މިލާން (ޖެނުއަރީ 21) - އިޓާލިއަން ލީގުގައި އުދިނޭޒީ ސަޕޯޓަރުން ނަަސްލީ ގޮތުން އޭސީ މިލާންގެ ގޯލްކީޕަރު، މައިކް މައިގްނޯންއާ ދިމާކޮށްލުމުން މެދުކަނޑާލަން ޖެހުނު މެޗުން މިލާނުން 3-2 އިން އުދިނޭޒީ ބަލިކޮށްފި އެވެ.
އުދިނޭޒީ ދަނޑުގައި މިލާނުން، 31 ވަނަ މިނިޓްގައި ރުބެން ލޮފްޓަސް-ޗީކް ޖެހި ގޯލުން ލީޑުނެގިތާ ކުޑައިރުކޮޅެއްގެ ތެރޭގައި މިލާންގެ ފްރާންސް ކީޕަރު މައިގްނޯންއާ އުދިނޭޒީ ސަޕޯޓަރުން ނަސްލީ ގޮތުން ދިމާކޮށްލި އެވެ. އެއާ އެކު، އެކަން ރެފްރީގެ ސަމާލުކަމަށް ގެނައުމަށް ފަހު، އެކަން ތަކުރާރުވާތީ، މައިގްނޯން ވަނީ މިލާންގެ ބައެއް ކުޅުންތެރިންނާ އެކު ދަނޑުން ފައިބައިފަ އެވެ.
އަލުން މެޗު ފެށީ 10 ވަރަކަށް މިނިޓަށް ފަހު އެވެ.
މެދުކެނޑުމަށް ފަހު ކުޅުން ފެށިގެން ފުރަތަމަ ހާފު ނިމުމުގެ ކުރިން އުދިނޭޒީން އެއްވަރުކުރި އެވެ. މި ގޯލު މެޗުގެ 42 ވަނަ މިނިޓްގައި ޖެހީ ލަޒާ ސަމަރްދްޒިޗް އެވެ. އަދި މެޗުގެ 62 ވަނަ މިނިޓްގައި ފްލޯރިއަން ތޯވާން ވަނީ އުދިނޭޒީ އަށް ލީޑުނަަގައިދީފަ އެވެ.
އެކަމަކު، މިލާނުން ވަނީ ފަހު ވަގުތު ކުރި ހިތްވަރާ އެކު ނަތީޖާ އަނބުރާލައިފަ އެވެ. މިލާނަށް އެއްވަރުކޮށްދިނީ 83 ވަނަ މިނިޓްގައި ލޫކަ ޔޯވިޗް އެވެ. އަދި މެޗުގެ އިތުރު ވަގުތުގެ ތިން ވަނަ މިނިޓްގައި މިލާން މޮޅުކޮށްދިން ގޯލު ޖެހީ ނޯއާ އޮކަފޯ އެވެ.
ލީގުގައި ރޭ ހެޔަސް ވެރޯނާ އަތުން އަމިއްލަ ދަނޑުގައި ކުޅުނު ރޯމާ މޮޅުވީ 2-1 އިންނެވެ. މިއީ ހޯސޭ މޮރީނިއޯ ވަކިކޮށް ޑަނިއެލޭ ޑި ރޮސީއާ ރޯމާގެ ކޯޗުކަން ހަވާލުކުރި ފަހުން، އެ ޓީމުން ކުޅުނު ފުރަތަމަ މެޗެވެ. މި މެޗުގައި ރޯމާގެ ސަޕޯޓަރުން ވަނީ މޮރީނިއޯ އަށް އޮތް ލޯބި ދައްކާލުމަށް ދަނޑުގައި ބެނާތަކެއް ހަރުކޮށްފަ އެވެ.
މި ނަތީޖާތަކަށް ފަހު މިލާން ތިން ވަނައިގައި އޮތީ 21 މެޗުން 45 ޕޮއިންޓާ އެކު އެވެ. އެއް ވަނައިގައި އޮތް އިންޓަ މިލާނަށް 20 މެޗުން 51 ޕޮއިންޓް ލިބިފައިވާއިރު، ދެ ވަނައިގައި އޮތް ޔުވެންޓަސް އަށް 20 މެޗުން ވަނީ 49 ޕޮއިންޓް ލިބިފަ އެވެ.
