ލަންޑަން (ޖެނުއަރީ 25) - ފުޓުބޯޅަ ކްލަބުތަކުގެ ތެރެއިން 2023/2022ގައި އެންމެ ބޮޑު އާމްދަނީއެއް ހޯދައި، މެންޗެސްޓާ ސިޓީ ފަހަތަށް ޖައްސާލުމަށްފަހު އެންމެ މުއްސަނދި ކްލަބުގެ މަގާމު ރެއާލް މެޑްރިޑް އިން ހޯދައިފިއެވެ.
ޑެލޮއިޓް އިން ނެރުނު ކްލަބުތަކުގެ މާލީ ރޭންކިން އިން ދައްކާ ގޮތުގައި ރެއާލް އިން ވަނީ 2023/2022ގައި 831 މިލިއަން ޔޫރޯގެ ރެކޯޑު އާމްދަނީއެއް ހޯދައިފަ އެވެ. މިއީ އޭގެ ކުރީ އަހަރާ އަޅާބަލާއިރު 118 މިލިއަން ޔޫރޯގެ ކުރިއެރުމެކެވެ. މިއީ 2018/2017ގެ ފަހުން ޑެލޮއިޓް ރޭންކިންގެ އެއްވަނަ އަށް ރެއާލް ޖެހިލި ފުރަތަމަ ފަހަރެވެ.
މިދިޔަ ސީޒަންގައި ރެއާލަށް ސްޕެނިޝް ލީގު ކާމިޔާބު ނުކުރެވުނު ނަމަވެސް އެ ކްލަބުގެ އާމްދަނީ އިތުރުވީ ރީޓެއިލް ވިޔަފާރީގައި ލިބުނު ކުރިއެރުމާއި ދަނޑަށް ވަންނަ މީހުންގެ އަދަދު އިތުރުވުން އަދި ކޮވިޑް-19 އަށް ފަހު އެ ކްލަބަށް ލިބޭ ސްޕޮންސާޝިޕްތައް އިތުރުވުމެވެ.
މިދިޔަ ސީޒަންގައި އިނގިރޭސި ޕްރިމިއާ ލީގާއި ޗެމްޕިއަންސް ލީގު އަދި އެފްއޭ ކަޕް ކާމިޔާބުކުރި ސިޓީ ވަނީ ރޭންކިންގްގެ ދެވަނަ އަށް ވެއްޓިފައެވެ. ސިޓީ އަށް އާމްދަނީގެ ގޮތުގައި ލިބުނީ 826 މިލިއަން ޔޫރޯއެވެ.
ފްރާންސް ޕީއެސްޖީން ވަނީ 802 މިލިއަން ޔޫރޯގެ އާމްދަނީއެއް ހޯދައި، ރޭންކިންގްގެ ތިން ވަނަ ހޯދައިފައެވެ. މިއީ ޕީއެސްޖީ މި ރޭންކިންގްގެ ގަދަ ތިނަކަށް އެރި ފުރަތަމަ ފަހަރެވެ.
ބާސެލޯނާ ހަތަރު ވަނައިގައި އޮތީ 800 މިލިއަން ޔޫރޯގެ އާމްދަނީއެއް ހޯދައިގެެނެވެ. ބާސެލޯނާ މިދިޔަ އަހަރުގެ ރޭންކިންގައި އޮތީ ހަތް ވަނައިގައެވެ. ގަދަ 10ގައި ދެން އޮތީ މެންޗެސްޓާ ޔުނައިޓަޑާއި ބަޔާން މިއުނިކާއި ލިވަޕޫލާއި ޓޮޓެންހަމް ހޮޓްސްޕާ އާއި ޗެލްސީ އަދި އާސެނަލްއެވެ.
ޑެލޮއިޓް ރޭންކިންގެ ގަދަ 20ގައި ހިމެނޭ 17 ކްލަބަކަށް ކޮމާޝަލް ރެވެނިއުގެ ކުރިއެރުން ވަނީ ލިބިފައެވެ. މީގެ އެންމެ ބޮޑު ސަބަބަކީ ކްލަބުތަކުގެ ރީޓެއިލް ވިޔަފާރިތައް ކުރިއެރުމާއި މެޗު-ޑޭ ހަރަކާތްތަކުގެ ބޭރުން ލިބޭ އާމްދަނީ އިތުރުވުމުގެ އިތުރުން، ކޮވިޑް-19 އަށް ފަހު ކްލަބުތަކަށް ލިބޭ ސްޕޮންސަރުން އިތުުރުވުމެވެ.
