ރިއޯ ޑި ޖަނެއިރޯ، ބްރެޒިލް (ނޮވެމްބަރު 3) - ބްރެޒިލްގެ މަޝްހޫރު ފުލްބެކް، މާސެލޯ، އޭނާ ކުޅެމުން އައި ބްރެޒިލްގެ ކްލަބް، ފްލުމިނެންސޭއާ އެކު ހަދާފައި އޮތް ކޮންޓްރެކްޓް އުވާލައިފި އެވެ.
މާސެލޯ، 36، ފްލުމިނެންސޭގެ ކޮންޓްރެކްޓް އުވާލި ސަބަބެއް ހާމަކޮށްފައިނުވާއިރު، އެ ކްލަބްގެ މެނޭޖްމަންޓާއި އޭނާއާ ދެމެދު ދެބަސްވުންތަކެއް އުޅޭކަމުގެ އަޑުތަކެއް ބްރެޒިލް މީޑިއާގައި ފެތުރުނެވެ. އެއީ، މިދިޔަ ހުކުރު ދުވަހު، ގްރެމިއޯއާ ދެކޮޅަށް ކުޅުުނު މެޗުގައި 2-2 އިން އެއްވަރުވިއިރު، އެ މެޗުގައި ފްލުމިނެންސޭގެ ކޯޗު މަނޯ މެނެޒޭސް އާއި މާސެލޯއާ ދެމެދު ޖެހުނު މައްސަލައެއްގެ ސަބަބުން އައި ކަންތައްތަކެއް ކަމަށް ބްރެޒިލްގެ ބައެއް މިޑިއާތަކުން ރިޕޯޓްކޮށްފައިވެ އެވެ.
ރެއާލް މެޑްރިޑްގައި ހޭދަކުރި 15 އަހަރުގައި 25 ތަށި ހޯދި މާސެލޯ ވަނީ ބްރެޒިލް ގައުމީ ޓީމަށް 58 މެޗު ކުޅެދީފަ އެވެ. ރެއާލަށް 2007 ވަނަ އަަހަރުގެ ޖެނުއަރީގައި ބަދަލުވުމުގެ ކުރިން، މާސެލޯ ވަނީ ފްލުމިނެންސޭ އަށް ކުޅެފަ އެވެ. ފްލުމިނެންސޭގެ ޔޫތު ލެވަލުން ސީނިއާ ޓީމަށް ޕްރޮމޯޓްވި މާސެލޯ އަލުން އެ ކްލަބާ ގުޅުނީ އެ ޓީމުގައި ހުރެ ރިޓަޔާކުރަން ވެސް ވިސްނައިގެންނެވެ.
މިދިޔަ އަހަރު ފެބްރުއަރީ މަހު، ފްލުމިނެންސޭ އަށް ބަދަލުވުމުގެ ކުރިން، މާސެލޯ ވަނީ ގްރީސްގެ އޮލިމްޕިއާކޯސް އަށް ވެސް ކުޅެފަ އެވެ. ފްލުމިނެންސޭގެ ޓްރެއިނިން ސެންޓަރަށް މާސެލޯގެ ނަމުން ނަންދީފައިވާއިރު، މާސެލޯގެ އެއްބަސްވުން އުވާލުމާ ބެހޭގޮތުން އެ ކްލަބުން ބުނެފައިވަނީ، މާސެލޯ އާއި ކްލަބާ ދެމެދުގައި އޮތް ގުޅުން އަބަދަށް ދެމިގެންދާނެ ކަމަށެވެ.
