ގައުމީ ބާސްކެޓްބޯޅަ ލީގުގެ އަންހެން ޑިވިޝަނުގައި ކުޅުނު ފުރަތަމަ މެޗުން އެލީޓް ސްޕޯޓްސް ކްލަބް އަތުން ކުއީންސް ބާސްކެޓްބޯލް ކްލަބް މޮޅުވެއްޖެ އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު މެޗުން ކުއީންސް މޮޅުވީ، 82-56 އިންނެވެ.
މި މެޗުގެ ކުއީންސް އިން ވަނީ 25-07 އިން ލީޑުނަަގައިފަ އެވެ. މިއީ މި މެޗުން މޮޅުވުމުގައި ކުއީންސް އަށް ލިބުނު އެންމެ ބޮޑު ފަސޭހަ އެވެ. ދެން ކުޅުނު އެއްވެސް ކުއާޓަރެއްގައި ކުއީންސް އަށް ފުރަތަމަ ކުއާޓަރުގައި ޕޮއިންޓް ސްކޯކުރި މިންވަރަށް ނުކުރެވުނެވެ. އެކަމަކު، މެޗުގެ ކޮންޓްރޯލް އަތުގައި ބޭއްވޭ ވަރަށް އެ ޓީމުން ދިޔައީ މަސައްކަތުގެ ރޭޓް ދަމަހައްޓަމުންނެވެ.
އެލީޓަށް ބަލާއިރު، އެ ޓީމަށް އެންމެ ރަނގަޅަށް ޕާފޯމްކުރެވުނީ ތިން ވަނަ ކުއާޓާގަ އެވެ. މި ކުއާޓާ އަށް ބަލާއިރު، ކުއީންސް އަށް ވުރެ އެ ޓީމުގެ ސްކޯރިން ރަނގަޅެވެ.
ރޭގެ މެޗުން ކުއީންސް މޮޅުކޮށްދިނުމުގައި އެންމެ އިސް ރޯލެއް ކުޅުނީ، 19 ޕޮއިންޓް ހޯދި، އައިމިނަތު އިސްރާއު އަބްދުލް ޝުކޫރު (އިއްކޮ) އާއި 18 ޕޮއިންޓް ހޯދި އައިމިނަތު ޝިއުރާ އެވެ. އަދި އެ ޓީމުގެ ހައުމާ އުބައިދުﷲ ވަނީ 13 ޕޮއިންޓް އެއްކޮށްފަ އެވެ.
އެލީޓް ޓީމުން އެންމެ ގިނަ ޕޮއިންޓް ސްކޯކުރީ، 11 ޕޮއިންޓް ހޯދި ރާއީ ހަމްޒާ އާއި 10 ޕޮއިންޓް އެއްކުރި އައިމިނަތު އިނާޝާ އެވެ.
ގައުމީ ބާސްކެޓްބޯޅަ ލީގުގައި ރެޕްޓާސް އާއި ރެޑްވިންގްސް ކުޅުނު މެޗުގެ ތެރެއިން.---- ފޮޓޯ: ސިޑިބަރި
މުބާރާތުގެ ފިރިހެން ޑިވިޝަންގައި ރޭ ރެޕްޓާސް ބާސްކެޓްބޯލް ކްލަބުން ވަނީ 81-75 އިން ރެޑްވިންގްސް ބާސްކެޓްބޯލް ކްލަބް ބަލިކޮށްފަ އެވެ.
މި މެޗުގައި ރެޕްޓާސް އަށް އެންމެ މޮޅު ކުޅުމެއް ދައްކައިދިނީ، 21 ޕޮއިންޓް ހޯދި މުހައްމަދު އައިކް ވަޖީހު އެވެ. ރެޑްވިންގްސްގެ ފަރާތުން ވެސް ހިތްވަރު ގަދަ ކުޅުމެއް ފެނިގެންދިޔައިރު، އެ ޓީމުގެ މުހައްމަދު ޒީދާން ނައީމް 17 ޕޮއިންޓް ސްކޯކުރިއިރު، މުހައްމަދު ރިޝްވާން ވަނީ 15 ޕޮއިންޓް އެއްކޮށްފަ އެވެ.
ގައުމީ ބާސްކެޓްބޯޅަ ލީގުގައި މިރޭ ކުޅޭ ފުރަަތަމަ މެޗަކީ އަންހެން ޑިވިޝަނުގައި ސައިކްލޯން ބާސްކެޓްބޯލް ކްލަބާއި ލަޔެންސް ބައްދަލުކުރާ މެޗެވެ. އަދި މިރޭ ދެން ކުޅެނީ، ޓީރެކްސް އާއި ރޯޔަލްސް ބައްދަލުކުރާ މެޗެވެ.
