"ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024" ގެ ހއ. އަތޮޅު ސެމީ ފައިނަލް މެޗުތައް ކާމިޔާބުކޮށް ދިއްދޫ އާއި އުތީމުން ފައިނަލުގެ ޖާގަ ކަށަވަރުކޮށްފި އެވެ.
ރެހެންދި ފުޓްސަލް ދަނޑުގައި މި މުބާރާތުގައި ރޭ ހަތް މެޗު ކުޅުނުއިރު, އެންމެ ފުރަތަމަ ކުޅުނީ ހއ. އަތޮޅު ސެމީ ފައިނަލު މެޗުތަކެވެ. ހއ. އުތީމުން މާރަންދޫގެ މައްޗަށް ކުރިހޯދީ 5-4 ގެ ނަތީޖާއަކުންނެވެ.
މި މެޗު ފަށައިގެން ހަތްވަނަ ސިކުންތުގައި އުތީމަށް މެޗުގެ ލީޑު ނަގައިދިނީ މުހައްމަދު ނަބީލް ކާމިޔާބުކުރި ގޯލުންނެވެ. އެކަމަކު، ފުރަތަމަ ހާފުގެ 17 ވަނަ މިނެޓުގައި މާރަންދޫގެ ހަމްދޫން އަބްދުލް ލަތީފް ގޯލު ޖަހާ ނަތީޖާ ހަމަހަމަ ކުރި އެވެ.
ފުރަތަމަ ހާފު ނިމުމުގެ ކުރިން އުތީމުގެ ތަހާ މުހައްމަދު އަލުން ލީޑު ނަގައިދިނެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ހަމްދޫން އިތުރު ގޯލެއް ޖަހާ އަލުން ނަތީޖާ ހަމަހަމަ ކުރި އެވެ. އެކަމަކު، އޭގެ މިނެޓެއް ފަހުން އުތީމުގެ ތާހާ އަލުން އެ ޓީމަށް ލީޑު ނަގައިދިނެވެ. އަދި ދެ ވަނަ ހާފު ނިމެން ފަސް މިނެޓަށް ވެފައި ހުއްޓަ ނަބީލް ވަނީ އެ ޓީމުގެ ލީޑު ފުޅާކޮށްދީފަ އެވެ. އަދި އޭގެ ދެ މިނެޓު ފަހުން އުތީމުގެ އަހުމަދު އައިހަމް އެ ޓީމުން ޖެހި ފަސް ވަނަ ގޯލު ޖެހިއެވެ. މެޗުގެ ފުރިހަމަ ވަގުތު ގެ ފަހު މިނެޓުގެ ތެރޭގައި މާރަންދުގެ މުހައްމަދު ތަހްސީން އަދި އަހުމަދު މުހައްމަދު ކައިރި ކައިރީ ދެ ގޯލު ޖަހާ ފަރަގު ކުޑަކުރި އެވެ.
ހއ. އުތީމު އާއި ހއ. މާރަންދޫ ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
ހއ. ދިއްދޫ އިން ފައިނަލުގެ ޖާގަ ކަށަވަރުކުރީ ހއ. ބާރަށް ފަސޭހަކަމާ އެކު 7-1 ގެ ނަތީޖާއަކުން ބަލިކޮށްގެންނެވެ. މި މެޗުގައި ދިއްދޫގެ ފާއިގް އަހުމަދާއި ހައިޝަމް ރަޝީދު ތިން ގޯލު ޖަހާ ހެޓްރިކް ހެދި އެވެ. އަދި އެޓީމުގެ ފަހު ގޯލު ޖަހާދިނީ މުހައްމަދު ސަނާއު ނަސީރެވެ.
މި މެޗުގައި ބާރަށުން ކާމިޔާބުކުރި ހަމައެކަނި ލަނޑު އެޓީމަށް ޖަހާދިނީ އަހުމަދު ފައިޒާން އެވެ.
ހއ. އަތޮޅުގެ މެޗުތަކުގެ އިތުރުން ފ. އަތޮޅުގެ މެޗުތަކެއްވެސް ރޭ ކުޅުނެވެ. ފ. ފީއަލީގެ މައްޗަށް އެ އަތޮޅު މަގޫދޫ އިން ކުރިހޯދީ 4-2 ގެ ނަތީޖާއަކުންނެވެ. މި މެޗުގައި މަގޫދޫގެ އުލޫފް އަހުމަދު ތިން ގޯލު ޖަހާ ހެޓްރިކް ހެދިއިރު, އެ ޓީމުގެ އަނެއް ލަނޑު އެޓީމަށް ޖަހާދިނީ މުހައްމަދު އަލްޔާން އަބްދުالله އެވެ. ފީއަލީގެ ގޯލުތައް އެ ޓީމަށް ޖަހާދިނީ ޒީދާން އަބްްދުالله އާއި ރަފްހާން އިބްރާހީމް އެވެ.
