ރާއްޖޭގެ ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައި ހުރެ ކުރެވުނު މަސައްކަތަކީ ޝަރަފެއްގެ ގޮތުގައި ދެކޭ ކަމަށް ތަޖިކިސްތާން ޓީމުގެ ހެޑް ކޯޗު ގެލާ ޝެކިލާޒޭ ބުނެފި އެވެ.
ސަައުދީ އަރަބިއްޔާގައި 2027 ވަަނަ އަހަރު ބާއްވާ އޭޝިއަން ކަޕަށް ކޮލިފައިވުމަށް ކުޅޭ ކޮލިފައިން ގްރޫޕް އޭގައި، ރާއްޖެއާ އެކު ހިމެނެނީ، ފިލިޕީންސް، ތަޖިކިސްތާން އަދި އީސްޓް ޓިމޯ އެވެ. މީގެ ތެރެއިން، ތަޖިކިސްތާންގެ ކޯޗަކަށް ހުރީ، ކުރިން ރާއްޖޭގެ ގައުމީ ފުޓްބޯޅަ ޓީމުގެ އެސިސްޓަންޓް ކޯޗަކަށް 2018 އާއި 2019 ވަނަ އަހަރު ހުރި ގެލާ އެވެ. އެއީ، ހެޑް ކޯޗު ޕީޓަ ސެގާޓްއާ އެކުގަ އެވެ. ގެލާގެ ކުރިން ތަޖިކިސްތާންގެ ހެޑް ކޯޗަކަށް ހުރީ ސެގާޓް އެވެ.
އޭޝިއަން ކަޕް ކޮލިފައިންގެ ގްރޫޕް ސްޓޭޖުގެ ގުރުއަތުލުން ނިމުމާ އެކު، ގެލާ، ތަޖިކިސްތާނުގެ މީޑިއާ އަަކަށް ދިން އިންޓަވިއުއެއްގައި ވަނީ ރާއްޖޭގައި ކުރެވުނު ފުޓްބޯޅައިގެ މަސައްކަތަކުގެ ހަނދާން އާ ކޮށްފަ އެވެ.
"ރާއްޖޭގެ ގައުމީ ޓީމާ އެކު މަސައްކަތް ކުރުމުގެ ޝަރަފް އަހަންނަށް ލިބުނު. އެ ކަންކަމަށް ބަލާއިރު، އަހަންނަށް ޔަގީންކަމާ އެކު ބުނަން ކެރިދާނެ. ރާއްޖެ އަކީ ވަރަށް ޗެލެންޖިން ޓީމެއް. ފަސޭހައެއް ނުވާނެ،" 2018 ވަނަ އަހަރުގެ ސާފް ޗެމްޕިއަންޝިޕް ތަށި ރާއްޖެ އަށް ހޯދައިދޭން އެންމެ އިސް މަސައްކަތެއް ކުރި އެއް ކޯޗިން ސްޓާފު ކަމަށްވާ ގެލާ ބުންޏެވެ.
2018 ވަނަ އަހަރު ގައުމީ ފުޓްބޯޅަ ޓީމުގެ ޕްރެކްޓިހެއްގެ ތެރެއިން، ގެލާ (ކ) އާއި ޝާކިއްޓެ.--- ފޮޓޯ: މިހާރު
"ކޮންމެ ޓީމަކާ އެކު ވެސް އަހަރެމެން ކުޅެން ޖެހޭނީ ވަރަށް އިހުތިރާމާ އެކު، ވަކި ޓީމެއް ދަށޭ އެ ގޮތަށް ވިސްނައިފިނަމަ ދެން އަހަރެމެން ކުރިމަތިލާްން ޖެހޭ ކަންކަން ވަރަށް އުނދަގޫވެދާނެ. ވަރަށް ފަސޭހައިން އަހަރެމެންނަށް 2027 ގެ އޭޝިއަން ކަޕަށް ކޮލިފައިވެވޭނެއޭ ހީކުރުމަކީ ގޯހެއް. ކޮންމެ މެޗަކަށް ތައްޔާރުވާން ޖެހޭނީ ތަފާތުކޮށް ފުރިހަމަަ ފޯކަސް އަކާ އެކު،"
ޖޯޖިއާގެ ފަސް އުމުރުފުރާއެއްގެ ގައުމީ ޓީމުގެ ކޯޗުކަން ކުރުމުގެ އިތުރުން، ބެލްޖިއަމް އާއި ޖޯޖިއާގެ ފުޓްބޯޅަ ކުރިއެރުވުމަށް ޓެކްނިކަލް ގިނަ މަސައްކަތްތަކެއްކޮށްފައިވާ ގެލާ ވަނީ ކޯޗު ސެގާޓާ އެކު، އަފްގާނިސްތާނާއި ރާއްޖޭގައި މަސައްކަތްތަކެއް ކޮށްފަ އެވެ. އަފްގާނިސްތާނާ އެކު، ސާފް ޗެމްޕިއަންޝިޕްގެ ފައިނަލުގައި އިންޑިއާ އަތުން ބަލިވި ނަމަވެސް ރާއްޖެއާ އެކު ފައިނަލަށް ނުކުމެ އިންޑިއާ ބަލިކުރި އެވެ.
ތަޖިކިސްތާން ފުޓްބޯޅަ ފެޑެރޭޝަނުން ގެލާއާ ހަވާލުކޮށްފައިވަނީ، ޒުވާން ޓީމެއް ބިނާކޮށްގެން ގައުމީ ޓީމު ވަރުގަދަ ކުރުމަށެވެ. އެ ގޮތުން، ގެލާ އިސްނަގައިގެން، ސެގާޓާ އެކު، ކުރި މަސައްކަތުން ތަޖިކިސްތާނުން ވަނީ އެވްރެޖް 21 އަހަރުގެ ސްކޮޑެއް ގޮވައިގެން، ތައިލެންޑްގެ ކިންގްސް ކަޕާއި މެލޭޝިއާގެ މެރްޑޭކާ ކަޕް ކާމިޔާބުކޮށްފަ އެވެ.
ރާއްޖޭން ވަނީ ތަޖިކިސްތާނާ ދެކޮޅަށް ތިން މެޗެއް ކުޅެފަ އެވެ. އެއީ، 1998 ވަނަ އަހަރުގެ އޭޝިއަން ގޭމްސްގައި ރާއްޖެ 3-0 އިން ބަލިވި މެޗާއި 2011 ވަނަ އަހަރު އެކުވެރިކަމުގެ މެޗެއްގައި 0-0 އިން އެއްވަރުވި މެޗު އަދި 2015 ވަނަ އަހަރު ރާއްޖެ 2-0 އިން ބަލިިވި މެޗެވެ.
