މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ގެ ހދ. އަތޮޅު ސެމީ ފައިނަލުން ނައިވާދޫ, ނޮޅިވަރަން, ނޮޅިވަރަންފަރު އަދި ނޭކުރެންދޫ ޖާގަ ހޯދައިފި އެވެ.
މި މުބާރާތުގައި ރޭ ވެސް ވަނީ އަށް މެޗު ކުޅެފަ އެވެ. އޭގެ ތެރެއިން ހަތަރު މެޗަކީ ހދ. އަތޮޅު ކުއާޓާ ފައިނަލުގެ މެޗުތަކެވެ. މީގެ އިތުރުން ކުޅުނީ ގއ. އަތޮޅުގެ މެޗުތަކެވެ.
ހދ. އަތޮޅުގެ އެންމެ ފަހުގެ ޗެމްޕިއަން ނައިވާދޫ އިން ސެމީ ފައިނަލުގެ ޖާގަ ކަށަވަރުކުރީ ކުއާޓާ ފައިނަލުގައި މަކުނުދޫގެ މައްޗަށް 7-0 ގެ ނަތީޖާއަކުން ކުރިހޯދައިގެންނެވެ. މި މެޗުގައި ނައިވާދޫގެ އަބްދުالله ވިސާމް ތިން ގޯލު ޖަހާ ހެޓްރިކް ހެދިއިރު, ޔާމީން މުހައްމަދު (ޔާންޓެ), އަބްދުالله ޝާފިއު (ޝާއްޕެ), ހުސެިއން މައިޝާން އަދި ހަސަން ތާއިފް މިއިން ކޮންމެ ކުޅުންތެރިއަކު ގޯލެއް ޖެހި އެވެ.
ހދ. ނައިވާދޫ އާއި ހދ. މަކުނުދޫ ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
ހދ. ނޭކުރެންދޫ އިން ސެމީގެ ޖާގަ ހޯދީ އެ އަތޮޅު ހަނިމާދޫގެ މައްޗަށް 3-0 ގެ ނަތީޖާއަކުން ކުރިހޯދައިގެންނެވެ. މި މެޗުގެ 14 ވަނަ މިނެޓުގައި ނޭކުރެންދޫގެ ކެޕްޓަން މުހައްމަދު ވިލްފް ގޯލު ޖަހާ އެ ޓީމަށް ލީޑު ނަގައިދިނެވެ. އަދި ދެ ވަނަ ހާފުގެ ނުވަ ވަނަ މިނެޓުގައި ނޭކުރެންދޫގެ ލީޑު ފުޅާކޮށްދިނީ މުހައްމަދު ރާއިފް ފަޒީލް ޖެހި ގޯލުންނެވެ. އަދި ނޭކުރެންދޫގެ ތިންވަނަ ގޯލު ދެ ވަނަ ހާފުގެ ފަހު މިނެޓުގައި އެ ޓީމަށް ޖަހާދިނީ އަލީ އިފާޒް އެވެ.
ހދ. ނޮޅިވަރަމުން ސެމީގެ ޖާގަ ހޯދީ ވައިކަރަދޫގެ މައްޗަށް 3-1 ގެ ނަތީޖާއަކުން ކުރި ހޯދައިގެންނެވެ. މި މެޗުގެ 15 ވަނަ މިނެޓުގައި ސާލިމް މުހައްމަދު ޖެހި ގޯލުން ނޮޅިވަރަމުން ލީޑު ނެގި ނަމަވެސް ދެ ވަނަ ހާފު ފަށައިގެން ދެވަނަ މިނެޓުގައި ވައިކަރަދޫގެ އަހުމަދު އަނީސް ޖެހި ގޯލުން އެ ޓީމުން ވަނީ ނަތީޖާ ހަމަހަމަ ކޮށްފަ އެވެ.
އެކަމަކު، އޭގެ ތިން މިނެޓު ފަހުން ސާލިމް އިތުރު ގޯލެއް ޖަހާ އަލުން ނޮޅިވަރަމަށް ލީޑު ނަގައިދިނެވެ. އަދި ދެ ވަނަ ހާފުގެ 10 ވަނަ މިނެޓުގައި ސާލިމް ގޯލު ޖަހާ އޭނާގެ ހެޓްރިކް ފުރިހަމަ ކުރި އެވެ.
