ޗައިނާގައި އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕަށް ކޮލިފައިވުމަށް ކުޅޭ ކޮލިފައިން ގްރޫޕް އެފްގައި މިއަދު ކުޅުނު މެޗުން ރާއްޖެ އަތުން 2-0 އިން ކުރިހޯދައި ޔަމަނުން ދެ ވަނަ މޮޅު ހާސިލްކޮށްފި އެވެ.
ޔަމަނުން ވަނީ ފުރަތަމަ މެޗުގައި ޓިމޯ ލެސްޓޭ އަތުން 3-1 އިން މޮޅުވެފަ އެވެ. ދެ ވަނަ މެޗުން ރާއްޖެ ބަލިކޮށް ޔަމަނުން އެއް ވަނައިގައި އޮތީ ހަ ޕޮއިންޓް ހޯދައިގެންނެވެ. ރާއްޖެ އަތުން ފުރަތަމަ މެޗުގައި 4-0 އިން މޮޅުވި އިންޑޮނޭޝިއާ ދެ ވަނައިގައި އޮތީ ތިން ޕޮއިންޓް ހޯދައިގެންނެވެ.
ކޮލިފައިން މެޗުތައް ހޯސްޓްކުރާ، އިންޑޮނޭޝިއާ އިން ދެ ވަނަ މެޗުގައި، މިރޭ ކުޅޭނީ ތިން ވަނައިގައި އޮތް ޓިމޯ ލެސްޓޭއާ އެވެ. ދެ މެޗުން ބަލިވެ، ހަތަރެއްގައި އޮތް ރާއްޖެ އަށް އަދި ޕޮއިންޓެއް ނުލިބެ އެވެ.
ކޮންމެ ގްރޫޕެއްގެ އެއް ވަނަ ޓީމަށް އޭޝިއަން ކަޕްގެ ޖާގަ ލިބޭއިރު، ކޮލިފައިން 10 ގްރޫޕްގެ ދެ ވަނަ އަށް ދާ ޓީމުތަކުގެ ތެރެއިން ފަސް ޓީމަކަށް ވެސް އޭޝިއަން ކަޕްގެ ޖާގަ ލިބޭނެ އެވެ.
ޔަމަނާ ދެކޮޅަށް މިއަދު ރާއްޖޭން ނެރުނު ފުރަތަމަ އެގާރަ ކުޅުންތެރިން.--- ފޮޓޯ: އަދަދު ސްޕޯޓްސް
މިއަދުގެ މެޗު ފަށައިގެން އަށް ވަނަ މިނިޓްގައި ޔަމަނުން ލީޑުނެގި އެވެ. މި ލަނޑު ޖެހީ، އަބްދުލް އަޒީޒް އަވާދު މަސްނޯމް ދިން ބޯޅައަކުން އޭރިއާތެރެއިން، އާދިލް އައްބާސް ގާސިމް އެވެ.
ރާއްޖޭގެ ފަރާތުން ފަށައިގެން އާދައިގެ ކުޅުމެއް ފެނިގެންދިޔައިރު، މެޗުގެ 36 ވަަނަ މިނިޓްގައި ޔަމަނުން ދެ ވަނަ ލަނޑު ޖެހި އެވެ. މި ލަނޑު ޖެހީ، އޭރިއާ ރޮނގުކައިރިން ކުރިއަށް ޖެހިލުމަށް ފަހު، ތިރިތިރިން ބޯޅަ ފޮނުވާލައިގެން، އަންވަރު ހުސެއިން އަލް ތުރައިގީ އެވެ.
މި މެޗުގައި ރާއްޖޭގެ ކެޕްޓަންކަން ކުރި، ގޯލްކީޕަރު، މުހައްމަދު ޔާމީން ވަނީ ދެ ވަަނަ ހާފުގައި ޔަމަނުން ފޮނުވާލި ގިނަ ހަމަލާތަކެއް ހުއްޓުވައިފަ އެވެ. އެ ގޮތުން، ހުސްކޮށް އޭރިއާތެރޭގައި ހުރެފައި ޖެހި ދެ ބޯޅައެއް އޭނާ މަތަކުރި އެވެ.
މެޗުގައި ޔަމަނުން ތިން ވަނަ ލަނޑު ޖެހީ، 90 ވަނަ މިނިޓްގަ އެވެ. މިއީ، ބަދަލަކަށް ކުޅެން އެރި ޔަމަނުގެ މުހައްމަދު އިސާމް އަލް އަވާމީ ޖެހި ގޯލެކެވެ. އޭނާ އަރިމަތީގައި ހުރެފައި ހުރަހެއް ގޮތަށް ނަގައިދިން ބޯޅަ ޕަންޗް ކޮށްލަން އުޅުމުގެ ތެރޭގައި ކީޕަރު ޔާމީން އަތްމަތިން ބޯޅަ ވަނީ ގޯލަށެވެ.
ކައުންޓަ އެޓޭކުގައި ރާއްޖޭގެ ހަމަލާއެއް އުފެއްދޭތޯ މަސައްކަތްކުރިއިރު، ބަދަލަކަށް ކުޅެން އެރި، ރާއްޖެ ޓީމުގެ މުހައްމަދު އިޒާން އަލީ އަށް ފުރުސަތުތަކެއް ލިބުނެވެ. އެކަމަކު، ފަހަތަށް ފައިބައިގެން، ޔަމަނުން ޑިފެންސްކުރުމުގައި ދެއްކި ތަފާތުގެ ސަބަބުން، އެ ޓީމުގެ ކީޕަރުން ޓެސްޓްކޮށްލެވޭ ވަރުގެ ހަމަލާތަކެއް ފޮނުވައިނުލެވުނެވެ. މި މެޗުގެ ދެ ވަނަ ހާފުގައި ޔަަމަންގެ ކީޕަރު، އޮސާމާ އަލް މޮހްރެފް އަށް އަނިޔާވެގެން އޭނާގެ ބަދަލުގައި، ކީޕަރު ވަދާ އަންވަރު އަހުމަދު ވަނީ ކުޅެން ނުކުމެފަ އެވެ.
ގްރޫޕް ސްޓޭޖުގެ ފަހު މެޗުގައި ރާއްޖޭން ކުޅޭނީ އަންނަ އާދިއްތަ ދުވަހު ޓިމޯ ލެސްޓޭއާ ދެކޮޅަށެވެ.
