ޗައިނާގައި އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕަށް ކޮލިފައިވުމަށް ކުޅޭ ބުރުގައި، ކޮލިފައިން ގްރޫޕް އެފްގައި މިރޭ ކުޅުނު މެޗުގެ ދެ ވަނަ ހާފުގެ ފުރަތަމަ ވިއްސަކަށް މިނިޓް ތެރޭ ޖެހި ގޯލުތަކާ އެކު، 4-0 އިން ރާއްޖެ އަތުން އިންޑޮނޭޝިއާ މޮޅުވެއްޖެ އެވެ.
މި ގްރޫޕްގެ ފުރަތަމަ މެޗުން މިއަދު ހަވީރު ޔަމަން އިން ވަނީ 3-1 އިން ޓިމޯ ލެސްޓޭ ބަލިކޮށްފަ އެވެ.
ޖަކާޓާގެ މަދްޔާ ސްޓޭޑިއަމްގައި މިރޭ ކުޅުނު މެޗުގައި ރާއްޖޭން ފުރަތަމަ ހާފުގައި އިންޑޮނޭޝިއާ ކައިރީގައި ރަނގަޅަށް ކުޅެ ލަނޑު ޖަހާނެ ފުރުސަތުތައް ވެސް ހޯދި އެވެ. އެ ގޮތުން، މި ހާފުގައި ރާއްޖޭގެ ގޯލްކީޕަރު، މުހައްމަދު ޔާމީން ރަނގަޅު ހަމަލާތަކެއް ދިފާއުކުރިއިރު، އިންޑޮނޭޝިއާގެ އެޓޭކްތައް ހުއްޓުވުމުގައި ރާއްޖޭގެ ޑިފެންޑަރުން ރަނގަޅު މަސައްކަތްތަކެއް ކުރި އެވެ. އަދި ރާއްޖޭގެ ދެ ފުލްބެކުން ކަމަށްވާ އަހުމަދު ނައްވާފު ފައުޒީ އާއި މުހައްމަަދު އައިމަން އަލީ ވަނީ ރަނގަޅު ކުޅުމެއް ދައްކައިފަ އެވެ.
އެ ގޮތުން، ރާއްޖޭގެ މެދުތެރޭގައި ރަނގަޅު ކުޅުމެއް ދެއްކި، އަހުޒަމް ރަޝީދު ހަމަޖެހިލައިފައި އަރިމަތިން ބޯޅަ ހިފައިގެން އަރައި، އޭރިއާތެރޭގައި ހުރި ޓީމުގެ ކެޕްޓަން، ޝަނާން ރަޝާދު އަށް ދިން ބޯޅަ އެއް ފަހަރުން ފޮނުވާލިއިރު، ކީޕަރު، އިކްރާމް އަލްޖިފާރީ ވަނީ މަތަކޮށްފަ އެވެ.
ކައުންޓަ އެޓޭކުގައި ރާއްޖެ ޓީމުގެ އަބްދުﷲ ލޫތު އިބްރާހިމް (ސާނޭ) ބޯޅަ ހިފައިގެން އަރައި އެޓޭކެއް ކުރެވޭތޯ ރަނގަޅު މަސައްކަތްތަކެއް ކުރި އެވެ.
ރާއްޖެ އަށް މައްސަލަ ދިމާވީ ދެ ވަނަ ހާފު ފަށައިގެން ހެދުނު ގޯސްތަކެއްގެ ސަބަބުންނެވެ. އެ ގޮތުން، އިންޑޮނޭޝިއާ އިން ވަނީ ފަސް މިނިޓް ތެރޭ ތިން ގޯލު ޖަހައިފަ އެވެ.
