މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި ށ. ކަނޑިތީމު، އއ. މަތިވެރި އަދި އދ. މަހިބަދޫން އަތޮޅު ޗެމްޕިއަންކަން ހޯދައިފި އެވެ.
ށ. އަތޮޅު ފައިނަލުގައި ކަނޑިތީމާއި ފޭދޫ ބައްދަލުކުރި މެޗު 3-3 އިން އެއްވަރުވިއިރު، ޕެނަލްޓީގައި ކަނޑިތީމު މޮޅުވީ 8-6 އިންނެވެ. މިއީ ކަނޑިތީމުން އަތޮޅު ޗެމްޕިއަންކަން ހޯދި ފަސް ވަނަ ފަހަރެވެ. މިދިޔަ އަހަރު އެ ޓީމު ވަނީ ޕެނަލްޓީ ޖަހައިގެން، ފޯކައިދޫ އަތުން ބަލިވެފަ އެވެ.
މެޗުގައި، ކަނޑިތީމުގެ ތިން ގޯލުގެ ތެރެއިން ދެ ލަނޑު ޖެހީ، އެ އަތޮޅުގެ މޮޅު ކުޅުންތެރިޔާ އާއި އެންމެ ގިނަ ގޯލު ޖެހި ކުޅުންތެރިއަކަށް ހޮވުނު އިބްރާހިމް ނަދާދު (ކުޑައްޓޭ) އެވެ. އެ ޓީމުގެ އަނެއް ލަނޑު ޖެހީ އަހުމަދު ރިޒާން އެވެ. ފޭދޫ ޓީމުގެ ގޯލުތައް ޖެހީ މުހައްމަދު ސިރްފާން އާއި މާޒިލް މުހައްމަދު އަދި އަހުމަދު ފާއިން މުހައްމަދު އެވެ.
ށ. އަތޮޅުގެ ޗެމްޕިއަންކަން ހޯދި ކަނޑިތީމުން ތަށްޓާ އެކު ފޮޓޯ އަކަށް ހުއްޓިލައިގެން.--- ފޮޓޯ: އަބްދުﷲ އިޔާން / އަދަދު
ޕެނަލްޓީގައި، ކަނޑިތީމުން ފަސް ޕެނަލްޓީ ކާމިޔާބުކުރި އެވެ. ފޭދޫން ޖެހި ހަތަރު ޕެނަލްޓީގެ ތެރެއިން އެއް ޕެނަލްޓީ ވަނީ ނާކާމިޔާބުވެފަ އެވެ.
އދ.ގެ އެންމެ ފަހުގެ ޗެމްޕިއަން، މާމިގިލި އަތުން މަހިބަދޫ މޮޅުވީ 2-0 އިންނެވެ. މަހިބަދޫން އަތޮޅު ޗެމްޕިއަންކަން ފުރަތަމަ ފަހަރަށް ހޯދިއިރު، އެ ޓީމުގެ ލަނޑުތައް ޖަހައިދިނީ، އިބްރާހިމް އުސާމާ ހަސަން މަޖީދުގެ އިތުރުން މާމިގިލީގެ އިބްރާހިމް މައިސާން އަތުން ބައިކޮޅަށް ވަން ގޯލެކެވެ.
އދ. އަތޮޅުގެ މޮޅު ކުޅުންތެރިއަކަށް، މަހިބަދޫގެ އަބްދުﷲ މިދުހަތު ފަހުމީ (ބިޗަޑް) ހޮވުނުއިރު، އެންމެ ގިނަ ގޯލު ޖެހީ، ދަނގެތި ޓީމުގެ އަހުމަދު ސުދައިސް އަލީ އެވެ.
އދ.ގެ ޗެމްޕިއަންކަން ފުރަތަމަ ފަަހަރަށް ހޯދި މަހިބަދޫ ކުޅުންތެރިން އުފާފާޅުކުރަނީ.--- ފޮޓޯ: އަބްދުﷲ އިޔާން / އަދަދު
އއ.ގެ ޗެމްޕިއަންކަން މަތިވެރިން ދެ ވަނަ ފަހަރަށް ހޯދީ ފައިނަލުގައި ބޮޑުފޮޅުދޫ އަތުން 5-2 އިން މޮޅުވެގެންނެވެ. ލީގު ބުރުގައި ބޮޑުފޮޅުދޫ އަތުން ބަލިވި ނަމަވެސް ފައިނަލުގައި މަތިވެރިން މި ވަނީ ބަދަލު ހިފައިފަ އެވެ. މަތިވެރި އަށް ފައިނަލުގައި ހެޓްރިކް ހަދައިދިން އަލީ އަލްސަން އަކީ އެ އަތޮޅުގެ އެންމެ މޮޅު ކުޅުންތެރިޔާ އެވެ. އެ ޓީމުގެ އަނެއް ދެ ގޯލު ޖެހީ އަހުމަދު ފިޒާން އެވެ.
ބޮޑުފޮޅުދޫގެ އަލީ ޝަނީޒް އެއް ލަނޑު ޖެހިއިރު، ދެން ޖެހި ގޯލު ކާމިޔާބުކުރީ އއ. އަތޮޅު މުބާރާތުގައި އެންމެ ގިނަ ގޯލު ޖެހި، މުހައްމަދު ޝިރުހާން އެވެ.
ތުޅާދޫ ބ. އަތޮޅު ފައިނަލަށް
ގޯލްޑަން ފުޓްސަލް ޗެލެންޖްގައި މި ފަަހަރު ބ އަތޮޅުން ވާދަކުރަނީ ތިން ޓީމެވެ. ފުރަތަަމަ މެޗުން އޭދަފުށިން ވަނީ ކެންދޫ ބަލިކޮށްފަ އެވެ. ކެންދޫން ކުޅުނު ދެ ވަނަ މެޗުގައި ރޭ ތޫޅާދޫ އަތުން ބަލިވީ، 6-2 އިންނެވެ.
