ޗައިނާގައި އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕަށް ކޮލިފައިވުމަށް ކުޅޭ ކޮލިފިކޭޝަންގައި ރާއްޖޭން ކުޅޭ ދެ ވަނަ މެޗުގައި މިއަދު ޔަމަނާ ދެކޮޅަށް ރަނގަޅަށް މަސައްކަތްކޮށް ފުރަތަމަ މެޗުގައި އިންޑޮނޭޝިއާއާ ދެކޮޅަށް ކުޅުނު ވަރަށް ވުރެ ރަނގަޅަށް ކުޅެންޖެހޭ ކަމަށް ޓީމުގެ ގޯލްކީޕަރު މުހައްމަދު ޔާމީން ބުނެފި އެވެ.
ގްރޫޕް އެފްގެ އެއް ވަނައިގައި މި ވަގުުތު އޮތީ ފުރަތަމަ މެޗުން ރާއްޖެ އަތުން 4-0 އިން މޮޅުވެ، ތިން ޕޮއިންޓާ އެކު އިންޑޮނޭޝިއާ އެވެ. ދެ ވަނައިގައި އޮތް ޔަމަނުން ވެސް ތިން ޕޮއިންޓް ހޯދާފައިވާއިރު، އެ ޓީމުން ވަނީ ފުރަތަމަ މެޗުގައި ޓިމޯ ލެސްޓޭ އަތުން 3-1 އިން މޮޅުވެފަ އެވެ. ތިން ވަނައިގައި އޮތް ޓިމޯ ލެސްޓާ އާއި ހަތަރެއްގައި އޮތް ރާއްޖެ އަށް އަދި ޕޮއިންޓެއް ނުލިބެ އެވެ.
ފުރަތަމަ މެޗުގައި އިންޑޮނޭޝިއާއާ ދެކޮޅަށް ރާއްޖޭން ފުރަތަަމަ ހާފު ނިންމާލީ 0-0 ގައި އޮވެގެންނެވެ. މި ހާފުގައި ކީޕަރު ޔާމީން ވަނީ އިންޑޮނޭޝިއާ އިން ފޮނުވާލި ރަނގަޅު ހަމަލާތަކެއް ހުއްޓުވައިފަ އެވެ. އިންޑޮނޭޝިއާ އިން ދެ ވަނަ ހާފުގައި ފަސް މިނިޓް ތެރޭ ތިން ގޯލު ޖެހިއިރު، އަނެއް ލަނޑު ޖެހީ، ތިން ވަނަ ލަނޑު ޖެހިތާ ނުވަ މިނިޓް ފަހުންނެވެ. ރާއްޖެ އަށް ވެސް އެ މެޗުގައި ލަނޑު ޖަހަން ފުުރުސަތުތަކެއް ލިބި ބޭނުންނުކުރެވިދިޔަ އެވެ.
"ފުރަތަމަ އަސްލު ހޯސްޓްއާ (ކޮލިފައިން ބާއްވާ ގައުމު އިންޑޮނޭޝިއާއާ) ދެކޮޅަށް ކުޅެން ޖެހޭތީވެ އެ މީހުން ފަރިތަވާނެތާ މުބާރާތް ވެސް ކުޅޭ. ފުރަތަމަ ހާފު ވަރަށް ރަނގަޅަށް ދިޔައީ. އެންމެން ވެސް ވަރަށް މަސައްކަތްކުރި، އެކަމަކު، ދެ ވަނަ ހާފު ކުޑަ ހިނދުކޮޅަކުން ކޮންސަންޓްރޭޝަން ގެއްލިގެންދިޔައީމަ ގޯލުތަކެއް ވަނީ. އެ ގޯލުތަކުން އަހަރެމެން އަތުން މެޗު ގެއްލިގެންދިޔައީ،" އިންޑޮނޭޝިއާ މެޗާ ބެހޭގޮތުން، ޔާމީން ބުންޏެވެ.
އޭނާ ބުނީ ޔަމަނުން ކުޅުނު ފުރަތަމަ މެޗުގައި މޮޅުވެފައި އޮތް ނަމަވެސް، ރާއްޖެ އަށް ރަނގަޅަށް މަސައްކަތްކުރެވިއްޖެނަމަ ނަތީޖާއެއް ނެރެވިދާނެ ކަމަށެވެ.
"ދެން އަހަރެމެން މީނީ، ޔަމަނާ އެއްކޮށް، މާދަމާ ހަވީރު (މިއަދު ހަވީރު)، ޔަމަން، ފުރަތަމަ މެޗުން އޭނީ 3-1 އިން ޓިމޯ ލެސްޓޭ ކައިރިން މޮޅުވެފައި، ދެން، (ޔަމަން) ވަކި މޮޅެއް ނުވާނެ. އެކަމަކު، މަސައްކަތް ކުރާނަން، މަސައްކަތް ކޮށްގެން ރަނގަޅު ނަތީޖާއެއް ނެރެވޭނެ،" ޔާމީން ބުންޏެވެ.
މިދިޔަ މަހު ނޭޕާލުގައި ކުރިއަށްދިޔަ ސާފް 20 އަހަރުން ދަށުގެ މުބާރާތުގައި ވެސް މޮޅު ކުޅުމެއް ދެއްކި ޔާމީން އަކީ ޓީމު ލީޑުކުރުމުގައި ވެސް މުހިންމު ކުޅުންތެރިއެކެވެ. ސާފް އަށް ދިޔަ 12 ވަރަކަށް ކުޅުންތެރިން މި ފަހަރުގެ ސްކޮޑުގައި އެކި ސަބަބުތަކާ ހެދި ނުހިމެނޭއިރު، ޖުމްލަކޮށް ބަލާއިރު، އާ ކުޅުންތެރިންނާ އެކު ވެސް އިންޑޮނޭޝިއާއާ ދެކޮޅަށް ރާއްޖޭން ރަނގަޅު ކުޅުމެއް ދެއްކި އެވެ.
ޔަމަން އާއި ރާއްޖެ ކުޅޭ މެޗު ފަށާނީ، ރާއްޖެ ގަނޑިން މިއަދު މެންދުރު 1 ޖަހާއިރު އެވެެ.
