ސޮނީ ސްޕޯޓްސް ގޯލްޑަން ފުޓްސަލް ޗެލެންޖް: ކުޑަހުވަދޫ އާއި ބިލެއްދޫ އަށް އަތޮޅު ޗެމްޕިއަންކަން

މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެެލެންޖް 2024 ގައި ދ. އަތޮޅުގެ ޗެމްޕިއަންކަން އަނެއްކާ ވެސް ކުޑަހުވަދޫ އިން ހޯދިއިރު، ފ. އަތޮޅުގެ ޗެމްޕިއަންކަން ބިލެއްދޫން ހޯދައިފި އެވެ.

މި ފަހަރު ވެސް، ދ އަތޮޅު ފައިނަލުގައި ފެނުނީ މާއެނބޫދޫ އާއި ކުޑަހުވަދޫގެ ކުރިމަތިލުމެކެވެ. ކުޑަހުވަދޫ މޮޅުވީ، 6-2 އިންނެެވެ. ފ. އަތޮޅުގެ ފައިނަލުގައި ބިލެއްދޫ މޮޅުވީ، ދަރަނބޫދޫއާ ވާދަކޮށް ފޯރިގަދަ މެޗަކަށް ފަހު، 5-4 އިންނެވެ.

ދ. އަތޮޅު ފައިނަލަށް ކުޑަހުވަދޫ އާއި މާއެނބޫދޫ ދަތުރުކުރީ މެޗަކުން ބަލިނުވެ އެވެ. މި ދެ ޓީމު ބައްދަލުކުރި ފުރަތަމަ މެޗު ނިމުނީ އެއްވަރުވެގެންނެވެ.

ރޭ ކުޅުނު ދ. އަތޮޅު ފައިނަލުގައި ކުޑަހުވަދޫން ލަނޑުތައް ޖެހީ، ހުސެއިން އިފްހާމް އާއި ޖުމައިލް ޖަމީލް (ޖުމްބެ)ގެ އިތުރުން، ހާރޫން އިބްރާހިމް (ހާންޑޯ) އާއި މެޗުގެ މޮޅު ކުޅުންތެރިޔާގެ މަގާމު ހޯދި މުހައްމަދު އަރީޝް، ކޮންމެ ކުޅުންތެރިއަކު ދެ ގޯލެވެ. މީގެ ތެރެއިން، އަރީޝް ޖެހި ދެ ގޯލަކީ ވެސް އިންޑިވިޖުއަލީ މޮޅު ދެ ގޯލެވެ.

މާއެނބޫދޫ ޓީމަށް މި މެޗުގައި ލަނޑުތައް ޖަހައިިދިނީ، އަހުމަދު ޝައިހާން އާއި އަބްދުﷲ ޒާން ޒަހީން އެވެ.

ބިލެއްދޫ ކުޅުންތެރިންނާއި އޮފިޝަލުން ތަށްޓާ އެކު އުފާފާޅުކުރަނީ.--- ފޮޓޯ: އަބްދުﷲ އިޔާން / އަދަދު

ދ. އަތޮޅުގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިއަކަށް ހޮވުނީ ކުޑަހުވަދޫ ޓީމުގެ އަރީޝް އެވެ.

ރޭ ކުޅުނު ބިލެއްދޫ އާއި ދަރަނބޫދޫ މެޗުގައި، ބިލެއްދޫގެ ގޯލުތައް ޖެހީ، ރިމާން އަލީ އާއި މުހައްމަދު ޒީދާން ޒުހުރީ، ކޮންމެ ކުޅުންތެރިއަކު ދެ ގޯލާއި ނަދީފް އިބްރާހިމް ގޯލެކެވެ. ދަރަނބޫދޫގެ ގޯލުތަކަށް ބަލާއިރު، އެއް ލަނޑަކީ، ބިލެއްދޫގެ ކީޕަރު ޝިރުހާން އަބްދުލް ލަތީފް އަތުން ބައިކޮޅަށް ވަން ގޯލެކެވެ. އަނެއް ލަނޑުތައް ޖެހީ، ސާޖިދު އަހުމަދު އިބްރާހިމް، މުއައްލިމް އުމަރު އަދި މުޒްދާން ހަސަން އެވެ.

ފ. އަތޮޅުގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިއާގެ މަގާމު ހޯދީ، ބިލެއްދޫގެ ޒީދާން އެވެ.

ގޯލްޑަން ފުޓްސަލް ޗެލެންޖްގައި މިރޭ ކުޅޭނީ ކ. އަތޮޅުގެ ހަތަރު މެޗާއި މ. އަތޮޅުގެ ހަތަރު މެޗެވެ. މިއީ ގްރޫޕްގެ ފަހު މެޗުތަކެވެ.

ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:

ކ. ގާފަރު - ކ. ހުރާ : 20:00 (ގްރައުންޑް 1)

ކ. ކާށިދޫ - ކ. ހިންމަފުށި : 20:00 (ގްރައުންޑް 2)

ކ. ގުޅި - ކ. ގުރައިދޫ : 21:00 (ގްރައުންޑް 1)

ކ. ދިއްފުށި - ކ. މާފުށި : 21:00 (ގްރައުންޑް 2)

މ. މުލައް - މ. ރަތްމަންދޫ : 22:00 (ގްރައުންޑް 1)

މ. މަޑުއްވަރީ - މ. ވޭވަށް : 22:00 (ގްރައުންޑް 2)

މ. ނާލާފުށި - މ. ކޮޅުފުށި : 23:00 (ގްރައުންޑް 1)

މ. ދިއްގަރު - މ. މުލި : 23:00 (ގްރައުންޑް 2)