މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގައި ލ. ގަން ޓީމުން އެންމެ ބޮޑަށް ފާހަގަވީ ލިބޭ ފުރުސަތުތަކުގެ ބޭނުން ނުހިފޭ މައްސަލަ ކަމަށާއި, އެކަން ހައްލުކުރަން މަސައްކަތް ކުރަމުން އަންނަ ކަމަށް އެ ޓީމުގެ ކޯޗު އިސްމާއިލް ޝަރީފް (އިއްސެ) ބުނެފި އެވެ.
އެންމެ ފަހުގެ ޗެމްޕިއަން ގަމުން ވަނީ ގަދަ 16 ގައި ހދ. އަތޮޅު ޗެމްޕިއަން ނައިވާދޫ ޕެނަލްޓީގައި ބަލިކޮށް ކުއާޓާ ފައިނަލުގެ ޖާގަ ކަށަވަރު ކޮށްފަ އެވެ.
ނައިވާދޫ މެޗަށްފަހު އަދަދާ ވާހަކަ ދައްކަމުން އިއްސެ ބުނީ ގަން ޓީމުން އެންމެ ބޮޑަށް ފާހަގަވީ ގޯލު ނުޖެހޭ މައްސަލަ ކަމަށެވެ.
"ކޮންމެ މެޗެއްގައިވެސް ޗާންސް ލިބިފައި ނުނިންމެނީ. އެކަން އެންމެ ބޮޑަށް ފާހަގަވީ. ކުރިއަށް ހުރި މެޗުތަކަށް އެންމެ ބޮޑަށް ފޯކަސް ކުރާނީ އެކަން ރަނގަޅު ކުރަން" އިއްސެ ބުންޏެވެ.
އިއްސެ ބުނީ މެޗުތަކަށް އަންނައިރު, ހުރިހާ ޓީމަކުންވެސް އަންނަނީ ވަރަށް ބޮޑަށް ތައްޔާރުވެގެން ކަމަށާއި, އިދިކޮޅުން ކުޅޭ ބައެއް ޓީމުތަކުން ގަން ޓީމުން ޕްރިޑިކްޓް ނުކުރާ ބައެއް ކަންކަން ކުރާ ކަމަށާއި, އެހެންވެ މެޗުތައް ނަގަން އުނދަގޫ ކަމަށެވެ. އެކަމަކު ގަމުން ކޮންމެ މެޗަކަށްވެސް ނުކުންނާނީ މޮޅުވުމުގެ އަޒުމުގައި ކަމަށް އިއްސެ ބުންޏެވެ.
ގަން ޓީމުގެ އަލީ ޝާމިސް (ތޮއްޕެ) ގަމުން ކުއާޓާ ފައިނަލަށް ދަތުރުކުރީ އެ ޓީމުގެ ހުރިހާ ކުޅުންތެރިން ކުރި ބުރަ މަސައްކަތުން ކަމަށެވެ.
"އަތޮޅު ނަގާ ޒޯން ނެގުމުން ވަރަށް ބޮޑަށް ޓީމު މި އޮތީ ކުރިއަށް ހުރި މެޗުތައް ނަގަން ތައްޔާރުވެފައި. ޑިފެންޑިން ޗެމްޕިއަން ވީމަ އޭތި ވަރަށް ބޮޑަށް އިނދޭ" ތޮއްޕެ ބުންޏެވެ.
ތޮއްޕެ ބުނީ ގަމު ޓީމުގެ ކުޅުން މެޗަކަށްވުރެ މެޗެއް ރަނގަޅު ވާނެ ކަމަށާއި, އެންމެ ބޮޑު މައްސަލަ އަކީ ކުރިއާލާ ފަރިތަކުރުންތައް ނުފެށުން ކަމަށެވެ.
ގޯލްޑަން ފުޓްސަލް ޗެލެންޖުގެ ކުއާޓާ ފައިނަލުގައި ގަމުން ނުކުންނަން ޖެހޭނީ އއ. މަތިވެރިއާ ދެކޮޅަށެވެ. މަތިވެރިން ވަނީ އއ. އަތޮޅުގެ ޗެމްޕިއަންގެ އިތުރުން ޒޯން ހަތަރެއްގެ ޗެމްޕިއަންކަން ހޯދާފަ އެވެ. އެ ޓީމުން ކުއާޓާ އަށް ދަތުރުކުރީ ގަދަ 16 ގައި ފ. ބިލެތްދޫ ބަލިކޮށްގެންނެވެ.
