ރައީސް ޑރ. މުހައްމަދު މުއިއްޒު ގެންގުޅުވާ އަދި ތަންފީޒުކުރަމުން ގެންދަވާ ސިޔާސަތުތަކާއި، ގާނޫނުއަސާސީއަށް ގެނައި ބަދަލުތަކާމެދު ރައްޔިތުންގެ ގިނަ ބަޔަކު ނުރުހޭކަން އެމްޑީޕީން ދައްކައިލިއިރު، އެ ޕާޓީން ރޭ ބޮޑެތި ނިންމުންތަކެއް ވެސް ނިންމި އެވެ.
"ގާނޫނުއަސާސީގެ ދިފާއުގައި ރައްޔިތުން" ނަމުގައި އެމްޑީޕީން ކާނިވާ ސަރަހައްދުގައި ބޭއްވި ޖަލްސާއަށް އެތައް ހާސް ބަޔަކު ހާޒިރުވި އެވެ. ބައެއް ރަށްތަކުން އެތައް ސަތޭކަ ބަޔަކު ވެސް އެ ޖަލްސާގައި ބައިވެރިވުމަށް މާލެ އައެވެ.
ރޭގެ ޖަލްސާ ފެށުމުގެ ކުރިން ކާނިވާ ސަރަހައްދުގައި ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ނިންމި ކަންކަމުގެ ތެރޭގައި ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނު އަސާސީއަށް ގެނައި ބަދަލު ދެމި އޮންނަ މުއްދަތުގައި، ރައްޔިތުންގެ ހައްގުގައި ވަކާލާތުކޮށްގެން ނުވަތަ އެމްޑީޕީއަށް ސޮއިކުރުމުގެ ސަބަބުން ގޮނޑި ގެއްލިއްޖެ ނަމަ އެ މެންބަރަކު ތަމްސީލުކުރި ދާއިރާއަށް އަލުން އިންތިހާބު ކުރަން އެމްޑީޕީން އެހީތެރިވުމަށް ފާސްކުރުމާއި، އިދިކޮޅު ސިޔާސީ ހަރަކާތްތައް މުޅި ރާއްޖެއަށް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ހިންގުން ހިމެނެ އެވެ.
އެމްޑީޕީގެ ލީޑަރުން ހައްޔަރުކޮށްފި ނަމަ ޕާޓީ ހިންގާނެ ބަޔަކު ކަނޑައަޅާފައިވާނެ ކަމަށް އެ ޕާޓީގެ ޗެއާޕާސަން ފައްޔާޒު އިސްމާއީލް ރޭ ވިދާޅުވި އެވެ.
އެމްޑީޕީން މި ޖަލްސާ އިންތިޒާމުކޮށް މީހުން މާލެ އެރުމަށް ގޮވާލަމުން ދަނިކޮށް، އާދީއްތަ ދުވަހު ރައީސް މުއިއްޒު ކ. އަތޮޅުގެ ތިން ރަށަކާއި، އއ. އަތޮޅުގެ ތިން ރަށަކަށް ވަޑައިގެން ގިނަ ވައުދުތަކެއް ވެވެވަޑައިގެންނެވި އެވެ. އަދި ސަރުކާރުން ވައުދުވެ، ހުއްޓިފައި ހުރި ބައެއް ކަންކަން ވޭތުވެދިޔަ ތިން ދުވަހުގެ ތެރޭގައި ހިންގަން ފެށި އެވެ.
އެމްޑީޕީގެ ޖަލްސާގެ ލައިވްކޮށް ގިނަ ބަޔަކު ބެލި އެވެ.
