ސިޔާސީ މުވައްޒަފުން މަދު ކުރައްވާނެ ކަމަށް ރައީސް މުހައްމަދު މުއިއްޒު އިއުލާނު ކުރެއްވިފަހުން 15 ދުވަހުގެ ތެރޭގައި 248 ސިޔާސީ މުވައްޒަފުން ވަޒީފާއިން ވަކިކޮށްފައިވާ ކަމަށް ސަރުކާރުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެ އެވެ.
"ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ހަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، މިހާތަނަށް 31 އޮކްޓޯބަރު 2024 ގެ ނިޔަލަށް 248 ސިޔާސީ މުވައްޒަފުންވަނީ މަދުކުރެވިފައި،" އެކްސްގައި ކުރެއްވި ޕޯސްޓެއްގައި ހީނާ ވިދާޅުވި އެވެ.
ރައީސް މުއިއްޒުގެ އިގްތިސާދީ އިސްލާހީ އެޖެންޑާގެ ދަށުން 228 ސިޔާސީ މުވައްޒަފުން 15 ދުވަހުގެ ތެރޭގައި ވަކި ކުރައްވާނެ ކަމަށް އެމަނިކުފާނު އިއުލާނު ކުރެއްވީ އޮކްޓޯބަރު 15، ގަ އެވެ. އޭގެ ތަފުސީލަށް ވަޑައިގަންނަވަމުން ރައީސް ވިދާޅުވެފައި އޮތީ ވަކި ކުރައްވާނީ 109 ސީނިއާ ޕޮލިޓިކަލް ޑިރެކްޓަރުންނާއި 69 ޕޮލިޓިކަލް ޑިރެކްޓަރުންނާއި 43 ޑެޕިއުޓީ މިނިސްޓަރުންނާއި ހަތް ސްޓޭޓް މިނިސްޓަރުން ކަމަށެވެ.
ރައީސް އިއުލާނު ކުރެއްވި އަދަދަށް ވުރެ ވެސް ގިނައިން ސިޔާސީ މުވައްޒަފުން ވަކިކޮށްފައިވާ ކަމަށް ހީނާ މިއަދު ވިދާޅުވި ނަމަވެސް އޭގެ ތަފުސީލަކަށް ވަޑައެއްނުގަންނަވަ އެވެ. ވަކި ކުރީ ކޮން ވަޒީފާތަކެއްގައި ތިބި މީހުންނެއް ކަމެއް ވެސް ހީނާ ވިދާޅެއްނުވެ އެވެ.
ހީނާ ކުރިން ވިދާޅުވެފައި އޮތީ ރައީސް އިއުލާނު ކުރެއްވި ގޮތަށް 228 ސިޔާސީ މުވައްޒަފުން ވަކި ކުރުމަށްފަހު، ސަރުކާރުގައި ވަޒީފާ ކުރާ ސިޔާސީ މީހުންގެ ޖުމުލަ އަދަދު ވެސް ހާމަކުރައްވާނެ ކަމަށެވެ. ނަމަވެސް އެ އަދަދެއް ވެސް ހީނާ ހާމައެއް ނުކުރައްވަ އެވެ.
"އަދަދު" ނޫހާ ވާހަކަ ދެއްކި ބައެއް މިނިސްޓްރީތަކުން ބުނެފައި ވަނީ އެއްވެސް މުވައްޒަފަކު ވަކި ކުރަން ސަރުކާރުން އަންގާފައިނުވާ ކަމަށެވެ. އެހެންކަމުން، މުވައްޒަފުން މަދު ކުރަން އެއްވެސް ފިޔަވަޅެއް އަޅާފައިނުވާނެ ކަމަށް އެ މިނިސްޓްރީތަކުން ބުންޏެވެ.
ރައީސް މުއިއްޒު ވިދާޅުވެފައި ވަނީ 228 މުވައްޒަފުން ސަރުކާރުން މަދު ކުރުމުން 5.7 މިލިއަން ރުފިޔާ ދައުލަތުގެ ބަޖެޓުން ކޮންމެ މަހަކު ވެސް ސަލާމަތް ކުރެވޭނެ ކަމަށެވެ.
ރާއްޖޭގެ މާލީ ހާލަތު ދަށް ކަމަށް އެއްބަސްވެވަޑައިގެން ސިޔާސީ މުވައްޒަފުން މަދު ކުރަން ނިންމާފައިވާ ކަމަށް ރައީސް މުއިއްޒު އެންމެ ފުރަތަމަ އިއުލާނު ކުރެއްވީ ޖޫން 27، 2024، ގަ އެވެ. އިގްތިސާދީ ގޮތުން ބައެއް ފިޔަވަޅުތައް އަޅުއްވާނެ ކަމަށް ވެސް އެއިރު ވިދާޅުވި އެވެ. ނަމަވެސް މިހާތަނަށް އިސްލާހީ ފިޔަވަޅުތައް ނުފެންނާތީ ވޯލްޑް ބޭންކުން ވެސް ކަންބޮޑުވުން ފާޅުކޮށްފަ އެވެ.
"ދައުލަތުގެ ހަރަދުތައް ކުޑަކުރުމަށްޓަކައި ގިނަ ފިޔަވަޅުތަކެއް އެޅުމަށްވަނީ ނިންމާފައި. އެގޮތުން، ސަރުކާރުގެ ރިކަރަންޓް ހަރަދު ކުޑަކުރުމަށް އެކި ފިޔަވަޅުތައް އެޅުން ހިމެނޭ. މީގެ ތެރޭގައި، ސިޔާސީ މަގާމުތަކުގެ އަދަދު މަދުކުރުމާއި، އެކި މުނާސަބަތުތަކުގައި ބާއްވާ ހަފްލާތަކަށް ކުރާ ހަރަދުތައް ކުޑަކުރުން ނުވަތަ ނުބޭއްވުން ހިމެނޭ،" ރައީސް ވިދާޅުވެފައިވެ އެވެ.