ރޭގެ މެޗުގައި ތުޅާދޫގެ ގޯލުތައް ޖެހީ، އިބްރާހިމް ރަފާހު ހެޓްރިކެއްގެ އިތުރުން އަންސަރު އިބްރާހިމް (އަންކޮ) އާއި މުހައްމަދު ތަސްނީމް (މޯޑު) އެެވެ. ކެންދޫގެ ގޯލުތައް ޖެހީ، މުހައްމަދު އިޔާދު އާއ ޝަމަން މޫސާ އެވެ.
ޅ. އަތޮޅުގައ ކުރެންދޫ އާއި ހިންނަވަރު ކުޅުނު މެޗުގެ ތެރެއިން.--- ފޮޓޯ: އަބްދުﷲ އިޔާން / އަދަދު
ޅ. އަތޮޅުގެ ފުރަތަމަ ދެ މެޗު ވެސް އެއްވަރު
ޅ. އަތޮޅުގެ ފުރަތަަމަ މެޗުތައް ރޭ ކުޅުނުއިރު، ދެ މެޗު ވެސް ވަނީ އެއްވަރުވެފަ އެެވެ. އޮޅުވެލިފުއްޓާއި ނައިފަރު 2-2 އިން އެއްވަރުވިއިރު، ހިންނަވަރާއި ކުރެންދޫ ވަނީ 1-1 އިން އެއްވަރުވެފަ އެވެ.
އޮޅުވެލިފުށިން ރޭގެ މެޗުގައި ލަނޑުތައް ޖެހީ، އިމްރާން މުހައްމަދާއި ނައިފަރުގެ އިބްރާހިމް ޝަރީފް މުހައްމަދު އަތުން ބައިކޮޅަށް ވަން ގޯލެކެވެ. މި މެޗުގައި ނައިފަރުގެ ދެ ގޯލު ވެސް ޖެހީ މެޗުގެ މޮޅު ކުޅުންތެރިޔާ، އިބްރާހިމް ޝަރީފް މުހައްމަދު އެވެ.
ކުރެންދޫން ރޭގެ މެޗުގައި އަލީ އިބްރާހިމް (އައްޔަ) ލަނޑު ޖެހިއިރު، ހިންނަވަރުގެ ލަނޑު ޖެހީ އަހުމަދު އަޝްރަފް އެވެ.
ގޯލްޑަން ފުޓްސަލް ޗެލެންޖްގައި ރޭ ވަނީ ސ. އަތޮޅުގެ ދެ މެޗެއް ވެސް ކުޅެފަ އެވެ. އެ ގޮތުން، މަރަދޫފޭދޫ ވަނީ 3-2 އިން ހިތަދޫ ބަލިކޮށްފަ އެވެ. އަދި މަރަދޫ ވަނީ 2-1 އިން ފޭދޫ އަތުން މޮޅުވެފަ އެވެ.
މަރަދޫފޭދޫ ޓީމަށް ރޭގެ މެޗުގައި ލަނޑުތައް ޖަހައިދިނީ، ހަސަން ޒައިދާން މުހައްމަދު އަލީ، އިބްރާހިމް ސައިފް އަދި އިބްރާހިމް އާލިފް ރަާޝިދު އެވެ. ހިތަދޫގެ ލަނޑުތައް ޖެހީ މުހައްމަދު ދާނިޝް އިބްރާހިމް އާއި މުހައްމަދު ސޮބާހު މަސްރޫރް އެވެ. މި މެޗުގެ މޮޅު ކުޅުންތެރިއަކީ، މަރަދޫފޭދޫގެ ކީޕަރު، މުހައްމަދު އައިމަން އެވެ.
މަރަދޫން ވަނީ ވިޝާން ހަބީބް އާއި ހުސެއިން ވިފާގުގެ ލަނޑުން ފޭދޫ ބަލިކޮށްފަ އެވެ. ފޭދޫގެ ލަނޑު ޖެހީ ހަސަން އަޒްވާން އެވެ. މި މެޗުގެ މޮޅު ކުޅުންތެރިއަކީ މަރަދޫގެ ވިޝާން އެެވެ.
ގޯލްޑަން ފުޓްސަލް ޗެލެންޖްގައި މިރޭ ކުޅެން ހަމަޖެހިފައިވަނީ ކ އަތޮޅުގެ ހަތަރު މެޗާއި މ. އަތޮޅުގެ ހަތަރު މެޗެވެ.
ގޯލްޑަން ފުޓްސަލް ޗެލެންޖްގެ މިރޭގެ މެޗުތައް:
ކ. ކާށިދޫ - ކ. ހުރާ : 20:00 (ގްރައުންޑް 1)
ކ. ގާފަރު - ކ. ހިންމަފުށި :20:00 (ގްރައުންޑް 2)
ކ. ދިއްފުށި - ކ. ގުރައިދޫ : 21:00 (ގްރައުންޑް 1)
ކ. މާފުށި - ކ. ގުޅި : 21:00 (ގްރައުންޑް 2)
މ. މަޑުއްވަރީ - މ. ރަތްމަންދޫ :22:00 (ގްރައުންޑް 1)
މ. ވޭވަށް - މ. މުލި : 22:00 (ގްރައުންޑް 2)
މ. ދިއްގަރު - މ. ކޮޅުފުށި : 23:00 (ގްރައުންޑް 1)
މ. ނާލާފުށި - މ. މުލި : 23:00 (ގްރައުންޑް 2)
