މެންޗެސްޓާ (ޖެނުއަރީ 27) - މި ސީޒަނަށް ފަހު ލިވަޕޫލް ދޫކޮށްލަން ނިންމާފައިވާ ކަމަށް ޔާގަން ކްލޮޕް އިއުލާނުކޮށްފައިވާއިރު، ދެން، ލިވަޕޫލާ ކުޅުމުގެ ކުރިން ފަސޭހައިން ނިދާލެވޭނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި ޕްރިމިއާ ލީގުގެ މިދިޔަ ފަސް އަހަރަށް ބަލާއިރު، ސިޓީ ނޫން ޓީމަކަށް ލީގު ޗެމްޕިއަންކަން ހޯދިފައިވަނީ ލިވަޕޫލް އަށެވެ.
ވޭތުވެދިޔަ ސީޒަންތަކުގައި، ލިވަޕޫލާއި ސިޓީ ކުޅޭ ކޮންމެ މެޗެއް ވެގެންދަނީ ފޯރިގަދަ ކުރިމަތިލުމަކަށެވެ.
ލިވަޕޫލް ދޫކޮށްލަން ކްލޮޕް ނިންމި ނިންމުމާ ބެހޭގޮތުން ގާޑިއޯލާ ދެކޭ ގޮތެއް އޮޅުންފިލުވާލަން ގިނަ ސުވާލުތަކެއް ވަނީ ކުރިމަތިވެފަ އެވެ.
ކްލޮޕްގެ ލިވަޕޫލް ޓީމަކީ ގާޑިއޯލާ ދެކޭގޮތުގައި، އޭނާގެ ކެރިއަރުގައި ދިމާވި އެންމެ އުނދަގޫ ޗެލެންޖެކެވެ.
އެ އަށް އިޝާރާތްކޮށް، ގާޑިއޯލާ ދީފައިވަނީ މަޖާޒީ ޖަވާބެކެވެ.
"އަހަރެން ވެސް މިސް ވާނެ އޭނަ (ކްލޮޕް). މި ލީގު ވެސް އޭނަ މިސް ވާނެ، ދެން އަހަރެން ބުނާނެ އަނެއް ވާހަކަ އަކީ، އޭނަ (ކްލޮޕް) ނެތީމަ ލިވަޕޫލާ ކުޅެން ޖެހޭ މެޗުގެ ކުރިން ރޭގައި އަހަންނަށް ވަރަށް ފަސޭހައިން ނިދާލެވޭނެ. އަހަރެން އަބަދުވެސް އޭނަ (ކްލޮޕް) އަށް ކާމިޔާބަށް އެދެން،" ގާޑިއޯލާ ބުންޏެވެ.
ލިވަޕޫލާ އެކު، 2026 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓްގައި ހުރި ކްލޮޕް އެ ޓީމު ދޫކޮށްލާ ސަބަބެއްގެ ގޮތުގައި ބުނެފައިވަނީ، އެ ވަޒީފާގައި ކުރިއަށްދެވޭހާ "ހަކަތަ އާއި ބުންވަރު" ނެތް ކަމަށެވެ.
ގާޑިއޯލާ ބުނީ، ކްލޮޕްގެ އެ ވާހަކަ އަށް ތާއީދުކުރެވެނީ އަމިއްލަ ތަޖުރިބާގެ އަލީގައި ކަމަށެވެ.
"ކޮންމެ މެނޭޖަރެއް ވެސް އެ އިހުސާސް ކުރާނެ. ވަރުބަލިވާނެ އެއް މަސައްކަތެއް އެއް ގޮތަކަށް ކުރަން ޖެހެންޏާ. އަހަންނަށް ވެސް އެކަން ދިމާވި، އަހަރެންގެ ވެސް އެ ތަޖުރިބާ އެބަހުރި، ބާސެލޯނާގައި އަހަންނަށް ވެސް އެކަން ކުރިމަތިވި،" ގާޑިއޯލާ، 2012 ވަނަ އަހަރު ބާސެލޯނާ ދޫކޮށްލަން ނިންމި ނިންމުން ހަނދާން ކުރަމުން ބުންޏެވެ.
ކްލޮޕް، ލިވަޕޫލާ ހަވާލުވީ، 2015 ވަނަ އަހަރުގެ އޮކްޓޫބަރު މަހު އެވެ. ގާޑިއޯލާ، ސިޓީގެ ކޯޗުކަމަށް ގެނައީ، 2016 ވަނަ އަހަރު އެވެ.
ލިވަޕޫލާއި ސިޓީގެ ކުރިން، ކްލޮޕް އާއި ގާޑިއޯލާގެ ކުރިމަތިލުންތައް ފެނުނީ، ޖަރުމަނު ލީގުގަ އެވެ. ކްލޮޕް ހުރީ ބޮރޫޝިއާ ޑޯޓްމަންޑްގަ އެވެ. ގާޑިއޯލާ ހަވާލުވެހުރީ ބަޔާން މިއުނިކާ އެވެ.
