މިއުނިކް (ޖެނުއަރީ 25) - ޖަރުމަނު ލީގުގައި ބަޔާން މިއުނިކުން ރޭ 1-0 އިން ޔޫނިއަން ބާލިން ބަލިކޮށް، ލީގުގެ އެއް ވަނައިގައި އޮތް ބަޔާ ލެވަކޫސަނާ ދެމެދު އޮތް ޕޮއިންޓުގެ ފަރަގު ކުޑަކޮށްފި އެވެ.
މި މެޗުން ބަޔާން މޮޅުވުމާ އެކު، ލެވަކޫސަން މި ވަގުތު ލީގު ތާވަލުގެ ކުރީގައި އޮތީ، ހަތަރު ޕޮއިންޓުގެ ލީޑަކާ އެކު އެވެ. މެޗަކުން ބަލިނުވެ، އެންމެ ކުރީގައި ލެވަކޫސަން އޮތީ 18 މެޗުން 48 ޕޮއިންޓް ހޯދައިގެންނެވެ. ބަޔާނުން ދެ ވަނައިގައި އޮތީ 18 މެޗުން 44 ޕޮއިންޓާ އެކު އެވެ.
އެންމެ ފަހުން ލީގުގައި އަމިއްލަ ދަނޑުގައި ކުޅުނު މެޗުން ވާޑާ ބްރެމަން އަތުން ބަލިވެފައި އޮތުމުން، މި މެޗަށް ނުކުތްއިރު ބަޔާނަށް ކޮންމެ ވެސް ވަރެއްގެ ޕްރެޝަރެއް އޮތެވެ. އެ ޕްރެޝަރުގައި ކުޅެން ޖެހުމާއި ފުރަތަމަ ހާފުގައި ޔޫނިއަން ބާލިން ރަނގަޅު ކުޅުމެއް ދެއްކުމުން، ބަޔާނަށް ލީޑެއް ނެގުން ވީ އުނދަގޫ ކަމަކަށެެވެ.
އެކަމަކު، ދެ ވަނަ ހާފުގެ ކުޅުން ފެށިގެން 30 ސިކުންތު ތެރޭގައި ބަޔާނުން ވަނީ މެޗުގައި ފެނިގެންދިޔަ ހަމައެކަނި ގޯލު ޖަހައިފަ އެވެ. ބަޔާންގެ ފޯވާޑް، ހެރީ ކޭން ކުރި އެޓޭކެއްގައި ދަނޑީގައި ޖެހިފައި އައި ބޯޅައެއް ހޯދައި، ރަފައެލް ގަރޭރޯ ވަނީ ބަޔާންގެ ގޯލު ޖަހައިފަ އެވެ.
މި މެޗުގައި ބަޔާނުން ދެ ވަނަ ގޯލެއް ވެސް ޖެހި އެވެ. އެކަމަކު، ކޭން ޖެހި ގޯލު ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު، ބަލައިނުގަންނަން ނިންމީ، އެޓޭކްގައި ބައިވެރިވި ލެރޯއި ސާނޭ އޮފްސައިޑް ކަމަށްވާތީ އެވެ. މިއީ ލީގުގައި ރެކޯޑް އަދަދަކަށް ގޯލު ޖަހަމުން އަންނަ ކޭން އަށް ލީގުގައި ގޯލެއް ނުޖެހި ނިންމާލި ފަސް ވަނަ މެޗެެވެ.
ސާނޭ އަށް ހަމަލާދޭން އުޅުމުން މި މެޗުގައި ޔޫނިއަން ބާލިންގެ ކޯޗު، ނެނަދު ބިޖެލިކާ އަށް ވަނީ ރަތް ކާޑު ދައްކައިފަ އެވެ.
މި ފަހަރުގެ ޓްރާންސްފާގައި ލޯން ޑީލެއްގެ ދަށުން ބަޔާނަށް ގެނައި، ޓޮޓެންހަމް ހޮޓްސްޕާސްގެ އިނގިރޭސި ޑިފެންޑަރު، އެރިކް ޑަޔާ ވަނީ މި މެޗުގައި ކުޅެފަ އެވެ. އޭނާ ކުޅެން އެރީ ދެ ވަނަ ހާފުގައި ބަދަލަކަށެވެ.
