އިސްތަންބޫލް، ތުރުކީ (ޖެނުއަރީ 15) - ތުރުކީގެ ސުޕަ ލީގުގެ މެޗެއްގައި، އިޒްރޭލާއި ފަލަސްތީން ހަނގުރާމައާ ގުޅޭ މެސެޖެއް ދައްކާލި، އަންތަލިޔަސްޕޯގެ އިޒްރޭލް ފޯވާޑް، ސާގިވް ޖެހެޒްކެލް، ހައްޔަރުކުރުމަށް ފަހު ދޫކޮށްލަން ނިންމައިފި އެވެ.
ތުރުކީ ސުޕަ ލީގުގައި ކުޅުނު މެޗެއްގައި ޓްރަބްޒޯންސްޕޯ ކޮޅަށް ގޯލެއް ޖެހުމަށް ފަހު، އަންތަލިޔަސްޕޯގެ އިޒްރޭލް ކުޅުންތެރިޔާ، ސާގިވް، ބެންޑޭޖްގައި ލިޔެފައިވާ މެސެޖެއް ޓީވީ ކެމެރާ އަށް ދައްކާލިއިރު ލިޔެފައިވަނީ، "100 ޑޭސް. 7/10" މި ގޮތަށެވެ.
މި ކަމާ ގުޅިގެން ތުރުކީގެ ޕްރޮސެކިއުޓަރުން ވަނީ ސާގިވްގެ މި މެސެޖަކީ، އިޒްރޭލުން ފަލަސްތީނަށް އަރައި، ހިންގަމުން އަންނަ ގަތުލު އާންމަށް ތަރުހީބު ދޭ ފަދަ އަމަލެއް ކަމަށް ބުނެ، އޭނާގެ މައްޗަށް ދައުވާ ކޮށްފަ އެވެ.
މި މައްސަލަ ހޫނުވެ، ތުރުކީގެ ސަރުކާރުގެ އޮފިޝަލުންނާއި އާންމުންގެ ޕްރެޝަރާ ހެދި، އަންތަލިޔަސްޕޯ އިން ވަނީ ސާގިވްގެ ކޮންޓްރެކްޓް ވެސް އުވާލައިފަ އެވެ.
ތުރުކީ ފުލުހުން، ސާގިވް، ހައްޔަރުކުރުމާ ގުޅިގެން، އިޒްރޭލްގެ ސަރުކާރުގެ އެކި އޮފިޝަލުން އަންނަނީ، ތުރުކީއާ މެދު ފިޔަވަޅު އަޅަން ޖެހޭ ކަމަށް އަޑުއުފުލަމުންނެވެ. އެ ގޮތުން، އިޒްރޭލްގެ ފޮރިން މިނިސްޓްރީން ވަނީ ބައިނަލްއަގުވާމީ ކުޅިވަރު ޖަމިއްޔާތަކުން ތުރުކީއާ މެދު ފިޔަވަޅު އަޅަން ޖެހޭ ކަމަށް ބުނެފަ އެެވެ.
ތަކުރާރުކޮށް، އިޒްރޭލްގެ ސަރުކާރު އޮފިޝަލުން ދައްކަމުން އައި ވާހަަކަތަކަށް ފަހު، އެންމެ ފަހުން، މިއަދު ތުރުކީ ސަރުކާރާއި ފުލުހުން ނިންމާފައިވަނީ، ސާގިވް ދޫކޮށްލުމަށެެވެ.
ރިޕޯޓްތައް ބުނާގޮތުން، ސާގިވް ދޫކޮށްލާނީ އަނބުރާ ދެން ތުރުކީ އަށް ނާދެވޭ ގޮތަށް ޑީޕޯޓް އެވެ. ޓެލް އަވީވް އަށް މިއަދު ސާގިވް އާއި އޭނާގެ އާއިލާ ގެންދާނީ އިޒްރޭލް ސަރުކާރުން ހަމަޖެއްސި ޖެޓެއްގަ އެވެ.
މީޑިއާ އަކަށް ސާގިވް ދިން އިންޓަވިއުއެއްގައި ބުނެފައިވަނީ، އޭނާ ބެންޑޭޖްގައި ލިޔެގެން މި ދިން މެސެޖަކީ، އެއްވެސް ކަމަކަށް ތާއީދުކޮށްފައި، ފާޅުކުރި ޝުއޫރެއް ނޫން ކަމަށެވެ. އެއީ، އިޒްރޭލާއި ހަމާސްގެ މެދުގައި ހިނގާ މި ހަނގުރާމަ އަށް 100 ދުވަސް ވެފައިވާތީ، އެކަން ހުއްޓާލައި، ސުލްހަ ގާއިމްކުރަން އެދޭތީ، އެ ކަމަށް އެދި ގޮވާލި ގޮވާލުމެއް ކަމަށް ސާގިވް ބުނެފައިވެ އެވެ.
މިދިޔަ އޮކްޓޫބަރު މަހުން ފެށިގެން އިޒްރޭލުން ފަލަސްތީނުގެ ގާޒާ އަށް ދެމުން އަންނަ ހަމަލާތަކުގައި ފަލަސްތީނުގެ އަންހެނުންނާއި ކުޑަކުދިން ހިމެނޭ ގޮރަށް 25،000 އަށް ގާތްކުރާ އަދަދަކަށް މީހުން ވަނީ މަރުވެފަ އެވެ.
