އަލަށް ހިއްކަން މަސައްކަތް ކުރާ ފުށިދިއްގަރުފަޅާއި މާލެ ޓަނަލަކުން ގުޅާލުމަކީ ވަރަށް މުއްސަނދި ތަސައްވުރެއް ކަމަށް ވިދާޅުވެ، އެ ޕްރޮޖެކްޓުގެ މަސައްކަތް ހަނދަށް ދިޔުން ފަދަ ކަމެއްގެ ގޮތުގައި ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ސިފަ ކުރައްވައިފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މުއްތަލިބު ވިދާޅުވީ، ފުށިދިއްގަރުފަޅު ނުވަތަ ރަސްމާލެއާ ހަމައަށް ޓަނަލެއް އެޅުމަކީ މީގެ ކުރިން ދުނިޔޭގައި ކޮށްފައި ނުވާ ފަދަ ބޮޑު މަސައްކަތެއް ކަމަށެވެ. އަދި ވިދާޅުވީ، އެފަދަ ކަމެއް ތަސައްވުރު ކުރުމަކީ، ލީޑަރެއްގެ ހުންނަންޖެހޭ ފަދަ މުހިންމު ސިފައެއް ކަމަށެވެ.
"މިވަގުތު ދުނިޔޭގެ އެއްވެސް ތަނެއްގައި، އޯޕަން ސީގައި ހަދާފައި އޮތް ކަހަލަ އިންފްރާސްޓްރަކްޗާއެއްގެ ވާހަކައެއް ނޫން މި ދައްކަނީ. ތިބޭފުޅުންނަށް އެނގިވަޑައިގަންނަވާނެ އެމެރިކާއިން ހަނދަށް ދިޔުމަށް ވެސް ޖޯން އެފް ކެނެޑީ އެންވިޝަން ކުރެއްވީ އެއްވެސް ބަޔަކު ހަނދަށް ގޮސްގެނެއް ނޫން،" މިނިސްޓަރު ވިދާޅުވި އެވެ.
މުއްތަލިބު ވިދާޅުވީ އެ ޓަނަލް އެޅުމުގެ މަސައްކަތަކީ ޓައިމްލައިނެއް ހަދައިގެން ކުރިއަށް ގެންދެވޭނެ ޕްރޮޖެކްޓެއް ނޫނެވެ. އޭނާ ވިދާޅުވީ އެއީ އެއަށްވުރެ މާ އާދަޔާ ހިލާފު މަސައްކަތެއް ކަމަށެވެ.
"އެކަން ހާސިލް ކުރުމަށްޓަކައި އަޅުގަނޑުމެން މަސައްކަތް ކުރާނަން، އެހެންނަމަވެސް އެއީ ޓައިމްލައިނެއް ލައިގެން މިކަން ކުރެވޭނެ ނުކުރެވޭނެ ތާރީހެއް ދީގެން ކުރަން އޮތް ކަހަލަ ކަމެއް ނޫން. އެއީ އެއަށްވުރެ މާ ބޮޑު، މާ އާދަޔާ ހިލާފު ކަމެއް،" މުއްތަލިބު ވިދާޅުވި އެވެ.
ފުށިފިއްގަރުފަޅާއި މާލެ ޓަނަލަކުން ގުޅާލުމަށް ރައީސް ޑރ. މުހައްމަދު މުއިއްޒު ވައުދުވެވަޑައިގަތީ ޖެނުއަރީ 22، ގައި ދަރުބާރުގޭގައި ވާހަކަ ދައްކަވަމުންނެވެ.
"ރަސްމާލެއާ ގުޅުވައިލުމަށްޓަކައި އަޅުގަނޑުމެން މިހާރު ފަންނީ ވަރަށްގިނަ މަސައްކަތްތަކެއް، އިނޮވޭޓިވް މަސައްކަތްތަކެއް ވާނީ ފަށާފައި. ވަރަށް ގާބިލް ކުންފުނިތަކާއެކު އަޅުގަނޑުމެން މިހާރު ވާނީ މަޝްވަރާ ފަށާފައި. މުޅި ދުނިޔޭގައި ވެސް ފުރަތަމަ ފަހަރަށް ގާއިމުކުރެވޭ އަންޑާ ވޯޓާ ޓަނަލް، މާލެއިން ރަސްމާލެއަށް އިރާދަކުރެއްވިއްޔާ ގުޅުވާލުމުގެ މަސައްކަތް،" އެމަނިކުފާނު ވިދާޅުވި އެވެ.
އެ ޓަނަލް އަޅަން ފީސިބިލިޓީގެ މަސައްކަތް މިހާރު ފަށާފައިވާ ކަމަށް ވެސް ރައީސް އެ ދުވަހު ވިދާޅުވި އެވެ.
"އެ ޓަނަލް ވެގެންދާނީ، އެ ޓަނަލްގައި ދުއްވާ ޓްރެއިންގެ ސަބަބުން، ޓްރެއިންގައި ދާއިރުގައި ކަނޑުއަޑީގެ ރީތި މަންޒަރުތައް ވެސް ފެންނަ ޓަނަލަކަށް. އެ މަސައްކަތް ކުރުމަށްޓަކައި އަޅުގަނޑުމެން އެކަމުގެ ގާބިލްކަން ހުރި ކުންފުނިތަކާ އެކީގައި މިހާރު ވަނީ ފީޒިބިލިޓީ މަސައްކަތް ފަށާފައި،" ރައީސް މުއިއްޒު ވިދާޅުވި އެވެ.