ވިހި އަހަރުން ދަށުގެ އޭޝިއަން ކަޕް ކޮލިފައިންގައި ރާއްޖޭން އިންޑޮނޭޝިއާއާ ދެކޮޅަށް ކުޅުނު މެޗުގެ ތެރެއިން.---- ފޮޓޯ: އަދަދު ސްޕޯޓްސް
އެ ގޮތުން، ފުރަތަމަ ލަނޑު ޖެހީ، މެޗުގެ 52 ވަނަ މިނިޓްގައި، އޭރިއާތެރެއިން ލިބުނު ފުރުސަތަކުން އަދިތުޔާ ވަރްމާން އެވެ. އޭނާ ޖެހި ބޯޅަ ކަނަށް ވަނީ ކީޕަރު ޔާމީން އަތުގައި ޖެހިފަ އެވެ. އޭގެ ތިން މިނިޓް ފަހުން، އިންޑޮނޭޝިއާގެ ދެ ވަނަ ލަނޑު ޖެހީ ބަދަލަކަށް ކުޅެން އެރި، ފީގޯ ޑެނިސް ސަޕުޓްރަނަންޓޯ އެވެ. އިންޑޮނޭޝިއާގެ ކެޕްޓަން، ޑޯނީ ޓްރީ ޕަމުންގްކަސް ނަގައިދިން ހުރަހަކުން އޭރިއާބޭރުން ފީގޯ ތިރިތިރިން ޖެހި ޝޮޓް ގޯލަށް ވަނީ ޑިފެންޑަރުންގެ ތެރެއިން އައިސް އެވެ. އަދި މެޗުގެ 57 ވަަނަ މިނިޓްގައި، އިންޑޮނޭޝިއާ އިން ތިން ވަަނަ ލަނޑު ޖެހީ، ހިލޭ ޖެހުމަކުން ޓޯނީ ފިރްމާންސިއާ އެވެ. އޭނާ އޭރިއާތެރެއަށް ނަގައިދިން ބޯޅަ ގޯލަށް ވަނީ އެއްވެސް ކުޅުންތެރިއަކު ގައިގައި ނުޖެހި އެވެ.
އިންޑޮނޭޝިއާ އިން ތިން ގޯލުގެ ލީޑެއް ނެގި ފަހުން، ރާއްޖެ އަށް އަނެއްކާ ވެސް ގޯލެއް ޖަހަން ހުސް ފުރުސަތެއް ލިބުނެވެ.
މެޗުގެ 60 ވަަނަ މިނިޓްގައި، ރާއްޖޭގެ އަހުޒަމް ހުސްކޮށްލާފައި އޭރިއާތެރެއިން، މުޒްދާން ހަސަން އަށް ދިން ބޯޅަ އެއް ފަހަރުން ފޮނުވާލުމުން، ކީޕަރު އިކްރާމް އަތުގައި ޖެހިފައި ރީބައުންސް ލިބުނީ ޝަނާން އަށެވެ. ޝަނާން ފޮނުވާލި ޝޮޓް ވެސް އަމާޒުވީ ކީޕަރު އިކްރާމް އަތަށެވެ.
އިންޑޮނޭޝިއާ ޓީމުގައި އެެހެން ގައުމުތަކަށް އުފަން ހަތަރު ވަރަކަށް ކުޅުންތެރިން ކުޅުނުއިރު، އެ ޓީމުގެ ހަތަރު ވަަނަ ލަނޑު ޖެހީ، ނެދަލެންޑްސް އަށް އުފަން ފޯވާޑް، ޖެންސް ރަވެން އެވެ. މެޗުގެ 66 ވަނަ މިނިޓްގައި ރަވެން މި ލަނޑު ޖެހީ އޭރިއާތެރެއިން ހުސްކޮށް ލިބުނު ފުރުސަތަކުންނެވެ. ކޯނަރަކުން އޭރިއާތެރެއަށް އައި ހުރަހެއްގައި އިންޑޮނޭޝިއާގެ އަދިތުޔާ ފައިން ޖައްސާލި ބޯޅަ ރަވެން ވަނީ ހުސް ގޯލަަކަށް ފޮނުވާލައިފަ އެވެ.
ގްރޫޕްގެ ދެ ވަނަ މެޗުގައި ރާއްޖޭން ހުކުރު ދުވަހު ރާއްޖެ ގަނޑިން 1 ޖަހާއިރު ކުޅޭނީ، ޔަމަންއާ އެވެ.