ހދ. ވައިކަރަދޫ އާއި ހދ. ނޮޅިވަރަން ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން / އަދަދު
ހދ. އަތޮޅުގެ ކުއާޓާ ފައިނަލުތަކުގެ ތެރެއިން އެންމެ ފޯރިގަދަކޮށް ދިޔައީ ނޮޅިވަރަންފަރު އަދި ނެއްލައިދޫގެ ކުރިމަތިލުމެވެ. މި މެޗުގެ ފުރިހަމަ ވަގުތު ހަމަވީ 3-3 ގެ ނަތީޖާ އަކުން އެއްވަރު ވެގެންނެވެ. ޕެނަލްޓީގައި ނޮޅިވަރަންފަރުން ކުރިހޯދީ 9-8 ގެ ނަތީޖާއަކުންނެވެ.
މި މެޗުގެ ހަތް ވަނަ މިނެޓުގައި ނޮޅިވަރަންފަރުގެ ކީޕަރު އަހުމަދު ވަހީދަށް ހެދުނު ގޯހެއްގެ ފައިދާ ނަގާ ނެއްލައިދޫ އަށް ލީޑު ނަގައިދިނީ ހުސެއިން ހާފިޒެވެ. އަދި އޭގެ ސިކުންތުކޮޅެއްގެ ފަހުން ހާފިޒު ވަނީ އިތުރު ގޯލެއް ޖަހާ އެ ޓީމުގެ ލީޑު ފުޅާކޮށްދީފަ އެވެ. އެކަމަކު މެޗުގެ 14 ވަނަ މިނެޓުގައި ނޮޅިވަރަންފަރުގެ ކެޕްޓަން އަހުމަދު ޝިޒާން ޖެހި ހިތްގައުމު ގޯލުން އެ ޓީމުން ފަރަގު ކުޑަކުރި އެވެ. އަދި ދެވަނަ ހާފު ފަށައިގެން މިނެޓެއްގެ ތެރޭގައި ނޮޅިވަރަންފަރުން ވަނީ ނަތީޖާ ހަމަހަމަ ކޮށްފަ އެވެ. މި ގޯލު އެ ޓީމަށް ޖަހާދިނީ ނާއިޒް ހަސަން (ދާދު) އެވެ. އެކަމަކު ދެވަނަ ހާފުގެ 11 ވަނަ މިނެޓުގައި ހާފިޒު އިތުރު ގޯލެއް ޖަހާ އަލުން ނެއްލައިދޫއަށް ލީޑު ނަގައިދިނެވެ. ނޮޅިވަރަންފަރަށް ނަތީޖާ ހަމަހަމަ ކޮށްދިނީ މެޗު ނިމެން ތިން މިނެޓަށް ވެފައި ވަނިކޮށް މުހައްމަދު އަހުސަން ކާމިޔާބު ކޮށްދިން ގޯލުންނެވެ.
ނަތީޖާ އެއްވަރުވުމާއެކު ޖެހި ޕެނަލްޓީތަކުގެ ތެރެއިން ހަ ޕެނަލްޓީ ނޮޅިވަރަންފަރުން ކާމިޔާބުކުރިއިރު, ނެއްލައިދޫގެ ހުސެއިން ހާޒިމް ޖެހި ޕެނަލްޓީ ނޮޅިވަރަންފަރުގެ ކީޕަރު ވަހީދު ވަނީ ދިފާއު ކޮށްފަ އެވެ.
މީގެ އިތުރުން ރޭ ވަނީ ގއ. އަތޮޅުގެ މެޗުތައް ވެސް ކުރިއަށް ގޮސްފަ އެވެ. ގއ. ވިލިނގިލީގެ މައްޗަށް އެ އަތޮޅު ކަނޑުހުޅުދޫ އިން ކުރިހޯދީ 4-0 ގެ ނަތީޖާއަކުންނެވެ. މި މެޗުގައި ކަނޑުހުޅުދޫގެ އިސްމާއިލް އަންވާރު ދެ ގޯލު ޖެހިއިރު, އަހުމަދު ޖަވާޒް އަދި އަލީ އަޒްވާން އަބްދުލް އަޒީޒް, މިއިން ކޮންމެ ކުޅުންތެރިއަކު ގޯލެއް ޖެހި އެވެ.