ފ. ނިލަންދޫގެ މައްޗަށް އެ އަތޮޅު ދަރަނބޫދޫ އިން ކުރިހޯދީ 5-4 ގެ ނަތީޖާއަކުންނެވެ. މި މެޗުގައި ދަރަނބޫދޫގެ މުޒްދާން ހަސަން ތިން ގޯލު ޖަހާ ހެޓްރިކް ހެދިއިރު, މުއައްލިމް އުމަރް އަދި މަހްފޫޒް އުމަރު, މިއިން ކޮންމެ ކުޅުންތެރިއަކު ގޯލު ޖެހި އެވެ.
ނިލަންދޫގެ ގޯލުތައް އެ ޓީމަށް ޖަހާދިނީ އަކުރަމް އިސްމާއިލް, އިޖާޒް އަބްދުލް ގާދިރު, އަހުމަދު ޖަވާދު އެވެ. އަދި އެ ޓީމުން ޖެހި ފަހު ގޯލަކީ ދަރަނބޫދޫގެ މަހުފޫޒް އުމަރު އަތުން ބައިކޮޅަށް ވަން ލަނޑެކެވެ.
މީގެ އިތުރުން ރޭ ވަނީ ދ. އަތޮޅުގެ މެޗެއްވެސް ކުރިއަށް ގޮސްފަ އެވެ. ދ. ބަނޑިދޫގެ މައްޗަށް ދ. ކުޑަހުވަދޫ އިން ކުރިހޯދީ 8-1 ގެ ތަފާތު ބޮޑު ނަތީޖާ އަކުންނެވެ. މި މެޗުގައި ކުޑަހުވަދޫގެ މުހައްމަދު އަރީޝް, ޖުމައިލް ޖަމީލް (ޖުމްބެ), އަބްދުالله ޝަރުމަދް ދެ ގޯލު ޖެހިއިރު, ހުސެއިން އައިހަމް އަދި އިސްމައިލް ޒިދާން ގޯލެއް ޖެހި އެވެ.
ބަނޑިދޫއިން ކާމިޔާބުކުރި ހަމައެކަނި ގޯލު އެ ޓީމަށް ޖަހާދިނީ އިބްރާހީމް އަފްނާން އެވެ.
ދ. ކުޑަހުވަދޫ އާއި ދ. ބަނޑިދޫ ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
މީގެ އިތުރުން ގދ. އަތޮޅުގެ މެޗުތައް ވެސް ރޭ ވަނީ ކުޅެފަ އެވެ. އެ ގޮތުން ގދ. ގައްދޫގެ މައްޗަށް އެ އަތޮޅު ތިނަދޫ އިން ކުރިހޯދީ 1-0 ގެ ނަތީޖާއަކުންނެވެ.
އެންމެ ފަހުގެ ރަނަރަޕް ގދ. ވާދޫން އެ އަތޮޅުގެ ހޯދެއްޑޫގެ މައްޗައް ކުރިހޯދީ 6-1 ގެ ނަތީޖާއަކުންނެވެ.
މި މެޗުގައި ވާދޫގެ މުހައްމަދު އިޔާދު އަލީ އަދި މުހައްމަދު ނާއިލް ދެ ގޯލު ޖެހިއިރު, ނަޝާހް އަހުމަދު އަދި އިބްރާހީމް ޝައުފް މުހައްމަދު ގޯލެއް ޖެހި އެވެ.
މި މެޗުގައި ހޯދެއްޑޫގެ ހަމައެކަނި ލަނޑު އެ ޓީމަށް ޖަހާދިނީ ސާއިން އަސްލަމް އެވެ.
މި މުބާރާތުގައި މިރޭ އަށް މެޗު ކުޅޭނެ އެވެ. އޭގެ ތެރޭގައި ރ. އަތޮޅު ފައިނަލްގެ އިތުރުން, ހދ. އަތޮޅުގެ ސެމީ ފައިނަލްގެ މެޗުތައް ކުރިއަށް ދާނެ އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
- ހދ. ނޭކުރެންދޫ - ހދ. ނައިވާދޫ : 20:00 (ގްރައުންޑް 1) - ސެމީ ފައިނަލް
- ހދ. ނޮޅިވަރަން - ހދ. ނޮޅިވަރަންފަރު : 20:00 (ގްރައުންޑް 2) - ސެމީ ފައިނަލް
- ސ. ހިތަދޫ - ސ. މަރަދޫ : 21:00 (ގްރައުންޑް 1)
- ސ. މަރަދޫފޭދޫ - ސ. ފޭދޫ : 21:00 (ގްރައުންޑް 2)
- ނ. ވެލިދޫ - ނ. މާފަރު : 22:00 (ގްރައުންޑް 1)
- ނ. ކެނދިކުޅުދޫ - ނ. ހޮޅުދޫ : 22:00 (ގްރައުންޑް 2)
- ރ. ދުވާފަރު - ރ. އަލިފުށި : 23:00 (ގްރައުންޑް 1) - ފައިނަލް
- ބ. އޭދަފުށި - ބ. ކެންދޫ : 23:00 (ގްރައުންޑް 2)
