ކުރީގެ ކުޅުންތެރިންނަށް ހާއްސަކޮށްގެން ކޮންމެ ރޯދަ މަހަކު ބާއްވާ ވެޓަރަންސް ފުޓްބޯޅަ މުބާރާތުގައި މި ފަހަރު 10 ޓީމަކުން ވާދަކުރަން ތައްޔާރުވެއްޖެ އެވެ.
އެފްއޭއެމްއާ ގުޅިގެން، ކްލަބް އިވެންޓްސް އިން އެންމެ ފަހުން ދެ ފަަހަރު ވެސް ބޭއްވި އެފްއޭއެމް ވެޓެރަންސް ލީގުގެ ޗެމްޕިއަންކަން ހޯދާފައިވަނީ، ހުޅުމާލެ ވެޓެރަންސް ކްލަބުންނެވެ. އެ ޓީމުން، މިދިޔަ އަހަރުގެ މުބާރާތް ކާމިޔާބުކުރީ 5-2 އިން ދަ ގްރާންޑޭ ސްޕޯޓްސް ކްލަބް ބަލިކޮށްގެންނެވެ.
ހެންވޭރު ދަނޑުގައި މާދަމާ ފެށުމަށް ހަމަޖެހިފައިވާ މި ފަހަރުގެ ވެޓެރަންސް ލީގުގައި ވާދަކުރާ 10 ޓީމު ވަނީ ދެ ގްރޫޕަކަށް ބަހާލައިފަ އެވެ. އެއީ ކޮންމެ ގްރޫޕެއްގެ ގަދަ ދެ ޓީމެއް ސެމީ ފައިނަލަށް ކޮލިފައިވާ ގޮތަށެވެ.
އެ ގޮތުން، ގްރޫޕް އޭ ގައި ހިމެނެނީ، އެންމެ ފަހުގެ ޗެމްޕިއަން، ހުޅުމާލެ ވެޓެރަންސް ކްލަބްގެ އިތުރުން، ވިިލިމާލެ ޔުނައިޓެޑާއި، ޕޮލިސް ކްލަބް، ހުއްރިއްޔާ (ހުރާ) އަދި ދިވެހި ސިފައިންގެ ކްލަބް އެވެ. ގްރޫޕް ބީ ގައި ހިމެނެނީ، ދަ ގްރާންޑޭ ސްޕޯޓްސް ކްލަބް، އެމްއެސް މޭޓްސް، މުއިވެޔޮ، ލެގޫންސް ސްޕޯޓްސް ކްލަބް އަދި ކްލަބް ސްޓެލްކޯ އެވެ.
މުބާރާތުގެ ފުރަތަމަ މެޗުގައި މާދަމާ ހަވީރު، 16:30 ގައި ހުޅުމާލެ ވެޓެރަންސް އިން ކުޅޭނީ ވިލިމާލެ ޔުނައިޓެޑާ އެވެ.
އެންމެ ފުރަތަމަ ވެޓްރަންސް މުބާރާތް ސީދާ އެފްއޭއެމުން އިންތިޒާމްކުރި ނަމަވެސް ފަހަކަށް އައިސް މުބާރާތް ބާއްވާފައިވަނީ އެކި އަމިއްލަ ކްލަބްތަކާ ގުޅިގެންނެވެ. އެ ގޮތުން ސޮކަ ވެޓެރަންސް އެސޯސިއޭޝަން އޮފް މޯލްޑިވްސް (އެސްވީއޭއެމް) އާއި އެމްއެސް މޭޓްސްއާ ގުޅިގެން ވެސް ވަނީ މުބާރާތް ކުރިއަށް ގެންގޮސްފަ އެވެ. މިހާރު މުބާރާތް ހިންގަނީ، ކްލަބް އިވެންޓްސް އިންނެވެ.
ތިރީސް ފަސް އަހަރުން މަތީގެ ކުޅުންތެރިންނަށް ހާއްސަކޮށްގެން ކުޅޭ ވެޓެރަންސް މުބާރާތުގެ ޗެމްޕިއަންކަން ހޯދި ޓީމުތަކަށް ބަލާއިރު، އެންމެ ކާމިޔާބީ ފަސް ފަހަރު މުބާރާތުގެ ތަށި އުފުލާލި ކްލަބް ވެލެންސިއާ އެވެ. ނިއު ރޭޑިއަންޓް ސްޕޯޓްސް ކްލަބް، މާޒިޔާ ސްޕޯޓްސް އެންޑް ރެކްރިއޭޝަން، ސޮކަ ވެޓެރަންސް އެސޯސިއޭޝަން އަދި ހުޅުމާލެ ވެޓެރަންސް ކްލަބުން ވެސް ވަނީ ވެޓެރަންސް މުބާރާތް ކާމިޔާބުކޮށްފަ އެވެ.
