގައި އަޑުހަރުކޮށް ވެސް ގޮވަމުން ދިޔައީ ރައީސް މުއިއްޒު އާއި އިހުސާން އިސްތިއުފާ އަށް ގޮވަމުން ދިޔަ އެވެ.
އިހުސާންގެ އިސްތިއުފާ އަށް ގޮވީ ޑިޕާޓްމެންޓު އޮފް ނެޝަނަލް ރެޖިސްޓްރޭޝަންގައި، ޕީއެންސީ އަށް ފޯމުތައް ފުރި މައްސަލަ އާއި، އައިޑީކާޑު ޔުނިޓުގެ މައުލޫމާތު ބޭނުންކޮށްގެން ޕީއެންސީ އަށް ވަގު ފޯމު ފުރާފައިވާ ތުހުމަތުގަ އެވެ.
މި މުޒާހަރާ ބޮޑުތަކުރުފާނު މަގުން ގޮސް، އަމީނީ މަގުން އައިސް ނިންމައިލީ ވެސް އާޓިފިޝަލް ބީޗް ސަރަހައްދަށެވެ.
މި މުޒާހަރާގައި އެމްޑީޕީގެ މެންބަރުންގެ އިތުރުން އާންމުންގެ ގިނަ ބަޔަކު ވެސް ބައިވެރި އެވެ.
މުޒާހަރާ ނިންމާލުމުގެ ގޮތުން ވާހަކަ ދައްކަވަމުން އެމްޑީޕީގެ ޗެއާޕާޝަން ފައްޔާޒު އިސްމާއީލް ވިދާޅުވީ ސަރުކާރު ބަދަލު ވަންދެން ނުވަތަ ހަމަ މަގަން އެޅެންދެން ކުރިއަށް އޮތް ތަނުގައި މުޒާހަރާކުރާނެ ކަމަށެވެ.
ހިނގާލުމަށް ފުލުހުން ހުރަސްއަޅާފައެއް ނުވެ އެވެ. އަދި މުޒާހަރާގެ ބައިވެރިން ވެސް ފުލުހުންނާ ކުރިމަތިލާން އެއްވެސް ވަރަކަށް މަސައްކަތް ކޮށްފައެއް ނުވެ އެވެ.
މި މުޒާހަރާއަށް ތައްޔާރުވަމުންދިޔައިރު ސަރުކާރުގެ އިސްވެރިންނާއި ވެރިކަން ކުރާ ޕީއެންސީއަށް ނިސްބަތްވާ މަޖިލިސް މެންބަރުން ވެސް ދިޔައީ މި މުޒާހަރާއަކީ ގައުމުގެ ހަމަޖެހުން ނަގާލައި، ފުލުހުންނާ ކުރިމަތިލުމަކަށް ދާން ބޭއްވި އެއްވުމެއް ކަމަށް ތުހުމަތު ކުރަމުންނެވެ.
