މިއުނިކް (ފެބްރުއަރީ 19) - ޖަރުމަނު ލީގުގައި ރަށުންބޭރުގައި 3-2 އިން ބޯކަމް އަތްދަށުވެ، ނުވަ ދުވަސް ތެރޭ ބަޔާން މިއުނިކް ތިން ވަނަ މެޗުން ބަލިވެއްޖެ އެވެ.
ބަޔާން ވަނީ ރޭގެ މެޗުގެ ކުރިން ޖަރުމަނު ލީގުގައި ބަޔާ ލެވަކޫސަން އަތުންނާއި ޗެމްޕިއަންސް ލީގުގައި ލާޒިއޯ އަތުން ބަލިވެފަ އެވެ. އެ މާޔޫސްކަން އިތުރުވީ ރޭ ބޯކަމް އަތުން ބަލިވެ، ލީގުގެ ރޭހުގައި އިތުރަށް ފަހަތަށް ވެއްޓުމުންނެވެ.
ބޯކަމް ދަނޑުގައި ރޭ 14 ވަަނަ މިނިޓްގައި ޖަމާލް މުސިއާލާ ވަނީ ބަޔާނަށް ލީޑުނަގައިދީފަ އެވެ. އެކަމަކު، ފުރަތަމަ ހާފު ނިމުމުގެ ކުރިން ބޯކަމް އިން ނަތީޖާ އަނބުރާލި އެވެ. ލަނޑުތައް ޖެހީ، ޖަޕާންގެ ޓަކޫމާ އަސާނޯގެ އިތުރުން ޖަރުމަނު، ކެވެން ޝްލޯޓަބެކް އެވެ.
ނަތީޖާ ހަމަހަމަކުރަން ބަޔާނުން މަސައްކަތް ކުރަމުން ދަނިކޮށް، މެޗުގެ 76 ވަނަ މިނިޓްގައި އެ ޓީމުގެ ޑަޔޫޓް އުޕަމެކާނޯ އަށް ވަނީ ރަތް ކާޑެއް ދައްކައިފަ އެވެ. މިއީ، އުޕަމެކާނޯ އަށް ޖެހިޖެހިގެން ދެ ވަނަ މެޗުގައި ދެއްކި ރަތް ކާޑެވެ. ޗެމްޕިއަންސް ލީގުގައި ލާޒިއޯއާ އެކު ބަޔާނުން ކުޅުނު މެޗުގައި ވެސް އުޕަމެކާނޯ އަށް ރަތް ކާޑެއް ދެއްކި އެވެ.
ލިބުނު ޕެނަލްޓީން، ބޯކަމްގެ ކެވިން ސްޓޯގާ ވަނީ އެ ޓީމަށް ދެ ގޯލުގެ ލީޑެއް ނަގައިދީފަ އެވެ. މެޗު ނިމެން ތިން މިނިޓަށް ވެފައި ވަނިކޮށް، ހެރީ ކޭން ބަޔާނަށް ލަނޑެއް ޖަހައި އުންމީދެއް ހޯދައިދިން ނަމަވެސް، އިތުރު ގޯލެއް ޖަހައި، ނަތީޖާ އެއްވަރުކޮށްވެސް ނުލެވުނެވެ. މި މެޗުން ބަލިވެ، ބަޔާން ވަނީ ލީގުގެ ރޭހުގައި އަށް ޕޮއިންޓް ފަހަތަށް ވެއްޓިފަ އެވެ.
ބަޔާންގެ ކޯޗު ތޯމަސް ޓުޗެލް މަގާމުން ވަކިކުރާނެ ކަމުގެ ވާހަކަތައް ޖަރުމަނު މީޑިއާގައި އަންނަނީ ދައުރުވަމުންނެވެ. ބަޔާނުން ހޯސޭ މޮރީނިއޯއާ ޓީމު ހަވާލުކުރުމުގެ އަޑުތައް ވެސް އަންނަނީ ގަދަވަމުންނެވެ.
ލެވަކޫސަން އެއް ވަނައިގައި 22 މެޗުން 58 ޕޮއިންޓާ އެކު އޮތްއިރު، ދެ ވަނައިގައި އޮތް ބަޔާނަށް ވަނީ 22 މެޗުން 50 ޕޮއިންޓް ލިބިފަ އެވެ.
