މިލާން (މާޗް 18) - އިޓާލިއަން ލީގުގެ އެއް ވަނައިގައި އޮތް އިންޓަ މިލާނުން ރޭ ކުޅުނު މެޗުން އެންމެ ފަހުގެ ޗެމްޕިއަން، ނަޕޯލީއާ 1-1 އިން އެއްވަރުވެއްޖެ އެވެ.
މި ނަތީޖާއާ އެކު، އިންޓަ، ލީގުގެ އެއް ވަނައިގައި އޮތީ، 14 ޕޮއިންޓުގެ ލީޑަކާ އެކު އެވެ. އިންޓަ އަށް 29 މެޗުން 76 ޕޮއިންޓް ލިބިފައިވާއިރު، ދެ ވަނައިގައި އޮތް އޭސީ މިލާނަށް ވަނީ 29 މެޗުން 62 ޕޮއިންޓް ލިބިފަ އެވެ. ތިން ވަނައިގައި އޮތް ޔުވެންޓަސް ވަނީ ރޭ ޖެނޯއާއާ 0-0 އިން އެއްވަރުވެފަ އެވެ. ޔުވެންޓަސް އަށް 29 މެޗުން ލިބިފައިވަނީ، 59 ޕޮއިންޓެވެ.
އަމިއްލަ ދަނޑުގައި ކުޅުނު އިންޓަ އިން ލީޑުނެގީ މެޗުގެ 43 ވަަަނަ މިނިޓްގަ އެވެ. މި ލަނޑު ޖެހީ، އަލެސަންދްރޯ ބަސްޓޯނީ ދިން ބޯޅައަކުން މަޓެއޯ ޑާމިއަން އެވެ.
ދެ ވަނަ ގޯލެއް ޖަހަން އިންޓަ އިން ކުރި މަސައްކަތް ކާމިޔާބެއްނުވި އެވެ. އޭގެ ފައިދާނަގައި، ނަޕޯލީން ވަނީ މެޗު ނިމުމުގެ 10 ވަަރަކަށް މިނިޓް ކުރިން، ގޯލެއް ޖަހައި، ނަތީޖާ ހަމަަހަމަކޮށްފަ އެވެ. މި ލަނޑު ޖެހީ ލިބުނު ކޯނަރަކުން ތަނަަވަސްވި ފުރުސަތެއްގައި ޖުއާްން ޖީސޫސް ބޮލުންނެވެ.
ތިރީސް ތިން އަހަރަށް ފަހު، މިދިޔަ ސީޒަނުގައި އިޓާލިން ލީގުގެ ތަށި އުފުލާލި ނަޕޯލީ މި ވަގުތު އޮތީ ލީގުގެ ހަތް ވަނައިގަ އެވެ. އެއީ 29 މެޗުން 45 ޕޮއިންޓް ހޯދައިގެންނެވެ.
މި ފަަހަރު ލީގު ޗެމްޕިއަންކަން އިންޓަ އިން ހޯދައިފިނަމަ އެ ޓީމަށް 20 ތަށި ހަމަކުރެވޭނެ އެވެ. އިޓާލިއަން ލީގު އެންމެ ގިނައިން ކާމިޔާބުކުރީ 36 ތަށި އުފުލާލި ޔުވެންޓަސް އިންނެވެ. ދެ ވަނައިގައި އޮތީ އިންޓަ އާއި އޭސީ މިިލާން އެވެ. ދެ ޓީމަށް ވެސް އަދި ލިބިފައިވަނީ 19 ތަށްޓެވެ.
