މިއުނިކް (ޖެނުއަރީ 22) -ޖަރުމަނު ލީގުގައި ވާޑާ ބްރެމަން އަތުން 1-0 އިން ބަލިވެ، އެންމެ ފަހުގެ ޗެމްޕިއަން، ބަޔާން މިއުނިކުން މި ފަހަރުގެ ލީގުގެ ރޭހުގައި ވެއްޓުމަކާ ކުރިމަތިލާން ޖެހިއްޖެ އެވެ.
ރޭގެ މެޗުން ބަޔާން ބަލިވުމުން، އެ ޓީމު ލީގުގެ ދެ ވަނައިގައި އޮތީ އެއް ވަނައިގައި އޮތް ބަޔާ ލެވަކޫސަން އަށް ވުރެ ހަތް ޕޮއިންޓް ފަހަތުގަ އެވެ. ވަކޫސަނުން ވަނީ ހޮނިހިރު ދުވަހުގެރޭ، 3-2 އިން އާރްބީ ލައިޕްޒިގު ބަލިކޮށްފަ އެވެ.
ލެވަކޫސަން އަށް 18 މެޗުން 48 ޕޮއިންޓް ލިބިފައިވާއިރު، ބަޔާނަށް 17 މެޗުން ވަނީ 41 ޕޮއިންޓް ލިބިފަ އެވެ. ލެ
ބަޔާން ދަނޑުގައި 2008 ވަނަ އަހަރުގެ ފަހުން ފުރަތަމަ ފަހަރަށް ބްރެމަން އިން މޮޅެއް ހޯދިއިރު، މެޗުގެ ހަމައެކަނި ގޯލު ޖެހީ 59 ވަަނަ މިނިޓްގައި މިޓްޗެލް ވައިސާ އެވެ. ކުރިން ބަޔާނަށް ކުޅުނު ވައިސާ މި ގޯލު ޖެހީ ބަޔާންގެ އަލްފަންސޯ ޑޭވިސް ކައިރިން ބޯޅަ ހިފައިގެންދިއުމަށް ފަހު އެެވެ.
މިއީ ބަޔާނުން 2020 ވަނަ އަހަރުގެ ފެބްރުއަރީ މަހު އާރްބީ ލައިޕްޒިގާ ދެކޮޅަށް ކުޅުނު މެޗަށް ފަހު އަމިއްލަ ދަނޑުގައި ގޯލެއް ނުޖެހި ނިންމާލަން ޖެހުނު ފުރަތަމަ މެޗެވެ. އެ މެޗުގެ ފަހުން، ލީގުގައި އަމިއްލަ ދަނޑުގައި ކުޅުނު 66 މެޗުގެ ތެރެއިން ލަނޑެއް ނުޖެހި ދިޔައީ ރޭގެ މެޗުގަ އެވެ.
ބަޔާންގެ ފޯވާޑް، ހެރީ ކޭން އަށް މި މެޗުގައި ގޯލު ޖަހަން މާ ރަނގަޅު ފުރުސަތުތަކެއް ނުލިބުނެވެ. އަނެއްކޮޅުން، ބަދަލުތަކެއް ގެނެސްގެން ބަޔާނުން ގޯލެއް ޖަހަން ކުރި މަސައްކަތް ވެސް ކާމިޔާބެއްނުވީ އެވެ.
މެޗަށް ފަހު ބަޔާންގެ ކޯޗު ތޯމަސް ޓުޗެލް ބުނީ ކުޅުންތެރިންގެ ފަރާތުން އެކަށީގެންވާ ވަރުގެ ރަނގަޅު އެޓިޓިއުޑެއް ނުފެނުނު ކަމަށެވެ. އަދި މެޗުން މޮޅުވާ ވަރަށް މަސައްކަތް ކުރަން ޖެހޭނީ މުޅި ޓީމު އެއްކޮށް އެއް މިސްރާބެއްގައި ތިބެގެން ކަމަށް ވެސް ޓުޗެލް ބުނެފައިވެ އެވެ.
