ޗައިނާގައި އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕަށް ކޮލިފައިވުމަށް ކުޅޭ ކޮލިފިކޭޝަންގައި ވާދަކުރާ ރާއްޖޭގެ 20 އަހަރުން ދަށުގެ ޓީމު މިހާރު އޮތީ ވަރަށް ބޮޑަށް ބަދަލުވެފައި ކަމަށާއި އެހެން ނަަމަވެސް ކުރާ މަސައްކަތަށް ބަލާއިރު، ޓީމާ މެދު އިތުބާރު އެބައޮތް ކަމަށް ޓީމުގެ ކެޕްޓަން، ޝަނާން ރަޝާދު ބުނެފި އެެވެ.
ރާއްޖޭގެ 20 އަހަރުން ދަށުގެ ގައުމީ ޓީމުން ވަނީ މިދިޔަ މަހު، ނޭޕާލުގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕްގައި ކުޅެފަ އެވެ. ސާފް ޗެމްޕިއަންޝިޕާއި މި ފަަހަރުގެ އޭޝިއަން ކަޕް ކޮލިފައިންއާ އެކު، ރާއްޖޭން ތަމްރީންތައް ފެށި ނަމަވެސް، އޭ ލެވަލް ޓެސްޓުތަކާއި އަނިޔާގެ މައްސަލަތައް ކުރިމަތިވުމާ ހެދި، އޭޝިއަން ކަޕް ކޮލިފައިން އަށް ގެންނަން ޖެހުނު ގައުމީ ޓީމަށް ވަނީ ބޮޑެތި ބަދަލުތަކެއް އަތުވެފަ އެވެ. އެކަން، ޓީމުގެ ކޯޗު އަހުމަދު ޝާކިރު (ޝާކިއްޓެ) ވެސް ވަނީ ފާހަގަކޮށްފަ އެވެ.
"އަސްލު މި ޓީމު މި އޮތީ ވަރަށް ބޮޑަށް ބަދަލުވެފައި. އެހެންވީމަ، ކުޑަކުޑަ އުނދަގޫތަކެއް ދިމާވި، ނަމަވެސް އެ މިހާރު ޓީމާ އެކު މަސައްކަތްކޮށްލީމަ ހުރިހާ ކުޅުންތެރިން ހަމަ ދަސްވެއްޖެ ހުރިހާ އެންމެނަށް ވެސް. އިންޝާﷲ ރަނގަޅުވާނެ،" ޓީމު ބަދަލުވުމަށް އިޝާރާތްކޮށް، ސާފް ޗެމްޕިއަންޝިޕްގައި ވެސް ޓީމުގެ ކެޕްޓަންކަން ކުރި ޝަނާން، ބުންޏެވެ.
އޭޝިއަން ކަޕް ކޮލިފައިންގައި ރާއްޖެ ގްރޫޕްގެ މެޗުތައް މިއަދު އިންޑޮނޭޝިއާގައި ފަށާއިރު، މި ދެ ޓީމުގެ އިތުރުން، ދެން މި ގްރޫޕްގައި ހިމެނެނީ، ޔަމަން އާއި ޓިމޯ ލެސްޓޭ އެވެ.
ރާއްޖޭން ފުރަތަމަ މެޗުގައި މިއަދު އިންޑޮނޭޝިއާއާ ކުޅޭނެ އެވެ.
ޝަނާން ބުނީ، މި ވަގުތަށް ބަލާއިރު ވެސް އެންމެ ވަރުގަދަ ޓީމު ކަމަށް ބެލެވެނީ އިންޑޮނޭޝިއާ ކަމަށެެވެ. އެހެންކަމުން، ފުރަތަމަ މެޗުގައި އެ ޓީމާ ދެކޮޅަށް ކުޅެން ޖެހޭއިރު، ޕްރެޝަރާއި ހުރިހާ ކަމަކަށް ވިސްނައިގެން ތައްޔާރުވެގެން ނުކުންނާނެ ކަމަށް ޝަނާން ވަނީ ބުނެފަ އެވެ.
"އިންޑޮނޭޝިއާ އެ އަންނަނީ ވަރަށް ބައިވަރު މެޗުތަކެއް ކުޅެފައި. އެ މީހުން ގައުމުން ބޭރުގަޔާއި ގައުމުގައި ވަރުގަދަ ޓީމުތަކާ އެކު ކުޅެފައި. އެ މީހުންނަށް ވުރެ ވަރުގަދަ ޓީމުތަކާ ކުޅެފައި، އެހެންވީމަ ބެލެވެނީ (ރާއްޖެ އަށް) ވަރަށް އުނދަގޫތަކެއް ވާނެ ކަމަށް. އެ ހުރިހާ ކަމަކަށް ޓީމު ވަރަށް ތައްޔާރުވެގެން ވަރަށް ބަލައިގެން މި ނުކުންނަނީ،" ޝަނާން ބުންޏެވެ.
މި އަހަރު ތެރޭ ރަސްމީ މެޗުތަކާއި އަދި އެކުވެރިކަމުގެ މެޗުތައް ހިމަނައިގެން، ގިނަ އަދަދެއްގެ މެޗުތަކެއް ވަނީ ކުޅެފަ އެވެ. އޭގެ ތެރޭގައި، ޔޫކްްރެއިންގެ 23 އަހަރުން ދަށުގެ ޓީމާ ދެކޮޅަށް ކުޅުނު މެޗާއި އިޓަލީގެ 21 އަހަރުން ދަށުގެ ޓީމާ ދެކޮޅަށް ކުޅުނު މެޗާއި ދެކުނު ކޮރެއާގެ 21 އަހަރުން ދަށުގެ ޓީމާ ދެކޮޅަށް ކުޅުނު މެޗުގެ އިތުރުން، ޖަޕާނުގެ 19 އަހަރުން ދަށުގެ ޓީމާ ދެކޮޅަށް ކުޅުނު މެޗު ހިމެނެ އެވެ.
އިންޑޮނޭޝިއާ އާއި ރާއްޖެ ކުޅޭ މެޗު ފަށާނީ ރާއްޖެ ގަޑިން މިއަދު ހަވީރު 17:30 ގަ އެވެ.
