ލިވަޕޫލް (މާޗް 15) - ލިވަޕޫލްގެ ކޯޗުގެ މަގާމުން ނުވަ އަހަރަށް ފަހު ވަކިވާން ނިންމާފައިވާ ޖަރުމަނުގެ ކޯޗު، ޔާގަން ކްލޮޕްގެ އެ ނިންމުން ބަދަލުކުރުމުގެ ވިސްނުމެއް ނެތް ކަމަށް ބުނެފި އެވެ.
ލިވަޕޫލްގެ ކޯޗުކަމާ 2015 ވަނަ އަހަރު ކްލޮޕް ހަވާލުވިއިރު، އޭނާއާ އެކު ހަ އަހަރު ވަންދެން މަސައްކަތް ކުރި ލިވަޕޫލްގެ ސްޕޯޓިން ޑިރެކްޓަރު، މައިކަލް އެޑްވާޑް ވަނީ އެނބުރި އެ ކްލަބްގެ ޗީފް އެގްޒެކްޓިވް އޮފް ފުޓްބޯލްގެ މަގާމަށް އައިސްފަ އެވެ.
އެޑްވާޑް، 11 އަހަރު ލިވަޕޫލްގައި މަސައްކަތް ކުރުމަށް ފަހު، އެ ޓީމު ދޫކޮށްލީ 2022 ވަނަ އަހަރު މެދުތެރޭގަ އެވެ.
އަލުން ލިވަޕޫލްގެ މަގާމަކާ ހަވާލުވުމަށް ފަހު، އެޑްވާޑް ވަނީ ކްލޮޕްއާ އެކު ބައްދަލުވުންތަކެއް ބާއްވައިފަ އެވެ. އެކަމަކު، އެ ބައްދަލުވުންތަކުގައި ކްލޮޕް، ލިވަޕޫލް ދޫކޮށްލަން ނިންމާފައިވާ ކަންތައްތަކާ ބެހޭ ވާހަކަ ދައްކާފައިނުވާ ކަމަށް އޭނާ ވަނީ ބުނެފަ އެވެ.
"އަހަރެން ދެކޭގޮތުގައި މިއީ ދުނިޔޭގައި ވެސް އެންމެ ރަނގަޅު ކްލަބް، އެކަމަކު، އަހަރެން މި ޓީމު ދޫކޮށްލަން ނިންމި ނިންމުން އެ އޮތީ އެ ގޮތަށް،" ކްލޮޕް ބުންޏެވެ. "އަހަރެން ބޭނުންވަނީ މި ކްލަބް ރަނގަޅު މީހުންނާ އެކު ވީ އެންމެ ރަނގަޅަކަށް ކުރިއަށްދާން، އެކަންކަމަށް ބަލާއިރު، އެޑްވާޑް އަކީ، ރަނގަޅު ޗޮއިސް އެއް،"
ކުރިން ބޮރޫޝިއާ ޑޯޓްމަންޑަށް ކޯޗުކޮށްދިން ކްލޮޕް ބުނީ ލިވަޕޫލް ދޫކޮށްލަން ނިންމުމަށް ފަހު، އޭނާ ދެއްކި ވާހަކަތައް ރަނގަޅަށް ހަނދާނުގައި އެބަހުރި ކަމަށެވެ. އަދި އޭނާ ދެން އިނގިރޭސި ކްލަބަކާ ހަވާލުނުވާނެ ކަމަށް ބުނެ ދެއްކި ވާހަކަ އަކީ، ވަރަށް ވިސްނުންތެރިކަމާ އެކު، ފަރުވާ ބަހައްޓައިގެން ބުނި އެއްޗެއް ކަމަށާއި އެއާ ހިލާފުނުވާނެ ކަމަށް ކްލޮޕް ވަނީ ބުނެފަ އެވެ.
ލިވަޕޫލުން މި ސީޒަނުގައި ވަނީ ލީގު ކަޕް ޗެމްޕިއަންކަން ހޯދައިފަ އެވެ. އެފްއޭ ކަޕާއި ޔޫރޮޕާ ލީގުގެ ކުއާޓާ ފައިނަލަށް ލިވަޕޫލް ދަތުރުކޮށްފައިވާއިރު، ލީގުގައި އެ ޓީމު އޮތީ ދެ ވަނައިގަ އެވެ. އެއީ ޕޮއިންޓުގެ ގޮތުން އެއް ވަނައިގައި އޮތް އާސެނަލާ އެއްވަރުވި ނަމަވެސް ލަނޑުގެ ތަފާތުންނެވެ.
