އިނގިރޭސި ފުޓްބޯޅައިގެ ހިޔަނީގެ ތެރޭގައި އޮތް ސްކޮޓްލެންޑުން ޔޫރޯ ފުޓްބޯޅަ މުބާރާތުގައި މި ވާދަކުރަނީ، ހަތަރު ވަނަ ފަަހަރަށެވެ. ސްކޮޓްލެންޑް އެންމެ ފަހުން ޔޫރޯ ފުޓްބޯޅަ މުބާރާތެއްގައި ކުޅެފައިވަނީ 2020 ވަނަ އަހަރު އެވެ. އޭގެ ކުރިން، ވާދަކުރީ ދެ ފަހަރު އެވެ. އެއީ، 1992 އާއި 1996 ވަނަ އަހަރު އެވެ.
ސްޓީވް ކްލާކްގެ ކޯޗުކަމުގައި ކުޅެމުން އަންނަ ސްކޮޓްލެންޑް، ޔޫރޯ އަށް ކޮލިފައިވީ، ކޮލިފައިން ގްރޫޕް އޭގެ ރަނަރަޕްގެ ގޮތުގަ އެވެ. ސްޕެއިނާ އެކު، ސްކޮޓްލެންޑް ހިމެނުނު މި ގްރޫޕްގައި އެ ޓީމުން ކުޅުނު އަށް މެޗުގެ ތެރެއިން ވަނީ ފަސް މެޗުން މޮޅުވެފަ އެވެ. ބަލިވީ އެންމެ މެޗަކުންނެވެ. ސްކޮޓްލެންޓް ކޮލިފައިވީ، ނޯވޭ ފަހަތަށް ޖައްސާލުމަށް ފަހު އެވެ.
މިހާތަނަށް ސްކޮޓްލެންޑުން ޔޫރޯ ފުޓްބޯޅަ މުބާރާތުގައި ކުޅުނު ތިން ފަހަރު ވެސް ކެޓީ ގްރޫޕް ސްޓޭޖުންނެވެ. އެ ގޮތުން، ފުރަތަމަ ދެ ފަހަރު ގްރޫޕް ސްޓޭޖުގެ އެއް މެޗުން މޮޅުވި އެވެ. އެކަމަކު، އެންމެ ފަހުން، ކުޅުނު ޔޫރޯގައި ސްކޮޓްލެންޑް، އެނބުރި ގައުމަށް ދާން ޖެހުނީ މެޗަކުން މޮޅެއް ނުލިބި އެވެ. އެ ޓީމު ކުޅުނު ތިން މެޗުގެ ތެރެއިން ދެ މެޗުން ބަލިވިއިރު، އެއް މެޗުން ވަނީ އެއްވަރުވެފަ އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ސްކޮޓްލެންޑް ހިމެނޭ ގްރޫޕަށް ބަލާއިރު، ޖަރުމަނާއި ހަންގޭރީ އަދި ސްވިޒަލެންޑާ އެކު އޮތުމުން، ގްރޫޕް ފަހަނައަޅައި ކުރިއަށް ދިއުމުގެ ފުރުސަތު އެ ޓީމަށް އެބައޮތް ކަމަށް ގިނަ ބަޔަކު ގަބޫލުކުރެ އެވެ.
ސްކޮޓްލެންޑް ޓީމުގައި ހިމެނޭ އެންމެ ފާހަގަކޮށްލެވޭ ކުޅުންތެރިއަކީ، އެ ޓީމުގެ ކެޕްޓަން، އެންޑީ ރޮބަޓްސަން އެވެ. ރޮބަޓްސަން އަކީ، އިނގިރޭސި ޕްރިމިއާ ލީގުގެ ގަދަބާރު ލިވަޕޫލަށް ކުޅެމުން އަންނަ ކުޅުންތެރިއެކެވެ.
