ޒިއުރިކް (މާޗް 19) - ތުރުކީ ލީގުގައި އާދިއްތަ ދުވަހުގެ ރޭ ޓްރަބްޒޯންސްޕޯ އާއި ފެނަބާޗޭ ބައްދަލުކުރި މެޗުގައި ޓްރަބްޒޯންސްޕޯރުގެ ސަޕޯޓަރުންނާއި ފެނަބާޗޭގެ ކުޅުންތެރިންނާދެމެދު ހިނގި ހަމަނުޖެހުންތަކާ ގުޅިގެން ފިޔަވަޅު އަޅަންޖެހޭ ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ.
ޓްރަބްޒޯންސްޕޯގެ ދަނޑުގައި ކުޅުނު މެޗު ފެނަބާޗޭ 3-2 އިން ކާމިޔާބުކުރީ މެޗުގެ ފަހުކޮޅު މިޝޭލް ބަޓްޝުއާއީ ޖެހި ލަނޑުންނެވެ.
މި މެޗުން މޮޅުވުމުން ފެނަބާޗޭގެ ކުޅުންތެެރިން އުފާފާޅުކުރަމުންދިޔަ ވަގުތު، ޓްރަބްޒޯންސްޕޯގެ ސަޕޯޓަރުން ވަނީ ދަނޑު މައްޗަށްއަރައި، ފެނަބާޗޭގެ ކުޅުންތެރިންނާ ދިމާކޮށް، ހަމަލާ ދިނެވެ. އެ ވަގުތުގެ ރައްދުގައި ފެނަބާޗޭގެ ބައެއް ކުޅުންތެރިން ވަނީ ޓްރަބްޒޯންސްޕޯރުގެ ސަޕޯޓަރުންނަށް ވެސް ހަމަލާދީފަ އެވެ.
އެކަމަކު، ސެކިއުރިޓީން ވަނީ ފެނަބާޗޭގެ ކުޅުންތެރިން ޗޭންޖިން ރޫމަށް ވައްދައި، އެ ޓީމަށް ހިމާޔަތްދީފަ އެވެ.
މި ހާދިސާއާ ގުޅިގެން ފީފާގެ ރައީސް އިންފަންޓީނޯ ވިދާޅުވީ އެ މެޗަށް ފަހު ފެނިގެންދިޔައީ "ގަބޫލްކުރެވޭނެ ކަންތައްތަކެއް ނޫން" ކަމަށާއި މި މައްސަލަ ބަލައި ފިޔަވަޅު އަޅަންޖެހޭ ކަމަށެވެ.
"ކަމާބެހޭ ހުރިހާ އިދާރާއަކަށް ގޮވާލަން މި ހަމަނުޖެހުމުގެ މައްސަލަ ބަލައި، މިކަމުގައި ބައިވެރިވި ފަރާތްތަކަށް ފިޔަވަޅު އަޅަން،" އިންފަންޓީނޯ ވިދާޅުވިއެވެ.
ތުރުކީގެ އިންޓީރިއާ މިނިސްޓަރު އަލީ ޔެރްލިކާޔާ ވިދާޅުވީ ދަނޑަށް އެރި މީހުން ދެނެގަނެ، އެ ފަރާތްތަކާމެދު ފިޔަވަޅުއަޅާނެ ކަމަށެވެ.
ތުރުކީ ފުޓްބޯޅައިގައި ހަމަނުޖެހުމާއި މާރާމާރީގެ މައްސަލަތައް މި ފަހަކަށް އައިސް ވަނީ ގިނަވެފައެވެ. އެ ގޮތުން މީގެ މަހެއްހާ ދުވަސް ކުރިން ސުޕަ ލީގު ކްލަބެއް ކަމަށްވާ އަންކަރާގުކޫގެ ރައީސް މެޗެއްގެ ރެފްރީ އަށް ހަމަލާ ދިން މައްސަލައިގައި ލީގުގެ މެޗުތައް މެދުކަނޑާލަންވެސް ޖެހުނެވެ.
