ލިވަޕޫލް (26 ޖެނުއަރީ) - މި ސީޒަނަށް ފަހު ލިވަޕޫލްގެ ކޯޗުކަމުން ވަކިވާނެ ކަމަށް އެ ޓީމުގެ ކޯޗު ޔާގަން ކްލޮޕް ބުނެފި އެވެ.
ލިވަޕޫލްގެ ކޯޗުކަމާ 2015 ވަނަ އަހަރު ހަވާލުވެ، ކްލޮޕް ވަނީ ޔޫރަޕްގެ ގަދަ ޓީމަކަށް އެ ޓީމުން އަލުން ހަދައިފަ އެވެ. ލިވަޕޫލް 30 އަހަރުގެ ތެރޭގައި ފުރަތަމަ ފަހަރަށް ޕްރިމިއާ ލީގުގެ ޗެމްޕިއަންކަން 2020 ވަނަ އަހަރު ހޯދީ ކްލޮޕްގެ އިރުޝާދުގެ ދަށުންނެވެ. އަދި 2019 ވަނަ އަހަރު ޗެމްޕިއަންސް ލީގު ވެސް ކާމިޔާބުކުރިއެވެ.
އެކަމަކު, ހީވެސް ނުކުރާ ފަދަ ދަނޑިވަޅެއްގައި ލިވަޕޫލްގެ ކޯޗުކަމުން މި ސީޒަނަށް ފަހު ވަކިވާން ނިންމާފައިވާކަން ކްލޮޕް އިއުލާންކުރުމަކީ ލިވަޕޫލްގެ ސަޕޯޓަރުންނަށް ލިބުނު ހައިރާން ކަމެކެވެ.
ލިވަޕޫލްގެ ވެބްސައިޓުގައި މިއަދު އާންމުކުރި އިންޓަވިއުއެއްގައި ކްލޮޕް ބުނީ ލިވަޕޫލްގެ ކޯޗުކަމުގައި އިތުރަށް ކުރިއަށް ދިއުމުގެ "ހަކަތައެއް މިހާރު ނެތް" ކަމަށެވެ.
"ރީތިކޮށް ބުނަންޏާ އަހަރެންގެ ހަކަތަ ހުސްވަނީ. އަހަންނަށް އެނގޭ ކޮންމެވެސް ދުވަހަކުން މި ވަގުތާ ކުރިމަތިލާންޖެހޭނެކަން. އަހަންނަށް އެނގޭ އެއް ލެެވެލްއެއްގައި މި ޒިންމާތައް އަބަދު ނުނެގޭނެކަން،" ކްލޮޕް ބުންޏެވެ.
"މި ކްލަބާއި މި ސީޓީ އާއި ސަޕޯޓަރުންނާއި ޓީމު އަދި ސްޓާފުން ދެކެ އަހަރެން ވަރަށް ލޯބިވޭ. އެހެންވީމަ އެނގޭނެ އަހަރެން ޓީމާ ވަކިވާން އަހަރެން ނިންމާމީ ވަރަށް ބޮޑަށް އެކަމާމެދު ވިސްނުމަށް ފަހުކަން."
ކްލޮޕް، 56، ބުނީ މި ސީޒަނަށް ފަހު ލިވަޕޫލްގެ ކޯޗުކަން ދޫކޮށްލަން އޭނާ ނިންމީ މިދިޔަ އަހަރުގެ ނޮވެމްބަރު މަހުގެ ތެރޭގައި ކަމަށެވެ.
ޔަގީންކަމާ އެކު ބުނަން ކެރޭ އެއް ވާހަކަ އަކީ އިނގިރޭސި އިތުރު ކްލަބަކަށް އޭނާ ކޯޗުކޮށްނުދޭނެކަން ކަމަށް ކްލޮޕް ބުނެފައިވެ އެވެ.
ކުރިން މައިންޒް އާއި ބޮރޫޝިއާ ޑޯޓްމަންޑަށް ކޯޗުކޮށްދިން ކްލޮޕް ބުނީ ދެން ހަވާލުވާނެ ޓީމެއް ކަނޑައެޅުމުގައި ވިސްނަން ޖެހޭ ކަންތައްތަކެއް އެބަހުރި ކަމަށެވެ.
ކްލޮޕްގެ ކޯޗުކަމުގެ ދަށުގެ މިދިޔަ ސީޒަން ލިވަޕޫލް ނިންމާލީ ޕްރިމިއާ ލީގުގެ ފަސް ވަނައިގައެވެ. އަދި ޗެމްޕިއަންސް ލީގުގެ ގަދަ 16 އިން އެ ޓީމު ވަނީ ކަޓައިފަ އެވެ.
ކްލޮޕް ބުނީ މިދިޔަ ސީޒަންގެ ނަތީޖާތައް ދަށްވެ، ޓީމު މާޔޫސްވެފައި އޮތް ދަނޑިވަޅެއްގައި އެ ޓީމު ދޫކޮށްލަން އޭނާ ބޭނުމެއްނުވި ކަމަށެވެ. އަދި އޭނާ އުންމީދުކުރަނީ މި ސީޒަންގައި ކާމިޔާބީތަކެއް ހޯދައި، އުފާވެރި މާހައުލެއްގައި ޓީމާ ވަކިވާން ކަމަށެވެ.
ފަސް ޕޮއިންޓްގެ ލީޑަކާއެކު ލިވަޕޫލް މި ވަގުތު އޮތީ ޕްރިމިއާ ލީގު ތާވަލްގެ އެއްވަނައިގައެވެ. އަދި އެ ޓީމު ވަނީ އިނގިރޭސި ލީގު ކަޕްގެ ފައިނަލުން ޖާގަ ހޯދައިފަ އެވެ.
