މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖުގައި މިރޭ ވެސް ފައިނަލްތަކެއް ކުރިއަށްދާނެ އެވެ. އެއީ, ބ. އަތޮޅު ފައިނަލްގެ އިތުރުން ޅ. އަތޮޅު ފައިނަލާއި, ވ. އަތޮޅުގެ ފަހު ލެގުގެ މެޗެވެ.
ރެހެންދި ފުޓްސަލް ދަނޑުގައި ކުރިއަށްދާ މި މުބާރާތުގެ ފައިނަލުން ބ. އަތޮޅުގެ އެންމެ ފަހުގެ ޗެމްޕިއަން އޭދަފުށިން ޖާގަ ހޯދީ އަތޮޅު ބުރުގައި އެ ޓީމުން ކުޅުނު ދެ މެޗު ކާމިޔާބުކޮށް އަތޮޅު ބުރުގެ އެއްވަނަ ޓީމުގެ ގޮތުގައެވެ. އޭދަފުއްޓާއި ދެކޮޅަށް ނުކުންނަ ތުޅާދޫ އިން ފައިނަލުގެ ޖާގަ ހޯދީ ދެ މެޗުން ހޯދި އެއް މޮޅާއެކު ގްރޫޕްގެ ދެވަނަ ޓީމުގެ ގޮތުގަ އެވެ.
ތުޅާދޫ އިން މި މުބާރާތުގައި ކުޅުނު ދެ މެޗުގެ ތެރެއިން އެއް މެޗުން ބަލިވި އެވެ. އެއީ އޭދަފުށި އަތުންނެވެ. އެ މެޗު އޭދަފުށިން ކާމިޔާބުކުރީ 2-1 ގެ ނަތީޖާއަކުންނެވެ. މިރޭ ކުޅޭ ފައިނަލް މެޗު ކުޅޭނީ 20:00 ގައި ރެހެންދި އެއް ނަމްބަރު ފުޓްސަލް ދަނޑުގަ އެވެ.
ޅ. އަތޮޅު ފައިނަލުގައި ހިންނަވަރުން ނުކުންނާނީ އެންމެ ފަހުގެ ޗެމްޕިއަން ކުރެންދޫއާ ދެކޮޅަށެވެ. ކުރެންދޫ އިން މިދިޔަ އަހަރުގެ މުބާރާތުގެ އަތޮޅު ޗެމްޕިއަންކަން ހޯދީ ހިންނަވަރުގެ މައްޗަށް ދެ ލެގުގެ އެގުރިގޭޓުން ކުރިހޯދައިގެންނެވެ. ޅ. އަތޮޅުގެ އެންމެ ވާދަވެރި ދެ ޓީމަކީ މިއީ އެވެ.
ހިންނަވަރުން މި ފަހަރުގެ މުބާރާތުގެ ފައިނަލުން ޖާގަ ހޯދީ ކުޅުނު ތިން މެޗުން ލިބުނު ފަސް ޕޮއިންޓާއެކު ގްރޫޕްގެ އެއްވަނަ ޓީމުގެ ގޮތުގަ އެވެ. ކުރެންދޫ އިންވެސް ވަނީ މި އަދަދަށް ޕޮއިންޓް ހޯދާފަ އެވެ. ހިންނަވަރަށް ކުރި ލިބެނީ ފައިދާ ގޯލުގެ ތަފާތުންނެވެ. މިރޭ ކުޅޭ ފައިނަލް މެޗު ކުޅޭނީ 20:00 ގައި ރެހެންދި ދެ ނަމްބަރު ފުޓްސަލް ދަނޑުގަ އެވެ.
ވ. އަތޮޅު ޗެމްޕިއަން ވެސް މިރޭ ކުޅޭ ދެވަނަ ލެގުގެ މެޗަށްފަހު އެނގޭނެ އެވެ. ވ. އަތޮޅުގެ ފުރަތަމަ ލެގުގައި ކެޔޮދޫ އިން ވަނީ 5-2 ގެ ނަތީޖާއަކުން ފެލިދޫ ބަލިކޮށްފަ އެވެ. އެހެންވެ މިރޭ ކުޅޭ ދެވަނަ ލެގުގެ މެޗުގައި ފެލިދޫ އިން ކާމިޔާބުކުރާނަމަ ބައިކޮޅަށް ލަނޑެއް ނުވައްދާ ހަތަރު ގޯލު ޖަހަން ޖެހޭނެ އެވެ. މި މެޗު ކުޅޭނީ މިރޭ 21:00 ގައި ރެހެންދި ދެ ނަމްބަރު ޓާފް ދަނޑުގަ އެވެ.