ގއ. ކޮލަމާފުށީގެ މައްޗަށް އެ އަތޮޅު ދެއްވަދޫ އިން ކުރިހޯދީ 3-1 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގައި ދެއްވަދޫގެ އަހުމަދު ރާހިލް ރަޝީދު ދެ ގޯލު ޖެހިއިރު, އަހުނަފް ރަޝީދު ގޯލެއް ޖެހި އެވެ. ކޮލަމާފުށީގެ ހަމައެކަނި ގޯލު އެ ޓީމަށް ޖަހާދިނީ އާސިފް ހަނީފް އެވެ.
ގއ. ދެއްވަދޫ އާއި ގއ. ކޮލަމާފުށި ބައްދަލުކުރި މެޗުގެ ތެރެއިން - ފޮޓޯ: އަބްދުالله އިޔާން އަދަދު
ގއ. ދާންދޫގެ މައްޗަށް އެ އަތޮޅު ނިލަންދޫ އިން ކުރިހޯދީ 3-2 ގެ ނަތީޖާއަކުންނެވެ. މި މެޗުގެ ތިންވަނަ މިނެޓުގައި ނިލަންދޫގެ އަބްދުالله ޒިހުނީ ގޯލު ޖަހާ އެ ޓީމަށް ލީޑު ނަގައިދިން އިރު, މެޗުގެ 16 ވަނަ މިނެޓުގައި މުހައްމަދު ޝާވިން ހުސެއިން ގޯލު ޖަހާ އެ ޓީމަށް ލީޑު ފުޅާކޮށްދިނެވެ. އެކަމަކު ދެވަނަ ހާފު ފަށައިގެން ފަސްވަނަ މިނެޓުގައި ދާންދޫގެ ހުސެއިން ސައީދު ގޯލު ޖަހާ ފަރަގު ކުޑަކުރި އެވެ. އަދި މެޗު ނިމެން މިނެޓަކަށް ވެފައި ހުއްޓައި އަހުމަދު ހުސެއިން ޖެހި ގޯލުން ދާންދޫ އިން ނަތީޖާ ހަމަހަމަ ކުރިނަމަވެސް އޭގެ މިނެޓެއް ފަހުން މެޗުން މޮޅު ކޮށްދިން ގޯލު ނިލަންދޫ އަށް ޖަހާދިނީ މުހައްމަދު ޒާހިލް އަހުމަދެވެ.
ގއ. އަތޮޅުގެ އެންމެ ފަހުގެ ޗެމްޕިއަން މާމެންދޫގެ މައްޗަށް އެ އަތޮޅު ކޮނޑޭއިން ކުރިހޯދީ 1-0 ގެ ނަތީޖާއަކުންނެވެ. މި މެޗުގެ ހަމައެކަނި ގޯލު ކޮނޑޭއަށް ޖަހާދިނީ އަހުމަދު އަނަސް އެވެ.
ގޯލްޑަން ފުޓްސަލް ޗެލެންޖުގައި މިރޭވެސް އަށް މެޗު ކުޅޭނެ އެވެ. އެއީ އއ. އަތޮޅުގެ މެޗުތަކުގެ އިތުރުން ތ. އަދި ނ. އަތޮޅުގެ މެޗުތަކެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
- އއ. ތޮއްޑޫ - އއ. މަތިވެރި : 20:00 (ގްރައުންޑް 1)
- އއ. ފެރިދޫ - އއ. ބޮޑުފުޅަދޫ : 20:00 (ގްރައުންޑް 2)
- ތ. ގާދިއްފުށި - ތ. ކިނބިދޫ : 21:00 (ގްރައުންޑް 1)
- ތ. ބުރުނި - ތ. އޮމަދޫ : 21:00 (ގްރައުންޑް 2)
- ތ. ގުރައިދޫ - ތ. ވޭމަންޑޫ : 22:00 (ގްރައުންޑް 1)
- ތ. ހިރިލަންދޫ - ތ. މަޑިފުށި : 22:00 (ގްރައުންޑް 2)
- ނ. މާފަރު - ނ. ހޮޅުދޫ : 23:00 (ގްރައުންޑް 1)
- ނ. މިލަދޫ - ނ. ކެނދިކުޅުދޫ : 23:00 (ގްރައުންޑް 2)
