ވެރިކަން ކުރާ ޕީއެންސީގެ ހަރުގެ ޖަލްސާގައި ވާހަކަދައްކަވަމުން "ހަމަ ގަސްތުގައި ރާވައިގެން ތިމަންނައަށް ވެރިކަން ހޯދަންވެގެން ރައީސް ޔާމީނު ޖަލުގައި ބޭއްވީ މުއިއްޒު،" ކަމަށް އަބްދުއްރަހީމްއަށް ވިދާޅުވެވުނީ އެއީ ހަގީގަތަށް ވީމާ ކަމަށް ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕަލްސް ނެޝަނަލް ފްރަންޓު، ޕީއެންއެފްގެ ޖަލްސާގައި ވާހަކަދައްކަވަމުން ޔާމީން ވިދާޅުވީ ﷲ ކަންކަން މެދުވެރި ކުރައްވާ ގޮތުގެ ސިއްރުތަކެއް ހުންނަ ކަމަށާއި އަބްދުއްރަހީމްއަށް އޮޅިގެން ހަގީގަތް ވިދާޅުވެވުނީ އެފަދަ އިއްތިފާގަކުން ކަމަށެވެ.
"އަބްދުއްރަހީމްގެ ވާހަކައިގައި ރައީސް ޔާމީން ޖަލުގައި ބޭއްވީ އަމިއްލައަށް ވެރިކަން ހޯދާށޭ، ހަމަ ސީދާ މުއިއްޒު ކުރި ކަމެކޭ އެ ބުނީ، އެ ބުނެވުނީ ހަމަ ރަނގަޅަށް އިނގޭތޯ، އެއީ ﷲ މެދުވެރި ކުރެއްވި ވަރުގަދަ އިއްތިފާގެއް، އޭނާގެ ދުލުން އެ ބުނެވުނީ، އޭނަގެ ދުލުން އެ ބުނީ،" ޔާމީން ވިދާޅުވި އެވެ.
އެ ވާހަކައަށް ބާރު ދިނުމަށް ހެކި ދައްކަވަމުން ޔަމީން ވިދާޅުވީ އެމަނިކުފާނު ގެއަށް ބަދަލު ކުރީ ރައީސް މުއިއްޒު އެދިވަޑައިގަނެގެން ކަމަށް ވިދާޅުވެ ދެއްކެވި ވާހަކައަކީ ވެސް ހަގީގަތެއް ނޫންކަން އަބްދުއްރަހީމްގެ ވާހަކައިން ސާބިތުވެއްޖެ ކަމަށެވެ.
އެގޮތުން އޭރުގެ ރައީސް، އިބްރާހިމް މުހައްމަދު ސޯލިހުއާ އިންތިހާބީ ރައީސްގެ ގޮތުގައި ރައީސް މުއިއްޒު ބައްދަލު ކުރެއްވިއިރު، ޔާމީން އިންނެވީ ގޭ ބަންދަށް ބަދަލު ކުރަން ނިންމައި ލޯންޗަށް އަރުވާފައި ކަމަށް ވިދާޅުވިކަން އެމަނިކުފާނު ފާހަގަކުރެއްވި އެވެ.
"[ގޭބަންދަށް ބަދަލު ކުރުމުން] އަޅުގަނޑާ ސަލާމް ކުރަމުންދިޔައިރު މައިކު އަތުލާފައި މީހަކު ލައްވައި ބުނުވި މިއީ ރައީސް މުއިއްޒު ނުތަތަ ހޮވިވަޑައިގެންފައި ހުރި ރައީސް މުއިއްޒު އިބްރާހިމް މުހައްމަދު ސޯލިހު ކައިރީގައި ދަންނަވައިގެންނޭ އިލްތިމާސް ކޮށްގެންނޭ ރައީސް ޔާމީން ގެއަށް ގެނެސްފައި އެހުރީ، ހަމަ އަޑުގަދަ ކުރާއިން ގޮވަމުންދިޔަ،،" ޔާމީން ވިދާޅުވި އެވެ.
ރައީސް މުއިއްޒު ވެސް އަދި އަބްދުއްރަހީމް ވެސް އޭރުގެ ރައީސްގެ އަރިހުން ޔާމީނު މިނިވަން ކުރުމަށް ނުދަންނަވާކަން އެނގޭ ކަމަށާއި އެ ވާހަކަ ދައްކަނީ ކަށަވަރު ވީމާ ކަމަށް ޔާމީނު ވިދާޅުވި އެވެ. އަދި، ރައީސް މުއިއްޒު ނިންމަވާފައި އޮތީ މަޖިލިސް އިންތިހާބު ނިންމާފައި ޔާމީނު މިނިވަން ކުރަން ކަމަށް އެމަނިކުފާނު ތުހުމަތު ކުރެއްވި އެވެ.
"ހަމަ ހަގީގަތުގައި ވެސް، ހަމަ ހަގީގަތުގައި ވެސް އެ ބޭފުޅުން ބޭނުންފުޅުވީ އަޅުގަނޑު ޖަލުގައި ބާއްވައިގެން އެ ބޭފުޅުން އިންތިހާބަށް ނެރޭ މީހަކު ނެރެން،" ޔާމީން ވިދާޅުވި އެވެ.
ވެރިކަން ހޯދުމުގެ ބޭނުމުގައި ރައީސް ޔާމީން ޖަލުގައި ބޭއްވީ ރައީސް މުއިއްޒު ކަމަށް އަބްދުއްރަހީމްއަށް ވިދާޅުވެވުނީ އޮޅިގެންނެވެ. އެހެން ވިދާޅުވުމަށް ފަހު ވަގުތުން އެކަން އިސްލާހު ކުރައްވައި އެކަން ކުރެއްވީ ޑރ. ޖަމީލް ކަމަށް އެމަނިކުފާނު ވިދާޅުވި އެވެ.
އަބްދުއްރަހީމްގެ ވާހަކަފުޅުގައި ރައީސް ޔާމީނަށް ވަރުގަދަ ބަހުގެ ހަމަލާތަކެއް އެރޭ ދެއްވި އެވެ. އެގޮތުން ޔާމީނުގެ އެކައުންޓުތަކުގައި ހުރި ފައިސާއަކީ ކިހިނެއް ހޯދި ފައިސާއެއްތޯ ސުވާލު އުފައްދެވި އެވެ. އަދި މަޖިލިސް އިންތިހާބުގައި ޕީއެންއެފްއަށް އެއްވެސް ގޮނޑިއެއް ރައްޔިތުން ނުދީ ބުނީ ތިތިބީ ވައްކަން ކޮށްގެން ކަމަށް އަބްދުއްރަހީމް ވިދާޅުވި އެވެ.
